ބޮޑީބޯޑިން އަށް ޝައުގުވެރިވާ ޒުވާން ބޮޑީބޯޑަރުން އުފެއްދުމުގެ މަގުސަދުގައި މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މުޅި ރާއްޖެއަށް ހުޅުވާލައިގެން "ހުދު ފޮނު"ގެ ނަމުގައި ހާއްސަ ޕްރޮގްރާމެއް ތައާރަފްކޮށްފި އެވެ.
އެމްބީބީއޭގެ ވައިޑީޕީ ޕްރޮގްރާމް "ހުދު ފޮނު" ތައާރަފްކޮށްފައިވަނީ ދާދި ފަހުން ބޭއްވި އެ އެސޯސިއޭޝަންގެ އަހަރީ އާންމު ޖަލްސާގަ އެވެ. މި ޖަލްސާގައި ވަނީ މި އަހަރު ބޮޑީބޯޑިން ކުރިއަރުވުމަށް އެސޯސިއޭޝަނުން ކުރިއަށްގެންދިޔުމަށް ހަމަޖެހިފައިވާ ހަރަކާތްތަކުގެ މައުލޫމާތު ހިއްސާކޮށްފަ އެވެ.
އެމްބީބީއޭ އިން މި އަހަރު ކުރިއަށްގެންދާ އެންމެ ބޮޑު އެއް ހަރަކާތަކީ ރާއްޖޭގެ އަށް ރަށެއްގައި ކުރިއަށްގެންދިޔުމަށް ނިންމާފައިވާ "ހުދު ފޮނު" ވައިޑީޕީ ޕްރޮގްރާމް އެވެ.
"ހުދު ފޮނު" ޕްރޮގްރާމް ފަށާނީ މެއި މަހުގަ އެވެ. އޭގެ ފަހުން ނޮވެމްބަރު މަހާ ހަމަ އަށް އަށް ރަށެއްގައި މި ޕްރޮގްރާމް ކުރިއަށްދާނެ އެވެ. ފުރަތަމަ ހަރަކާތް ށ. ކަނޑިތީމުގައި އޮންނާނީ މެއި މަހުގެ 18-20 އަށެވެ. އޭގެ ފަހުން ނ. ޅޮހީގައި މެއި މަހުގެ 25-27 އަށް އޮންނައިރު، ބ. މާޅޮހުގައި އޮންނާނީ ޖޫން މަހުގެ 1-3 އަށެވެ.
މި އަހަރުގެ ގައުމީ ލީގުގެ މުބާރާތެއް ބާއްވަން ހަމަޖެހިފައިވާ ފުވައްމުލަކުގައި "ހުދު ފޮނު" ޕްރޮގްރާމް ކުރިއަށްދާނީ 16-18 ޖޫން އަށެވެ. އޭގެ ފަހުން މާލޭގައި އޮންނަ ބައިނަލްއަގްވާމީ މުބާރާތްކަމަށްވާ "މޯލްޑިވްސް ޕްރޯ" ގެ ކުރިން މާލޭގައި ޖުލައި 28 އަދި 29 އަށް "ހުދު ފޮނު" ޕްރޮގްރާމް ކުރިއަށްދާނެ އެވެ.
"ހުދު ފޮނު" ޕްރޮގްރާމްގެ ފަހު ތިން ހަރަކާތަކީ ކ. ތުލުސްދޫ އާއި ދ. ކުޑަހުވަދޫ އަދި ތ. ހިރިލަންދޫގައި އޮންނަ ހަރަކާތެވެ. ތުލުސްދޫ ގައި އޮންނާނީ ސެޕްޓެމްބަރު 3-5 އަކަށެވެ. ކުޑަހުވަދޫ ގައި އޮކްޓޯބަރު 26-28 އަށް މި ޕްރޮގްރާމް އޮންނައިރު ފަހު ހަރަކާތް ހިރިލަންދޫގައި އޮންނަނީ ނޮވެމްބަރު 9-11 އަށެވެ.
ބޮޑީބޯޑިންގެ ހުނަރު ކުރިއެރުވުމަށް މި ދިޔަ އަހަރު އެމްބީބީއޭ އިން ހާއްސަ ވައިޑީޕީ ކްލިނިކްތަކެއް ކުރިއަށްގެންދިޔަ އެވެ. މިގޮތުން "މޯލްޑިވްސް ޕްރޯ" ގައި ވާދަކުރި ދުނިޔޭގެ މަޝްހޫރު ޗެމްޕިއަނުންނާ އެކު މާލޭގައި ހާއްސަ ކްލިނިކްތަކެއް ކުރިއަށްގެންދިޔަ އެވެ.
އެ ގޮތުން ދުނިޔޭގެ ކުރީގެ ފިރިހެން ޗެމްޕިއަން ކަމަށްވާ ފްރާންސްގެ އަމައުރީ ލެވާން ވަނީ ފިރިހެން ޖުނިއާ ކުޅުންތެރިންނަށް ކްލިނިކެއް ކުރިއަށް ގެންގޮސްފަ އެވެ. އަންހެން ޗެމްޕިއަން ނޭމަރާ އާއިއެކު ދުނިޔޭގެ މަތީ ފަންތީގެ އަންހެން ބޯޑަރުން ޖޫނިއާ އަންހެން ކުދިންނަށް ހާއްސަ ކްލާސްތަކެއް ހިންގިއިރު، ޖޫނިއާ ގައުމީ ޓީމަށް ދުނިޔޭގެ ޗެމްޕިއަން ޑޭވިޑް ހުބާޑް ވަނީ ހާއްސަ ކްލިނިކެއް ހިންގާފަ އެވެ.
