އާންމު ފަރުދަކަށް އެންމެ ގިނަވެނެގެން މިލްކު ކުރެވޭނީ އެމްޓީސީސީގެ ހިއްސާގެ ތެރެއިން ފަސް ޕަސެންޓު ކަމަށް ބުނާ މާއްދާ އުވާލުމާމެދު ހިއްސާދާރުންގެ ހިޔާލު ހޯދަން އެކުންފުނިން މިއަދު ހުޅުވާލައިފި އެވެ.
އެމްޓީސީސީން ބުނީ ހިއްސާ ގަތުން ލިމިޓު ކުރާ އެ ކުންފުނީގެ ހިންގާ ގަވާއިދުގެ މާއްދާ އުވާލުމަށް އާންމު އަހަރީ ޖަލްސާގައި ހުށަހަޅަން އެ ކުންފުނީގެ ޑިރެކްޓަރުންގެ ބޯޑުން ނިންމާފައިވާ ކަމަށެވެ.
އާންމު ފަރުދުން ހިއްސާ ގަތުން ލިމިޓު ކުރާ މާއްދާގައި ބުނަނީ، "ސީދާ ގޮތުން އަދި ނުސީދާ ގޮތުން ވިޔަސް، އަމިއްލަ ފަރުދަކަށް ނުވަތަ އަމިއްލަ ފަރުދެއް ހިއްސާވާ ގާނޫނީ ޝަހުސަކަށް، އެންމެ ގިނަވެގެން މިލްކުކުރެވޭނީ ކުންފުނީގެ ހިއްސާގެ ރައުސްމާލުގެ ފަސް ޕަސެންޓު" ކަމަށެވެ.
އޭގެ އިތުރުން، ސަރުކާރުގެ ކުންފުނިތަކަށް އެމްޓީސީސީގެ ހިއްސާގެ އެއްވެސް މިންވަރެއް ގަތުން މަނާ ކުރާ މާއްދާ ވެސް އުވާލަން ޑިރެކްޓަރުންގެ ބޯޑުން ބޭނުންވެ އެވެ.
އެ މާއްދާގައި ބުނަނީ "އެއްވެސް ހިނދަކު އަމިއްލަ ފަރުދުންނަށް ދޫކޮށްފައިވާ އަދި ކުރިމަގުގައި ދޫކުރެވޭ މިކުންފުނީގެ ހިއްސާގެ ތެރެއިން އެއްވެސް މިންވަރެއް، ސަރުކާރުގެ ކުންފުންޏަކުން ނުވަތަ ސަރުކާރުގެ ބާރުގެ ދަށުގައިވާ (ސަރުކާރުގެ މަދުވެގެން 51 ޕަސެންޓު ހިއްސާ އެކުލެވެ) ގާނޫނީ ޝަހުސެއްގެ ނަމުގައި ވިޔަސް އޮވެގެން ނުވާނެ" ކަމަށެވެ.
އެމްޓީސީސީން ބުނީ މެއި 16، 2021 ގައި ފާސް ކުރި ހިންގާ ގަވާއިދުގައި ހިމަނާފައި އޮތް ދެ މާއްދާ އުވާލަން ބޭނުންވަނީ ރެގިއުލޭޓަރުންގެ ލަފާގެ މަތިން ކުންފުންޏާ ބެހޭ ގާނޫނުގެ ތެރެެއަށް ހިންގުން ފައްތަން ކަމަށެވެ.
