ނ. މަނަދޫގެ އެކި ސަރަހައްދުތަކުގައި ސެކިއުރިޓީ ކެމެރާ ހަރުކޮށްދޭނެ ބަޔަކު ހޯދަން އެ ރަށު ކައުންސިލުން މިއަދު އިއުލާންކޮށްފި އެވެ.
މަނަދޫ ކައުންސިލްގެ ފަރާތުން ސަރުކާރުގެ ގެޒެޓްގައި އެފަދަ އިއުލާނެއްކޮށްފައި މި ވަނީ، މިދިޔަ ހުކުރު ދުވަހުގެ ރޭ އެ ރަށު އަންނާރުމާގޭ ނައީމާ މޫސާ، 62، މަރާލާފައި އޮއްވައި ފެނިފައި ވަނިކޮށެވެ.
މަނަދޫ ކައުންސިލްގެ ރައީސް އަބްދުލްރަހްމާން ސަބީހު "އަދަދު" ނޫހާ ވާހަކަ ދައްކަވަމުން ވިދާޅުވީ ރަށުގެ ރައްކާތެރިކަމަށް އެކި ސަރަހައްދުތަކުގައި ސީސީޓީވީ ކެމެރާ ހަރުކުރަނީ މި އަހަރަށް ކަނޑައެޅި ކައުންސިލް ބަޖެޓުގައި ވެސް ހިމަނައިގެން ކުރިން ރާވައިގެން ކަމަށެވެ.
"ކުރިން ވެސް ބައެއް މީހުން ފޯރުކޮށްދޭން ހުރި ކެމެރާތަކެއް ކައުންސިލަށް ގެނެސް ބަލާފައި ވެސް ވޭ،" ސަބީހު ވިދާޅުވި އެވެ.
އެހެން ނަމަވެސް އޭރު ކައުންސިލުން އެ މަސައްކަތް ކުރަމުން ދިޔައީ އެންމެ ބޮޑު އިސްކަމެއް އެ ކަމަށް ދީގެން ނޫން ކަމަށް ކައުންސިލްގެ ރައީސް ސަބީހު ވިދާޅުވި އެވެ. މީހަކު މަރާލުމުގެ ބޮޑު ހާދިސާއެއް ރަށުގައި ހިނގާފައި އޮތުމުން ކައުންސިލުން ދެން ނިންމީ އެ ކަން ވީ އަވަސް ކުރުމަށް ކަމަށް ވިދާޅުވި އެވެ.
"މި ކޭސް ވެސް ދިމާވުމުން، އަޅުގަނޑުމެން މިހާރު ޕްރިއޯރިޓީ ދެވޭ އެންމެ އިސް ކަމަށް އެ ކަން ވެފައި މި އޮތީ، އެހެންވުމާއެކު އިއުލާން ނެރެ އެ މަސައްކަތް ފެށުމަށް މަސައްކަތް ކުރަމުން މި ދަނީ،" ސަބީހު ވިދާޅުވި އެވެ.
މަނަދޫ ކައުންސިލްގެ ރައީސް ސަބީހު ވެސް ފާހަގަ ކުރެއްވި ގޮތުގައި، އެ ރަށަކީ ކުށް ވަރަށް މަދު ރަށެކެވެ. ފަހުގެ ތާރީހެއްގައި މީހަކު މަރާލާފައި އޮއްވާ އެ ރަށުގައި ފެނުނު މިއީ ފުރަތަމަ ހާދިސާ އެވެ. ރަށުގައި ކުށް މަދު ކަމުން ފުލުހުންގެ އިދާރާގައި ވެސް ކެމެރާ ހަރުކުރުމުގެ ބޭނުމެއް މީގެ ކުރިން ޖެހިފައި ނެތް ކަން އޭނާ ފާހަގަ ކުރައްވާފައި އެބަ ވެ އެވެ.
ކައުންސިލުން ކޮށްފައިވާ އިއުލާނުގައިވާ ގޮތުން، އެ ރަށުގައި ސީސީޓީީވީ ކެމެރާ ހަރުކުރަން ޝައުގުހުރި އެއްވެސް ފަރާތެއްވާ ނަމަ، އެ ކަމަށް އެދި ބިޑް ހުށަހެޅުމަށް އޮތް ސުންގަޑީއަކީ މި މަހު 27 ގެ ނިޔަލަށެވެ.
މިދިޔަ ހުކުރު ދުވަހު އިރުއޮއްސެނިކޮށް ނައީމާ އުޅޭ ގެއިން އޭނާ މަރާލާފައި އޮއްވާ ފެނިފައިވާއިރު، މަރުގެ ތަހުގީގަށް ފުލުހުންގެ ގިނަ އަދަދެއްގެ ފޮރެންސިކް އެކްސްޓާޕުން އެ ދުވަހުގެ މެންދަމު 2:00 ޖެހި އިރު ރަށަށް ގޮސް ރަށުގައި ދަނީ ހަރަކާތްތެރިވަމުންނެވެ.
މިއަދުގެ ވަގުތެއްގައި ރަށުގެ ފަޅުގެއެއް ވެސް ފުލުހުން ބަލައިފާސްކޮށްފައިވެ އެވެ. މި މައްސަލައާ ގުޅިގެން އަދި މީހަކު ހައްޔަރުކޮށްފައިނުވާއިރު، ހުއްދަ ނެތި ރަށުން އަރައިފޭބުން ވެސް ވަނީ މަނާކޮށްފަ އެވެ. އަދި ރަށަށް އަރައިފާބައި މީހުން ވެސް ގެންދަނީ ނޯޓުކޮށް މޮނިޓާކުރަމުންނެވެ.
އޭނާގެ މަރުގައި ޝައްކު ކުރެވޭ ކަންތައްތަކެއް ހުރުމުން އިތުރަށް ބަލަމުންދާއިރު، މި ނޫހަށް މައުލޫމާތު ލިބިފައިވާ ގޮތުގައި އޭނާ މަރުވެފައި އޮއްވާ ފެނުނުއިރު ކޮޓަރީގެ ބިންމަތީގައި ގިނަ އަދަދަކަށް ލޭ ހުއްޓެވެ.
ނައީމާގެ އެއްވެސް ހަބަރެއް ނުވާތާ ދެ ދުވަސް ފަހުން އާއިލާއިން އެކަން ފުލުހުންނަށް އެންގުމުން އެގެއަށް ފުލުހުން ގޮސް ދޮރު ވައްޓާލައިގެން ވަތް އިރު އޭނާ އޮތީ ކޮޓަރިތެރޭ ބިންމަތީގައި މަރުވެފައި ކަމަށް ވެއެވެ.
