ކުރިއަށް އޮތް ރިޔާސީ އިންތިހާބުގާ ވާދަކުރައްވަން އިއުލާންކޮށްފައިވާ ޖުމްހުރީ ޕާޓީގެ ކެންޑިޑޭޓު ގާސިމް އިބްރާހިމާއެކު ކޯލިޝަން ހެދުމުގެ ވިސްނުމެއް ނެތް ކަމަށް އިންތިހާބުގައި ވާދަކުރާނެކަން އިއުލާން ކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
ކޯލިޝަން ހެދުމަށް އެދި ގާސިމް، އުމަރު ހިމެނޭހެން ޕީޕީއެމާއި އެމްއާރުއެމާއި އެމްއެންޕީއަށް އިއްޔެ ފޮނުއްވި ކަމަށް ބުނާ ސިޓީ ލިބުނުކަންވެސް އުމަރު ވަނީ މިއަދު "އަދަދު" އާ ވާހަކަދައްކަވަމުން ދޮގުކުރައްވާފަ އެވެ. އަދި އެބޭފުޅާ އިންތިހާބުގައި ވަކިން ވާދަކުރެއްވުމުގެ ވިސްނުމަށް ބަދަލެއް ނާންނަކަމަށްވެސް ވިދާޅުވި އެވެ.
"އެފަދަ ސިޓީއެއް ނުލިބޭ، އެހެންނޫނަސް އިންތިހާބާމެދު އަޅުގަނޑުގެ ވިސްނުންހުރި ގޮތް ވަރަށް ސާފުވާނެ، އައިއޭމް ނޮޓް އަ ފޮލޯވާ," އުމަރު ވިދާޅުވި އެވެ.
މިއީ އުމަރު ވާދަކުރައްވާ ތިންވަނަ ރިޔާސީ އިންތިހާބެވެ. އެގޮތުން 2008 އަދި 2013 ގެ ރިޔާސީ އިންތިހާބުގައި ވާދަކުރެއްވި ނަމަވެސް އުމަރަށް އެ ދެފަހަރުވެސް ފުރަތަމަ ބުރުން ނާކާމިޔާބުވި އެވެ.
ގާސިމް އިއްޔެ ފޮނުއްވި ސިޓީއަށް އެމްއެންޕީ އަދި އެމްއާރުއެމް އިން މިހާތަނަށް ޖަވާބެއް ދީފައިނުވާއިރު، ޕީޕީއެމް އިން ވަނީ ގާސިމްގެ ފަހަތަށް ނާރަނެ ކަމަށް ބުނެފަ އެވެ. އެގޮތުން އިދިކޮޅު ކޯލިޝަން ހިންގެވުމާ މިވަގުތު ހަވާލުވެ ހުންނެވި ޕީއެންސީގެ ރައީސް އަބްދުލްރަހީމް އަބްދުﷲ ރޭ ވިދާޅުވީ ޕީޕީއެމް ޕީއެންސީ ކޯލިޝަނަކުން އެހެން އެއްވެސް ސިޔާސީ ޕާޓީއެއްގެ ރިޔާސީ ކެންޑިޑޭޓަކަށް ތާއީދެއް ނުކުރާނެ ކަމަށާއި އިދިކޮޅު ކޯލިޝަންގެ ރިޔާސީ ކެންޑިޑޭޓަކީ ކުރީގެ ރައީސް އަބްދުﷲ ޔާމީން ކަމަށެވެ.
ޕީޕީއެމްގެ ރިޔާސީ ކެންޑިޑޭޓަކީ ޔާމީނަށް ވިޔަސް އެމަނިކުފާނުގެ މައްޗަށް އިއްވާފައިވާ ޖަލު ހުކުމުގެ ސަބަބުން ރިޔާސީ އިންތިހާބަށް ވާދަކުރުމުގެ ފުރުސަތު މި ވަގުތަށް ވަނީ ބަންދުވެފަ އެވެ.
