ވ. އާރަށް ކުއްޔަށް ދޫކުރުމުގެ ތެރެއިން ހިންގި ކަމަށް ބުނާ ހިޔާނާތުގެ މައްސަލާގައި, އެ ހިޔާނާތުން ކުރީގެ ރައީސް އަބްދުﷲ ޔާމީން ހޯދި މަންފާ ކަމަށް ބުނެ ދައުލަތަށް ދެއްކުމަށް އަމުރުުކޮށްފައިވާ 53 މިލިއަން ރުފިޔާގެ އަމުރު ބާތިލުކުރި މައްސަލަ ސުޕްރީމް ކޯޓުގައި އިސްތިއުނާފް ނުކުރާނެ ކަމަށް ޕްރޮސެކިއުުޓާ ޖެނެރަލް އޮފީސް (ޕީޖީ) އޮފީހުން ބުނެފި އެވެ.
ޕީޖީ އޮފީހުން ބުނީ މި މައްސަލަ ސުޕްރީމް ކޯޓުުގައި އިސްތިއުނާފު ނުކުރި ނަމަވެސް މިހާރު ހައިކޯޓުގައި ކުރިއަށްދާ އާރަށު ހިޔާނާތުގެ އިސްތިއުނާފް އަޑުއެހުންތަކުގައި އެ އޮފީހުން މިކަން ފާހަގަ ކުރާނެ ކަމަށެވެ. އާރަށް މައްސަލަ ކްރިމިނަލް ކޯޓަށް ހުށަހެޅި އިރުވެސް އެ ފައިސާ ދައުލަތަށް ނަގައިދިނުމަށް އެދިފައިވާނެ ކަމަށް ޕީޖީ އޮފީހުން ބުނެފައި ވެއެވެ.
ޖޫރިމަނާކުރުމަށް ކްރިމިނަލް ކޯޓުން ކުރި އަމުރު ބާތިލުކޮށްފައި ވަނީ އެއަމުރު ނެރެފައިވަނީ ގާނޫނުގައި ކަނޑައަޅާފައިވާ އިޖުރާއަތްތަކުގެ ބޭރުން ކަމަށް ބުނެ އެވެ.
އެ މައްސަލައިގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ ޔާމީންގެ މައްޗަށް ކުރީ 11 އަހަރުގެ ޖަލު ހުކުމެކެވެ. އެ ހުކުމް ޔާމީންގެ މައްޗަށް އިއްވީ މިދިޔަ ޑިސެމްބަރު 25، 2022 ގަ އެވެ. ނަަމަވެސް، 53 މިލިއަން ހަ މަސް ތެރޭ ދެއްކުމަށް ކްރިމިނަލް ކޯޓުން އަމުރުކުރީ މިދިޔަ ފެބްރުއަރީ 26، ގަ އެވެ.
ހައި ކޯޓުން މިމަހުގެ 11 ވަނަ ދުވަހު ކުރި ހުކުމުގައި ވަނީ މައުޟޫއީ މައްސަލައިގެ ހުކުމުގައި ކުށްކޮށްގެން ހޯދި ކަމަށް ދައުލަތުން ބުނާ މުދަލާއި ފައިސާ ނެގުމަށް ހިމަނާފައި ނެތުމުން އަލުން އަމުރަކަށް އެދެވިދާނެ ގާނޫނީ ހަމައެއް ދައުލަތަށް ބުނެދެވިފައި ނުވާ ކަމަށެވެ.
އެހެންކަމުން، ކްރިމިނަލް ކޯޓުން ކުރި ހުކުމަކީ ބާތިލު ހުކުމެއް ގޮތުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ނިންމެވި އެވެ. ބެންޗުގެ ރިޔާސަތުގައި އިންނެވީ ފަނޑިޔާރު މުހައްމަދު ފައިސަލް އެވެ. ދެން ތިއްބެވީ ފަނޑިޔާރު ހަސަން ޝަފީއު އާއި، ފަނޑިޔާރު ދީބަނާޒު ފަހުމީ އެވެ.
