އިންޑަސްޓްރިއަލް އައިލެންޑް ކ. ތިލަފުށީގައި ހުރި އިމާރާތެއްގައި މިއަދު މެންދުރު ރޯވެގެން ސިފައިން ހަރަކާތްތެރިވާން ފަށައިފި އެވެ.
ސިފައިން ބުނީ ރޯވީ ގުދަނެއްގައި ކަމަށާއި އެކަން ރިޕޯޓު ކރުީ މެންދުރު 12:45 ހާއިރު ކަމަށެވެ. އެ ސަރަހައްދަށް ތިލަފުށީ ފަޔާ ސްޓޭޝަނުގެ ވެހިކަލްތައް ގޮސް އަލިފާން ނިއްވުމަށް މަސައްކަތް ކުރަމުންދާ ކަމަށް ސިފައިން ބުންޏެވެ.
ސިފައިން ބުނީ ރޯވީ ދެ ބުރިއަށް ހަދާފައި ހުރި އިމާރާތެއްގައި ކަމަށާއި އެތަނުގެ ތިރީ ބުރިއަކީ ލަކުޑި ގުދަނެއް ކަމަށާއި މަތީގައި ދިރިއުޅެނީ ބިދޭސީ މަސައްކަތްތެރިން ކަމަށެވެ.
އަލިފާން ރޯވީ ހައުސިން ޑިވެލޮޕްމަންޓުންގެ މަސައްކަތް ކުރަމުން އަންނަ ސައިޓެއްގައި އެތަނުން ދެންމެ ބުންޏެވެ. އަދި އަލިފާން ނިއްވުމުގައި އެޗްޑީސީގެ މުވައްޒަފުން ވެސް ހަރަކާތްތެރިވަމުންދާ ކަމަށް އެ ކޯޕަރޭޝަނުން ބުންޏެވެ.
ތިލަފުށީގައި ހުރި އިމާރާތުގައި އަލިފާން ރޯވެ އަނދަމުން ދަނީ. -- ފޮޓޯ: ނާޝިދު
ތިލަފުށިން އަދަދު ނޫހާ ވާހަކަ ދެއްކި ބައެއް މީހުން ބުނީ އަލިފާން ރޯވެފައިވަނީ އަމިއްލަ މީހެއްގެ އިމާރާތެއްގައި ކަމަށާއި އެތަނުގައި އެތަން ގުދަނުގައި މުދާ ގުދަކުރާ ބައެއް ވެސް، އަދި މީހުން ދިރުއުޅޭ ބައެއް ވެސް ހުންނަ ކަމަށެވެ.
"އެއްވެސް މީހަކަށް އަދި އަނިޔާއެއް ނުވޭ. ނަމަވެސް އަލިފާންގަނޑު އަދިވެސް ކޮންޓްރޯލެއް ނުވޭ،" އެ ސަރަހައްދުގައި ހުރި މީހަކު ފޯނުން ބުންޏެވެ.
ތިލަފުށީގައި ރޯވެގެން ސިފައިން ހަރަކާތްތެރިވަމުންދާއިރު ޑިސެމްބަރު، 2022 ގައި ކ. ގުޅީފަޅުގައި ހުރި ބިދޭސީ މަސައްކަތްތެރިންގެ އެކޮމަޑޭޝަން ބްލޮކުގައި ރޯވެ އެކަކު ވަނީ މަރުވެފަ އެވެ. އަދި އޭގެ ކުރިން މާލޭގައި ބިދޭސީން ދިރިއުޅޭ ތަނެއްގައި ރޯވެ 10 މީހުން ވަނީ މަރުވެފަ އެވެ.
