ޕީޕީއެމްގެ ރިޔާސީ ކެންޑިޑޭޓަކީ ކުރީގެ ރައީސް އަބްދުﷲ ޔާމީން ކަމަށާއި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމަށް ތާއީދު ނުކުރެވޭނެ ކަމަށް ޕީޕީއެމާއެކު ކޯލިޝަން ހަދާފައިވާ ޕީއެންސީގެ ރައީސް އަބްދުލްރަހީމް އަބްދުﷲ މިރޭ ވިދާޅުވެއްޖެ އެވެ.
ރައްޔިތުންގެ މަޖިލީހުގެ މާމިގިލި ދާއިރާގެ މެންބަރުކަން ވެސް ކުރައްވާ ގާސިމް ސޮއިކުރައްވާ ފޮނުއްވި ސިޓީއާ ގުޅޭ ގޮތުން، ޕީޕީއެމާއި ޕީއެންސީގެ އެކްޓިން ލީޑަރު އަދުރޭ ވިދާޅުވީ ގާސިމް އަދި އެހެން ޕާޓީއެއްގެ ރިޔާސީ ކެންޑިޑޭޓަށް އެ ކޯލިޝަނުން ތާއީދުނުކުރާނެ ކަމަށެވެ.
"ޕީޕީއެމް ޕީއެންސީ ކޯލިޝަނަކުން އެހެން އެއްވެސް ސިޔާސީ ޕާޓީއެއްގެ ރިޔާސީ ކެންޑިޑޭޓަކަށް ތާއީދެއް ނުކުރާނެ، މި ކޯލިޝަންގެ ރިޔާސީ ކެންޑިޑޭޓަކީ ރައީސް އަބްދުﷲ ޔާމީން،" އަދުރޭ ލިޔުއްވާފައިވެ އެވެ.
ޕީޕީއެމްގެ ރިޔާސީ ކެންޑިޑޭޓަކީ ޔާމީނަށް ވިޔަސް އެމަނިކުފާނުގެ މައްޗަށް އިއްވާފައިވާ ޖަލު ހުކުމުގެ ސަބަބުން ރިޔާސީ އިންތިހާބަށް ވާދަކުރުމުގެ ފުރުސަތު މި ވަގުތަށް ވަނީ ބަންދުވެފަ އެވެ.
ރައީސުލްޖުމްހޫރިއްޔާގެ ޝަރުތުތަކުގެ ގޮތުގައި ގާނޫނީ އަސާސީގައި އޮންނަ އެއް ޝަރުތަކީ، ޖިނާއީ ކުށެއްކުރި ކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
މިދިޔަ ޑިސެމްބަރު 25, ގައި ކްރިމިނަލް ކޯޓުން ޔާމީންގެ މައްޗަށް އިއްވި 11 އަހަރުގެ ޖަލު ހުކުމް މިހާރު އެމަނިކުފާނުގެ މިދިޔަ މަހު ވަކީލުން ހައި ކޯޓުގައި އިސްތިއުނާފުކުރި ނަމަވެސް އެ އިސްތިއުނާފު އިސްލާހުކުރުމަށް ހައި ކޯޓުން ވަނީ އެދިފަ އެވެ.
ޔާމީންގެ މައްޗަށް 11 އަހަރުގެ ހުކުމެއް އިއްވީ، ވ. އާރަށް ކުއްޔަށް ދޫކުރުގައި އެމަނިކުފާނަށް ރިޝްވަތުގެ ގޮތުގައި ފައިސާ ބަލައިގަތް ކަމާއި އެ ފައިސާ ލޯންޑަކުރެއްވި ކަމަށް ސާބިތުވާ ކަމަށް ކްރިމިނަލް ކޯޓުން ކަނޑައެޅުމަށް ފަހުގަ އެވެ.
އޭގެ އިތުރަށް ރ. ފުއްގިރި ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލައިގައި ވެސް ޔާމީންގެ މައްޗަށް ރިޝްވަތާއި މަނީ ލޯންޑަރިންގެ ދައުވާ އުފުލައި އޭގެ ޝަރީއަތް ކްރިމިނަލް ކޯޓުގަި ކުރިއަށް އެބަ ގެންދެ އެވެ،
