ކުލަ ޖެހުމަކީ ބުދަށް އަޅުކަން ކުރާ ހިންދޫ ދީނުގެ އާދައެއް ކަމަށް ބުނެ ކުރިއަށް އޮތް ފިތުރު އީދު ދުވަހު ގދ. ފިޔޯރީގައި ކުލަ ޖެހުން އެ ރަށު ކައުންސިލުން މަނާކޮށްފި އެވެ.
އެ ރަށު ކައުންސިލުން މިއަދު ނެރުނު އިއުލާނެއްގައި ބުނީ "އީދުގައި އެއްވެސް ހަރަކާތަކާއި ގުޅުވައިގެން ކުލަ ޖެހުމަކީ މަނާކަމެއް" ކަމަށެވެ. އަދި ބުނެފައި ވަނީ އެއީ އިސްލާމް ދީނާ ދުރު، ހިންދޫން ކުރަމުން އަންނަ ކަމެއް ކަމަށެވެ.
"މިފަދަ ކަންކަމަކީ މާތްވެގެންވާ އިސްލާމްދީނާއި ދުރު ހިންދޫ ދީނުގެ މީހުން ކުރަމުންދާ ކަމަކަށް ވުމާއެކު މިރަށުގެ ގިނަ ރައްޔިތުންތަކެއް ވަރަށް ބޮޑަށް ނަފްރަތު ކުރާކަމެއްކަމަށް ފާހަގަ ވެފައިވޭ،" އެ އިއުލާނުގައި ބުނެފައިވެ އެވެ.
މިއީ އީދު ދުވަހާ ގުޅުވައިގެން ފިޔޯރީގައި ކުލަ ޖެހުން މަނާ ކުރި ދެ ވަނަ އަހަރެވެ. މިދިޔަ އަހަރު ވެސް އެ ރަށުގައި އޮތީ ކުލަ ޖެހުން މަނާކޮށްފަ އެވެ.
އީދާ ގުޅުވައިގެން ރަށްރަށުގައި ފެން ޖެހުމަނީ ދިވެހިންގެ ތެރޭގައި އޮތް އާދައެއް ނަމަވެސް ކުލަ ޖެހުމަކީ މިފަހުން އާންމުވެގެން އުޅޭ ކަމެކެވެ.
