އިދިކޮޅު ޕީޕީއެމްގައި ރައީސުލްޖުމްހޫރިއްޔާގެ މަގާމަށް ގާބިލު ބޭފުޅުން ތިއްބެވި ނަމަވެސް އެބޭފުޅުންގެ އުއްމީދުތައް ގުޅެނީ ކުރިއަށް އޮތް ސެޕްޓެމްބަރު 9، ގައި ބާއްވާ ރިޔާސީ އިންތިހާބާ ނޫން ކަމަށް އިދިކޮޅު ކޯލިޝަނުގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވެއްޖެ އެވެ.
މި ނޫހުން ކޮންމެ ރޯދަ މަހަކު ގެނެސްދޭ ސިޔާސީ ޓޯކް ޝޯ "ކުޅިކޮށް" ޕްރޮގްރާމުގައި ވާހަކަ ދައްކަވަމުން އަބްދުއްރަހީމް ވިދާޅުވީ ޕީޕީއެމްގެ ކެންޑިޑޭޓަކީ އަދިވެސް ޖަލު ހުކުމެއް ތަންފީޒު ކުރައްވަމުންދާ ރައީސް އަބްދުﷲ ޔާމީން ކަމަށާއި އެމަނިކުފާނުގެ ނަން ވޯޓު ކަރުދާހުގައި އޮންނާނެ ކަމަށެވެ.
"އެއީ އެއްވެސް ތާކުންތާކު ޖެހޭ ވާހަކައެއް ނޫން. ސިޔާސީ މަސައްކަތުގައި ބަޔަކު އުޅޭއިރު ކޮންމެ މީހެއްގެ ވެސް ހުންނާނެ އުއްމީދުތަކެއް ހާސިލް ކުރަން ބޭނުންވާ. ޕީޕީއެމްގައި ވެސް އެބަތިބި ވަރަށް ގާބިލް ކަމަށް އެކަށޭނެ ބޭފުޅުން. އެބޭފުޅުންގެ ވެސް ހުންނާނެ އުއްމީދުތަކެއް. އެކަމަކު އެ އުއްމީދު ގުޅިފައި އޮތީ 2023 އަކާ ނޫން،" އަބްދުއްރަހީމް ވިދާޅުވި އެވެ.
ޕީޕީއެމް ހިނގަނީ ރައީސް ޔާމީންގެ ވިސްނުންފުޅާ އެއްގޮތަށް ކަމަށާއި ޖަލުގައި ހުންނެވި ނަމަވެސް ޕާޓީ ހިންގުމުގައި ޔާމީން މުހިންމު ރޯލެއް އަދާކުރައްވާ ކަމަށް ވެސް އަބްދުއްރަހީމް ވިދާޅުވި އެވެ. އަދި ވިދާޅުވީ ވަކީލުން މެދުވެރިކުރައްވާ އެމަނިކުފާނު ބޭނުންވެވަޑައިގަންނަވާ މެސެޖެއް ޕާޓީގެެ ލީޑަރުންނާ ހަމައަށް ގެންދަވާ ކަމަށެވެ.
އިދިކޮޅު ޕާޓީ އާއި ޕާޓީގެ ލީޑަރުންގެ ވާހަކަ ދައްކަވަމުން އަބްދުއްރަހީމް އިތުރަށް ވިދާޅުވީ، ރިޝްވަތު ނެގުމާއި އެ ފައިސާ ލޯންޑާ ކުރެއްވި ކަމުގެ ތުހުމަތުގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ޔާމީންގެ އަނބިކަނބަލުން ފާތިމަތު އިބްރާހިމް ސިޔާސީ ކަންކަމުން ނުފެންނަނީ އެއީ ޔާމީން ބޭނުންވެވެޑައިގަންނަވާ ގޮތްކަމުގައި ނުވާތީ ކަމަށެވެ.
ކުރީގެ ރައީސް ޔާމީންގެ ފުރަތަމަ ނައިބު ރައީސް އަދި މިހާރުގެ ގާނޫނީ ވަކީލު މުހައްމަދު ޖަމީލު އަހުމަދު އަލުން ޕީޕީއެމަށް މަސައްކަތް ކުރެއްވުމާ ގުޅޭ ގޮތުން ވެސް އަބްދުއްރަހީމް ވާހަކަ ދެއްކެވި އެވެ.
"މިފަހަރު ވެރިކަން ގެންނަން ކިހިނެއްތޯވީ. ތިޔައީ ޒައީމޭ ޖެހީ އެމްޑީޕީ ހަރުގެއިން. އެ ނޫންތޯ މިކަން ހިނގާ ގޮތަކީ. އަޅުގަނޑު ގަބޫލު ކުރަނީ ޖަމީލަކީ އެއިރެއްގައި ހުންނަ ދިމާލެއްގައި ވަރަށް ބޮޑަށް މަސައްކަތް ކުރައްވާ ބޭފުޅެއް. މިއީ ހަގީގަތް،" އޭނާ ވިދާޅުވި އެވެ. "އަޅުގަނޑު ގަބޫލު ކުރަނީ ޖަމީލަށް ކުރެވުނު ތަޖުރިބާގެ އަލީގައި ޖަމީލު އަސްލަށް ރުޖޫއަވެއްޖެޔޭ.
އެ ޕްރޮގްރާމުގައި ވާހަކަ ދައްކަވަމުން އަބްދުއްރަހީމް ވަނީ ވެރިކަން ހިންގާ އެމްޑީޕީއަށް ވަރަށް ބޮޑަށް ފާޑުވިދާޅުވެފަ އެވެ. މަޖިލީހުގެ ފުރިހަމަ ބާރާއެކު ވެސް އެމްޑީޕީގެ އެއްވެސް ވައުދެއް ނުފުއްދުނު ކަމަށް އަބްދުއްރަހީމް ވިދާޅުވި އެވެ.
"މަޖިލީހުގެ ސުޕަ މެޖޯރިޓީ ލިބިފައި އޮތީ. އަޅުގަނޑަކަށް ނުފެނުނު ތިބޭފުޅުން ވިދާޅުވި އެއްވެސް ކަމަކަށް އަމަލީ ސިފަ އައިތަނެއް. ޖޭއެސްސީ އެކުލެވިގެންވާ ގޮތް ބަދަލު ކުރާނެ ކަމަށް ރަައީސް ސޯލިހު ވިދާޅުވި. ފަސްދޮޅަސް ފަސް މެމްބަރުންނާއެކު ފަސް އަހަރުގެ ދައުރެއް ފުރިހަމަވާއިރު އެކަމެއް ނުވި. ޝަރުއީ ނިޒާމް މިނިވަން ކުރައްވާނަމޭ ވިދާޅުވި،" އޭނާ ވިދާޅުވި އެވެ.
