ދިވެހިރާއްޖޭގައި ހިންގަމުން އަންނަ ސިޔާސީ ޕާޓީތަކަށް ހއ. ބާރަށުން ބިން ދޫކުރުމަށް ނިންމައި އެ ރަށު ކައުންސިލުން މިއަދު އެކަމާ ގުޅޭ އުސޫލެއް އާންމުކޮށްފި އެވެ.
މިއީ ސިޔާސީ ޕާޓީތަކަށް ދިވެހިރާއްޖެއިން ބިން ދޫކުރަން ނިންމި ފުރަތަމަ ފަހަރެވެ.
ބާރަށު ކައުންސިލުން ނެރެފައިވާ އުސޫލުގައިވާ ގޮތުން ސިޔާސީ ޕާޓީތަކުގެ ތެރެއިން ބިން ދޫކުރެވޭނީ މެމްބަރުންގެ ގޮތުގައި 25،000 ހަމަވެފައި، އެ ރަށުގެ 300 މީހަކު ވެސް އެ ޕާޓީއެއްގެ ދަފްތަރުގައި އޮތުމުންނެވެ.
ކައުންސިލުން ނިންމީ 1000 އަކަފޫޓާއި 2000 އަކަފޫޓާ ދެމެދުގެ ބިން ސިޔާސީ ޕާޓީތަކަށް ދޫކުރުމަށެވެ. ބިން ދޫކުރުމަށް ހަމަޖެއްސީ 15 އަހަރުގެ މުއްދަތަކަށެވެ.
ބިން ލިބޭ ސިޔާސީ ޕާޓީތަކުން އެ ޕާޓީއަކަށް ލިބޭ ބިމުގައި ސިޔާސީ ހަރަކާތް ހިންގުމާއި އޮފީސް ހިންގުމާއި ޖަގަހަ ހިންގުން ފަދަ މަސައްކަތް ކުރެވޭނެ އެވެ. އެކަމަކު، ގާނޫނާ ހިލާފު ކަމެއް ނުވަތަ ޕާޓީއަށް އަދި މުޖްތަމައަށް މަންފާނުވާ ފަދަ ކަމެއް ކުރާ ނަމަ ބިން އަތުލެވޭނެ އެވެ.
ގާތްގަނޑަކަށް 2000 މީހުންގެ އާބާދީއެއް އޮންނަ ބާރަކަށީ 256 ހެކްޓަރުގެ ބޮޑު ރަށެކެވެ.
