ކުރިއަށް އޮތް ރިޔާސީ އިންތިހާބުގައި ވާދަ ކުރާނެ ކެންޑިޑޭޓެއް ހޮވުމަށް ޖުމްހޫރީ ޕާޓީން ބާއްވާ ޕްރައިމަރީއަށް ކުރިމަތިލީ މީހުންގެ ނަންތައް މާދަމާ މެންދުރު އިއުލާނު ކުރާނެ ކަމަށް އެ ޕާޓީން މިރޭ ބުނެފި އެވެ.
ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި އެ ޕާޓީ އިސްވެ އޮވެ ކޯލިޝަނެއް ހެދުމަށް ނިންމާފައިވާއިރު، ޕްރައިމަރީގާއި ވާދަކުރުމުގެ ފުރުސަތު ހުޅުވާލާފައިވަނީ މާދަމާ މެންދުރު 12:00 އަށެވެ.
ޖޭޕީން މިރޭ ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ސްޕެޝަލް އެންވޯއީ އިލްހާމް އަހުމަދު ވިދާޅުވީ މާދަމާ މެންދުރު 12 ޖަހާއިރު ބޭފުޅަކު ކުރިމަތިލާފައިވާނަމަ އާންމު ކުރާނެ ކަމަށެވެ.
ޖޭޕީއިން ރިޔާސީ ޕްރައިމަރީއަށް ހުޅުވާލާފައިވީނަމަވެސް، ޕާޓީގެ އިސް ބޭފުޅުން އަންނަނީ ލީޑަރު ގާސިމަށް ތާއީދު ކުރައްވަމުންނެވެ. ޕާޓީގެ ރަސްމީ ޓްވިޓާ އެކައުންޓުން ވެސް ވަނީ ގާސިމަކީ ރިޔާސީ ކެންޑިޑޭޓު ކަމަށް ބުނާ ބައެއް ޓްވީޓުތައް ރީޓުވީޓު ކޮށްފަ އެވެ.
މިކަމާ ގުޅޭ ގޮތުން ނޫސްވެރިއަކު ސުވާލުކުރުމުން އިލްހާމް ވިދާޅުވީ ސިޔާސީ ލީޑަރުންގެ ތެރެއިން ރިޔާސީ ރޭޙުގައި ވާދަކުރެވޭ "ލެވެލްގައި" ހުންނެވި ހަމައެކަނި ބޭފުޅަކީ ގާސިމް ކަމަށެވެ.
"އެހެންނަމަވެސް [ވާދަކުރުމަށް] އެމަނިކުފާނު އަމިއްލައަށް ނިންމެވުމާ ނުނިންމެވުން އޮންނާނީ،" އިލްހާމް ވިދާޅުވި އެވެ.
އިލްހާމް ވިދާޅުވީ ޖޭޕީގެ އިސް ސަފުގައި ތިއްބެވި ހުރިހާ ބޭފުޅުންނަކީ ގާސިމަށް ވަރަށް ތާއީދު ކުރާ އަދި ގާސިމްގެ "ޒައާމަތަކަށް އެދިގެން ތިބި" ބޭފުޅުން ކަމަށެވެ.
ޖޭޕީގެ އަސާސީ ގަވާއިދު މީގެ ކުރިން އޮންނަ ގޮތުން ނަމަ އެ ޕާޓީގެ ލީޑަރަކީ އޮޓޯއިން އެ ޕާޓީގެ ރިޔާސީ ކެންޑިޑޭޓެވެ. އެއާއެކު ބެލެވިފައި އޮތީ ރިޔާސީ ކެންޑިޑޭޓަކީ ލީޑަރުގެ މަގާމުގައި ހުންނެވި ގާސިމް ކަަމަށެވެ.
އެހެންނަމަވެސް، ޕޭޕީން ފަހުން ވަނީ އެ ޕާޓީގެ ކައުންސިލްގެ މެދުގައި ބޭއްވޭ ޕްރައިމަރީއަކުން ރިޔާސީ ކެންޑިޑޭޓު ހޮވުމަށް ނިންމައިފަ އެވެ.
ރައީސް އިބްރާހިމް މުހައްމަދު ސޯލިހުއާ އެކު ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން ޖޭޕީން ނިންމާފައިވާއިރު ގިނަބަޔަކު ގަބޫލުކޮށްގެން ތިބީ އެ ޕާޓީގެ ރިޔާސީ ކެންޑިޑޭޓަކަށްވާނީ ޕާޓީގެ ލީޑަރު ގާސިމް އިބްރާހިމް ކަމަށެވެ. މީގެ ކުރިން ޖޭޕީއިން ރިޔާސީ އިންތިހާބުގައި 2008 އަދި 2013 ގައި ވާދަކުރި އިރުވެސް ޕްރައިމަރީއެއް ބާއްވާފައެއް ނުވެ އެވެ.
