ކަޅުއޮށްފުންމި އަލަށް ބަންނަވައިގެން އޭގެ ރިޔާ ފެއްސެވުމަށް ޖެއްސެވި ކަޑައިން ހއ. ބާރަށުގައި ހެދި ބޮޑުވި ކަމަށް ބުނާ، 400 އަށް ވުރެ ގިނަ އަހަރުވީ ކާނި ގަސް ރޭގެ ވަގުތެއްގައި ބަޔަކު ރޯކޮށްލައިފި އެވެ.
އެ ގަހުގައި ރޯކޮށްލާފައިވާ މަންޒަރުގެ ފޮޓޯ ސޯޝަލް މީޑިއާގައި މިހާރު އާންމުވެފައިވާއިރު، ގަސް އެއްކޮށް އަނދާފައިވާ ތަން ފޮޓޯތަކުން ފެނެ އެވެ.
ގަހުގައި ރޯކޮށްލި ސަބަބު މިހާތަނަށް ޔަގީންނުވި ނަމަވެސް އަޑުއަރާފައި ވަނީ އެ ކާނިގަހުގައި ރޯކޮށްލީ ސިޔާސީ މަގުސަދެއްގައި ކަމަށެވެ.
ބާރަށު ކައުންސިލުން އަދި އެކަމާ ގުޅޭ ބަހެއް ނުލިބެ އެވެ.
ތާރީހީ ކާނި ގަހުގައި ރޯކޮށްލިި މައްސަލަ އާންމުން އަދި ސަރުކާރުގެ އިސް ފަރާތްތަކުން އަންނަނީ ކުށްވެރި ކުރަމުންނެވެ. އެގޮތުން، އެ ކަންތައް ޖިނާއީ މައްސަލައެއްގެ ގޮތުގައި ތަހުގީގު ކުރުމަށް މިނިސްޓްރީ އޮފް ސިޓީސްގެ މިނިސްޓަރު އާދަމް ޝަރީފް އުމަރު ވަނީ ގޮވާލައްވައިފަ އެވެ.
"މިއީ ވަރަށް ހިތާމަހުރި، އަޅުގަނޑު ކަންބޮޑުވާ ކަމެއް. ރާއްޖޭގައި ހުރި ތާރީހީ އަދި އާސާރީ މިފަދަ ތަކެއްޗަށް ގެއްލުންދޭ މައްސަލަ ޖިނާއީ މައްސަލައެއްގެ ގޮތުގައި ތަހުގީގު ކުރަންޖެހޭ،" ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވި އެވެ.
ކަޅުއޮށްފުންމިއަކީ ޕޯޗުގީޒުންނާ ހަނގުރާމަ ކުރެއްވުމަށް ބޮޑުތަކުރުފާނު ބެންނެވި އޮޑި އެވެ. ރާއްޖޭގެ އެކި ހިސާބުތަކަށް ދަތުރު ކުރައްވައި، އެކި ރަށްތައް ފަތަހަ ކުރައްވަމުން ގެންދެވީ އެ އޮޑީގަ އެވެ.
