ރާއްޖޭގެ މަޝްހޫރު މަހުޖަނު އަހުމަދު މޫސާ (އުއްޗު) ގެ ކުންފުނި ޗަމްޕާ ބްރަދާސްއިން ރާއްޖޭގެ ރައްޔިތުންނަށް ހަދިޔާކުރި 25،000 ކާށި ބެހުމުގެ މަސައްކަތް މާދަމާ ފައްޓާނެ ކަމަށް މާލެ ސިޓީ ކައުންސިލުން ބުނެފި އެވެ.
ސިޓީ ކައުންސިލުން މިއަދު ނެރުނު އިއުލާނެއްގައި ބުނެފައިވަނީ މާދަމާއިން ފެށިގެން އަންނަ އާދިއްތަ ދުވަހާ ހަމައަށް ކާށި ބަހަން ހަމަޖެހިފައިވަނީ ފަގީރުންގެ ގޮތުގައި އިސްލާމިކް މިނިސްޓްރީގައި ރަޖިސްޓްރީކޮށްފައިވާ ފަރާތްތަކަށް ކަމަށެވެ.
އަދި މި މަހުގެ 17 އިން ފެށިގެން ކޮންމެ ދިވެއްސަކަށްވެސް މި ކާށިތައް ބަހަމުންގެންދާނެ ކަމަށް އެ ކައުންސިލުން ވަނީ ބުނެފަ އެވެ.
އިއުލާނުގައި އިތުރަށް ބުނެފައިވަނީ ކާށި ބެހުމަށް ހަމަޖެހިފައިވަނީ ތައިސޭ ކޮށީގައި ހުންނަ ސިޓީ ކައުންސިލްގެ އާންމު ހިދުމަތާ ބެހޭބައިންނެވެ. ސިޓީ ކައުންސިލްގެ އިއުލާނުގައި ބުނެފައިވަނީ ހުކުރު ނޫން ކޮންމެ ދުވަހަކު ހެނދުނު 9:30 އިން މެންދުރު 1:30 އަށް އަދި ރޭގަނޑު 9:30 އިން 11:30 އަށް ކާށި ބެހުމަށް ހަމަޖެހިފައިވާ ކަމަށެވެ.
ޗަމްޕާ ބްރަދާސްއިން ރައްޔިތުންނަށް ކާށި ހަދިޔާކުރުން ނިންމީ ރާއްޖޭގެ ބާޒާރުގައި ކާށި ލިބުން ދަތިވެ، ކާށީގެ އަގު އުފުލެމުންދިޔުމާ ގުޅިގެންނެވެ. އުފުލިފައިވާ ކާށީގެ އަގުތައް ހެޔޮކުރުމަށް އެސްޓީއޯއިން މިދިޔަ މަހު ކާށި ޝިޕްމަންޓެއް ގެނެސްފައިވާއިރު، މިހާރު ބާޒާރުގައި ކާށީގެ އަގަށް އަންނަނީ ކޮންމެވެސް ކަހަލަ ހެޔޮ ބަދަލުތަކެއް އަންނަމުންނެވެ.
