މިފްކޯގެ ހިންގުމުގެ ނިޒާމު ހަރުދަނާ ކުރުމުގެ ގޮތުން މަސައްކަތްތަކުގެ ތެރެއިން ރައްކާތެރިކަމާއެކު ވިސްލްބްލޯ ކުރެވޭނެ ނިޒާމެއް ގާއިމްކޮށްފި އެވެ.
ވިސްލްބްލޯ ކުރުމަށް އެކުލަވާލި ނިޒާމުގެ ތެރެއިން މިފްކޯއިން ވަނީ އެ ކުންފުނީގެ ވެބްސައިޓަށް ހާއްސަ ލިންކެއް އިތުރުކޮށްފަ އެވެ. އަދި ވިސްލްބްލޯވާ ހޮޓްލައިނެއް ވެސް ގާއިމްކޮށްފަ އެވެ. 7212141 ހޮޓްލައިން ނަންބަރުން ވައިބާ އަދި ވަޓްސްއެޕް މެދުވެރިކޮށް ވެސް މައްސަލަ ހުށަހެޅޭނެ ކަމަށް މިފްކޯއިން ބުނެ އެވެ.
މިފްކޯއިން ބުނީ ވިސްލްބްލޮވާ ނިޒާމުގެ ތެރެއިން ކުންފުނީގެ މުވައްޒަފުންނާއި އާންމުންނަށް ވެސް މައްސަލަ ހުށަހެޅިދާނެ ކަމަށެވެ. އަދި އެ ނިޒާމުގެ އިތުބާރު ދެމެހެއްޓުމަށްޓަކައި މައްސަލަ ހުށަހަޅާ ފަރާތްތަކުގެ މައުލޫމާތު ރައްކާތެރިކޮށް ބެލެހެއްޓުމަށް ހާއްސަ އިންތިޒާމުތަކެއް ހަމަޖައްސާފައިވާ ކަމަށް އެ ކުންފުނިން ބުނެ އެވެ.
އެގޮތުން އެ ނިޒާމަކީ ކުންފުނީގެ މެނޭޖްމަންޓުގެ ބޭރުން، އިންޓާނަލް އޮޑިޓް ޑިޕާޓްމަންޓުގެ ދަށުން ކުންފުނީގެ ބޯޑުގެ އޮޑިޓް ކޮމިޓީއަށް ރިޕޯޓުކުރެވޭ ގޮތަށް އެކުލަވާލާފައިވާ ނިޒާމެއް ކަމަށް މިފްކޯއިން ބުނެ އެވެ. ވިސްލްބްލޮވާ ނިޒާމު މެދުވެރިކޮށް މައްސަލަ ހުށަހަޅާއިރު، ވީހާވެސް ތަފްސީލުކޮށް ހެއްކާއެކު މައްސަލަ ހުށަހެޅުމަށް މިފްކޯގެ އިންޓާނަލް އޮޑިޓް ޑިޕާޓްމަންޓުން ވަނީ އެދިފަ އެވެ.
މިފްކޯއިން އެކުލަވާލި ވިސްލްބްލޮވާ ނިޒާމުގެ ދަށުން މައްސަލައެއް ރިޕޯޓުކުރާ ފަރާތުގެ ވަނަވަރު ނޭނގޭގޮތަށް ނުވަތަ އެނޮނިމަސްކޮށް ވެސް ރިޕޯޓުކުރެވޭނެ އެވެ.
މިފްކޯއިން ބުނީ ވިސްލްބްލޯ ކުރާ ނިޒާމަކީ ކުންފުނީގެ މުދަލާއި ފައިސާ އަދި އެހެނިހެން ވަސީލަތްތައް ބަލަހައްޓާ ބޭނުންކުރުމާއި، ކުންފުނީގެ އޮޕަރޭޝަނުގައި ކުންފުންޏަށް ގެއްލުންވާނެހެން އުސޫލުތަކާއި ހިލާފަށް އެތެރޭގައި ހިނގާ ކަންކަން ކުންފުނީގެ އިންޓާނަލް އޮޑިޓާއި ބޯޑަށް އެންގުމަށް ބޭނުންވާ ފަރާތްތަކަށް އެކަން ކުރުމަށް މަގުފަހުކޮށްދިނުމަށްޓަކައި އުފައްދާފައިވާ ހާއްސަ ނިޒާމެއް ކަމަށެވެ.
