އޮޅުވާލައިގެން ފައިސާ ހޯދުން (ސްކޭމް) ހުއްޓުވުމަށް ޓަކައި ކަމާ ބެހޭ ހުރިހާ އިދާރާތައް ގުޅިގެން ޓާސްކްފޯހެއް ހަދަން އަންގަން ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒް ކޮމިޓީ (އެސްއޯއީ ކޮމިޓީ) އިން ފާސްކޮށްފި އެވެ.
ސްކޭމް ހުއްޓުވަން ޓާސްކްފޯހެއް ހަދަން އަންގަން ނިންމީ ސްކޭމްތައް ނުހުއްޓުވި ބޭންކް އޮފް މޯލްޑިވްސް (ބީއެމްއެލް)ގެ އިތުބާރު ގެއްލޭތީ ކަންބޮޑުވުން ފާޅުކުރައްވައި ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެމްބަރު އަބްދުލް މުޣުނީ ހުށަހެޅުއްވި މައްސަލަ އެސްއޯއީ ކޮމިޓީން ދިރާސާކޮށް އެކުލަވައިލި ރިޕޯޓްގަ އެވެ.
މިދިޔަ ބުރާސްފަތި ދުވަހު ފާސްކުރި އެ ރިޕޯޓްގައިވާ ހުށަހެޅުމުގައިވާ ގޮތުން އެމްއެމްއޭއިން އިސްނަގައިގެން އުފައްދާ އެ ޓާސްކްފޯސް ވާން ޖެހޭނީ މަލްޓި-އޭޖެންސީ ޓާސްކްފޯހަކަށެވެ. އެ ޓާސްކްފޯހުން ކުރަން ޖެހޭނެ ކަމަކީ، ސްކޭމް ހުއްޓުުވުމަށް ޓަކައި މަސައްކަތްކުރާނެ ނިޒާމެއް، ދައުލަތުގެ ކަމާ ބެހޭ ހުރިހާ އިދާރާތަކާ އެކު މަސަައްކަތްކޮށްގެން ގާއިމްކުރުމެވެ.
އެސްއޯއީ ކޮމިޓީގެ ރިޕޯޓްގައިވާ ގޮތުން އެ ރިޕޯޓް މަޖިލީހުން ފާސްކުރާތާ 15 ދުވަހުގެ ތެރޭގައި ޓާސްކްފޯސް އުފައްދައި، ސްކޭމާ ދެކޮޅު ނިޒާމު ވެސް އެކުލަވައިލަން ޖެހޭނެ އެވެ.
އެހެން ބައެއް ހުށަހެޅުންތައް
- ބޭންކިން ގާނޫނާއި ފުލުހުންގެ ގާނޫނާއި ހެއްކާ ބެހޭ ގާނޫނާއި ގާނޫނުލް އުގޫބާތަށް ގެންނަން ޖެހޭ ބަދަލުތަކެއް ހުރި ނަމަ އެ ބަދަލުތަކެއް ގެނައުން
- ސައިބާ ސެކިއުރިޓީ ގާނޫނަކާއި ޑޭޓާ ޕްރޮޓެކްޝަން ގާނޫނެއް ހެދުން
- ފްރޯޑް އަދި ސްކޭމަށް ހުށަހެޅޭ ރައްޔިތުންނަށް، އެހީތެރިވާން ފްރޯޑް ޔުނިޓް އަދި ސްކޭމް ހޮޓްލައިނެއް ގާއިމްކުރުން
- ސްކޭމް މެސެޖްތައް ދެނެގަނެ ފިލްޓާކޮށް ބްލޮކްކުރުމަށް ބޭނުންވާ ނިޒާމުތައް ގާއިމްކުރަން ސާވިސް ޕްރޮވައިޑަރުންނަށް (ފޯނާއި އިންޓަނެޓްގެ ހިދުމަތްދޭ ފަރާތްތަކަށް ) އެންގުން
ފޯނުކޯލުތަކާއި ޕިޝިން ލިންކްތައް މެދުވެރިކޮށް މީހުންގެ އެކައުންޓްތަކުން ފައިސާ ވަގަށް ނެގުން އިތުރުވެ، އާއްމުންގެ ޝަކުވާ ބޮޑުވުމުން ރައްޔިތުންގެ މަޖިލީހަށް ވެސް އެކަމާ ގުޅޭ ދެތިން މައްސަލައެއް ހުށަހެޅި އެވެ. ތިނަދޫ އުތުރު ދާއިރާގެ މެމްބަރު އަބްދުލް މުޣުނީ ހުށަހެޅުއްވި މައްސަލައަކީ އޭގެ ތެރެއިން އެއް މައްސަަލަ އެވެ.
އެސްއޯއީ ކޮމިޓީން އެ މައްސަލަ ދިރާސާކުރި އިރު ކަމާ ބެހޭ ހުރިހާ މުއައްސަސާއެއްގެ އިސްވެރިން ހާޒިރުކޮށް ގިމަ މައުލޫމާތުތަކެއް އެއްކުރި އެެވެ. އެކޮމިޓީއަށް ފުލުހުން ދީފައިވާ މައުލޫމާތުގައިވާ ގޮތުން އެފަދަ މައްސަލަ ތައް އެންމެ ގިނައިން ހުށަހެޅީ މިދިޔަ އަހަރު އެވެ. މިދިޔަ އަހަރު ފުލުހުންނަށް އެފަދަ 1087 މައްސަލަ ހުށަހެޅި އެވެ. އޭގެ ކުރީ އަހަރު 601 މައްސަަލަ އަދި މިއަހަރުގެ މިހައިތަނަށް 155 މައްސަލަ ހުށަހަޅާފައިވާ ކަން ވެސް ފުލުހުން ކޮމިޓީއަށް ދިން މައުލޫމާތުގައި ވެ އެވެ.
