އެކަކަށް މޯބައިލް ސިމް ނެގޭ މިންވަރު ކަނޑައެޅުމަށް ކުރަންޖެހޭ މަސައްކަތްތައް އަންނަ މެއި މަހުގެ ތެރޭގައި ފަށާނެ ކަމަށް ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ކޭމް) އިން ބުނެފި އެވެ.
މަޖިލީހުގެ އެސްއޯއީ ކޮމިޓީން އަންނަނީ ސްކޭމް ކޯލުތައް އިތުރުވާ މައްސަލަ ދިރާސާ ކުރުމަށް ކުރަމުންދާ މަސައްކަތުގެ ތެރެއިން އެ ކޮމިޓީގެ މިއަދުގެ ބައްދަލުވުމައި ޖަވާބު ދެއްވަމުން ކޭމްގެ ޗީފް އެގްޒެކެޓިވް އިލްޔާސް އަހުމަދު ވިދާޅުވީ، އެކަކަށް ނެގޭ ސިމް ކާޑުގެ މިން ކަނޑައެޅުމުގެ މަސައްކަތް އެންމެ ލަސްވެގެން މެއި މަހުގެ ތެރޭގައި ފެށިގެންދާނެ ކަމަށެވެ.
އެގޮތުން، އެކެެއްގެ ނަމުގައި ގިނަ ސިމްތަކެއް ނަގާފައިވާ ނަމަ އެ ސިމްތައް ވެރިފައިކޮށް އެ ފަރާތުގެ އައިޑެންޓިޓީ ވެރިފައި ކުރުމަށްފަހު އެ ލިސްޓުން ނަމްބަރުތައް ކެނޑުމުގެ މަސައްކަތް ވެސް މެއި މަހު ފެއްޓޭނެ ކަމަށާއި އެ މަސައްކަތަށް ހޭދަވާނެ ކަމަށް ބެލެވެނީ ތިން މަސް ދުވަހުގެ މުއްދަތެއް ކަމަށްވެސް އިލްޔާސް ވިދާޅުވި އެވެ.
"ގާތްގަނޑަކަށް ތިން މަސްދުވަހުގެ ތެރޭގައި މިހެން ގިނައިން ހުރި ނަމްބަރުތައް ހަމައަކަށް އަޅުވާލާ، އަލަށް އަޅުގަނޑުމެން ހަމަޖައްސާ އުސޫލެއް، އެއީ ކޮންމެ މީހަކަށްވެސް ވަކި ވަރަކަށް ސިމް ލިބޭ އުސޫލަށް އަމަލުކުރަން ފެށުން،" އިލްޔާސް ވިދާޅުވި އެވެ.
ސްކޭމްތައް އިތުރުވުމާ ގުޅޭގޮތުން އެސްއޯއީ ކޮމިޓީގެ އެދުމަށް ފުލުހުން ހުށަހެޅި ރިޕޯޓުގައިވެސް ފާހަގަކޮށްފައިވާ އެންމެ ބޮޑު މައްސަލައަކީ އެކެއްގެ ނަން މަތީގައި ގިނަ ސިމް ނެގޭ ގޮތަށް އޮތުމެވެ.
އެގޮތުން، ދެ ބިދޭސީއެއްގެ ނަން މަތީގައި 24،000 ސިމް ކާޑު، 12 ބިދޭސީއެއްގެ ނަމުގައި ދިރާގުގެ 38،000 ނަންބަރުގެ އިތުރުން ބައެއް ދިވެހިންގެ ނަން މަތީގައި 600 އަށް ވުރެ ގިނަ ސިމް ކާޑު ނަގައިގެން ބޭނުން ކޮށްފައިވާކަން އެ ރިޕޯޓުގައި ފާހަގަކޮށްފައިވެ އެވެ.
މީގެ އިތުރުން ޖަލުގައި ބަންދުކޮށްފައި ތިބޭ ގައިދީން އޭގެ ތެރެއިން 305 ނަންބަރެއް ބޭނުން ކުރާކަން ޔަގީން ކުރެވިފައިވާ ކަން ފުލުހުންނާ ހަވާލާދީ ކޮމިޓީގައި ފާހަގަކޮށްފައިވެ އެވެ.
