ކުރިއަށް އޮތް ރިޔާސީ އިންތިހާބުގައި ވާދަކުރުމަށް ނިންމާފައިވާ ޖުމްހޫރީ ޕާޓީއާއެކު ކޯލިޝަން ހެދުމުގެ ދައުވަތު ދީފައިވާތީ، އެ ކަމާ މެދު ގޮތެއް ނިންމުމަށް އެމްއެންޕީގެ އެގްކެޓިވް ކޮމިޓީން މިއަދު ބައްދަލުވުމެއް ބާއްވަން ނިންމައިފި އެވެ.
ޖުމްހޫރީ ޕާޓީގެ ރިޔާސީ ކެންޑިޑޭޓު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހީމް ސޮއިކުރައްވައި އެމްއެންޕީއަށް ދައުވަތު ފޮނުއްވާފައިވާއިރު އެ ޕާޓީން އޮތީ ރިޔާސީ ކެންޑިޑޭޓަކު ކަނޑައަޅައި ރިޔާސީ އިންތިހާބުގައި ވާދަކުރުމަށް ނިންމައިފަ އެވެ.
އެމްއެންޕީގެ ރިޔާސީ ކެންޑިޑޭޓް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް "އަދަދު" ނޫހަށް ވިދާޅުވީ އެ ޕާޓީގައި އޮންނަ އުސޫލުގެ ތެރެއިން އެފަދަ ދައުވަތެއް ލިބުމުން ގޮތެއް ނިންމާނީ އެގްޒެކެޓިވް ކޮމިޓީގެ ބައްދަލުވުމެއް ބާއްވާފައި ކަމަށެވެ.
"މިއަދު ހަވީރު އެބަ އޮތް އެކްސްކޯގެ ބައްދަލުވުން، އެ ބައްދަލުވުމުގައި އެކްސްކޯގެ މެންބަރުން މަޝްވަރާކޮށްފައި [ގާސިމްގެ] ދައުވަތަށް ދޭނެ ޖަވާބެއް ނިންމާނީ، އެކްސްކޯއިން ނިންމާ ނިންމުމެއް އަޅުގަނޑުމެން ހާމަކުރާނެ،" އެމްއެންޕީގެ ރައީސްގެ މަގާމު ވެސް ފުރުއްވާ ނާޒިމް ވިދާޅުވި އެވެ.
އެމްއެންޕީގެ އިތުރުން އިދިކޮޅު މައި ޕާޓީ ޕީޕީއެމާއި އެމްއާރުއެމް އަދި ރިޔާސީ އިންތިހާބުގައި ވާދަކުރައްވާނެ ކަމަށް އިއުލާންކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރާއި ކުރީގެ ބަންޑާރަ ނައިބު ޑރ. މުހައްމަދު މުނައްވަރަށް ވެސް ގާސިމް ދައުވަތު ފޮނުއްވާފައިވެ އެވެ.
ޕީޕީއެމް ވެސް ވަނީ ރިޔާސީ އިންތިހާބުގައި ވާދަކުރުމަށް ނިންމައިފަ އެވެ. އަދި ގާސިމްގެ ފަހަތަށް ނާރާނެ ކަމަށް އިދިކޮޅު ކޯލިޝަނުން ވަނީ ބުނެފަ އެވެ. އެ ޕާޓީގެ ރިޔާސީ ކެންޑިޑޭޓަކީ ކުރީގެ ރައީސް އަބްދުﷲ ޔާމީނެވެ. ނަމަވެސް އެމަނިކުފާނުގެ މައްޗަށް އިއްވާފައިވާ 11 އަހަރުގެ ޖަލު ހުކުމް ދެމިއޮތްހާ ހިނދަކު އިންތިހާބުގައި ވާދަކުރުމުގެ ޝަރުތެއް ފުރިހަމައެއް ނުވެ އެވެ.
އެމްއާރުއެމުން އަދި ރިޔާސީ އިންތިހާބާ މެދު ވަކި ގޮތެއް ނިންމާފައެއް ނުވެ އެވެ. ޖޭޕީގެ އިތުރުން ވެރިކަން ކުރާ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހު ވެސް ކޯލިޝަން ހެދުމުގެ ދައުވަތު އެމްއާރުއެމަށް ފޮނުވާފައިވެ އެވެ.
ޖޭޕީއާއެކު ކޯލިޝަން ހެދުމާ މެދު މިހާތަނަށް ރަސްމީކޮށް އެއްބަސްވެވިފައި ވަނީ އެމްޑީޕީގެ އެތެރޭގައި އުުފެދިފައިވާ "ފިކުރެއްގެ ދިރުން" ފެކްޝަނާ އެކުގަ އެވެ. ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ އެ ފެކްޝަނާ އެކު މެނިފެސްޓޯ ތައްޔާރު ކުރުމުގެ މަސައްކަތް ވެސް ވަނީ ފަށައިފަ އެވެ.
