އަލް ސަފާ އުމްރާ ގްރޫޕަށް ފައިސާ ދައްކައިގެން އިއްޔެ އުމްރާއަށް ފުރަން މަސައްކަތް ކުރި އެންމެން ވެސް ވީހާ ވެސް އަވަހަކަށް މި ރޯދަ މަހުގެ ތެރޭގައި އުމްރާއަށް ފުރުވާލުމަށް އިސްލާމިކް މިނިސްޓްރީން މިރޭ އަންގައިފި އެވެ.
ސަފާ ގްރޫޕުގެ ފަރާތުން އުމްރާއަށް ފުރަން ތައްޔާރުވެފައި ތިބި 180 މީހުންނަށް އިއްޔެ ނުފުރޭނެ ކަމަށް އެންގީ ލަގެޖު ވެސް ކުންފުންޏާ ހަވާލުކޮށްފައި އޮއްވައި ކުއްލިއަކަށެވެ. ސަފާ ގްރޫޕުން ބުނީ ނުފުރުނީ ދަތުރުވެރިންގެ ވިސާ ހަމަނުޖެހިގެން ކަމަށެވެ.
"ތިން މަސް ދުވަހަށް އުމްރާ ވިސާ ލިބޭއިރު ދުރާލައި ކުންފުނީގެ ފަރާތުން ވިސާގެ ކަންކަން ހަމަޖައްސާފައިނުވާކަން މިނިސްޓްރީއަށް ފާހަގަ ކުރެވޭ،" އިސްލާމިކް މިނިސްޓްރީން ބުނެފައިވެ އެވެ.
ސައުދީގައި ވިސާ ދޫކުރަނީ އެކަމަށް އެ ގައުމުގެ ސަރުކާރުން ހުއްދަ ދޫކުރާ އެޖެންސީތަކުންނެވެ.
އެ މައްސަލަ ބެލުމަށްފަހު އިސްލާމިކް މިނިސްޓްރީން ބުނީ އުމްރާއަށް ދާން ބޭނުންވި މީހުންނަށް ވިސާ ހަމަނުޖެހުނީ ސައުދީ އަދި ދިވެހި ސަރުކާރުގެ މައްސަލައެއް ވެސް އޮވެގެން ނޫން ކަމަށެވެ. ސައުދީ އެޖެންސީން ވިސާ ދޫކުރުމުގައި ލަސްތަކެއް އުޅެނީ ކަމަށް ސަފާ ގްރޫޕުން ބުނެފައިވާ ކަމަށް ވެސް ސަރުކާރުން ބުންޏެވެ.
މި އަހަރު ރޯދަ އުމްރާއަކަށް އަލް ސަފާ ކުންފުނިން ބޮލަކަށް 37،500ރ. ނެގި އެވެ. އެ މަގުން ބަލާނަމަ މި ރަމަޟާން މަހުގެ އުމްރާވެރިން އެ ގްރޫޕަށް ގާތްގަނޑަކަށް ހަތް މިލިއަން ރުފިޔާ ދައްކާފައިވާނެ އެވެ.
