ކ. ތުލުސްދޫގައި މިހާރު ކުރިއަށްދާ އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ވޯލްޑް ޓުއާ އިވެންޓެއް ކަމަށްވާ މޯލްޑިވްސް ޕްރޯ 2026 ގެ ރައިސިން ސީރީސް އިވެންޓްގެ ކުއާޓާ ފައިނަލުން ރާއްޖޭގެ ހަތަރު އެތުލީޓުން ޖާގަ ހޯދައިފި އެވެ.
އެމްބީބީއޭ އިން ރާއްޖޭގައި އައިބީސީ ލެވަލްގެ އިވެންޓެއް ބޭއްވުމަށް ދެކުނު ހުވަފެނުގައި ކުލަޖެހުނީ މީގެ ހަތަރު އަަހަރު ކުރިން، 2022 ވަަނަ އަހަރު އެވެ. އަދި، އޭގެ ފަހުން ދެ ފަހަރު، ޖުމްލަ އެކު ތިން ފަހަރު މިހާތަނަށް މި އިވެންޓް ރާއްޖޭގައި ހޯސްޓްކުރިއިރު، އަހަރުން އަހަރަށް ރާއްޖޭގެ ބޮޑީބޯޑަރުން ދުނިޔޭގެ ލެވަލް އެތުލީޓުންނަށް ޗެެލެންޖު ވެސް ދިނެވެ. ދުނިޔޭގެ ރޭންކިންގެ އެތައް ދަރަޖައެއް ކުރީގައި ވެސް އޮތެވެ.
މި ފަހަރުގެ މޯލްޑިވްސް ޕްރޯ އިވެންޓް، މީގެ ހަ ދުވަސް ކުރިން، މި މަހު 12 ވަނަ ދުވަހު ފެށިއިރު، މިއީ، ރާޅުގަނޑު ނޫން ސަރަަހެއްދެއްގައި މި މުބާރާތް ކުރިއަށްދާ ފުރަތަމަ ފަހަރެވެ.
މި ފަހަރުގެ އިވެންޓްގަައި، ފިރިހެން ރައިސިން ސީރީސް ޑިވިޝަން، އަންހެން ޕްރައިމް ސީރީސް ޑިވިޝަން، ފިރިހެން ޖޫނިއާގެ ރައިސިން ސީރީސް ޑިވިޝަން ކުރިއަށް ދެ އެވެ.
ތުލުސްދޫގެ މަޝްހޫރު ސާފް ޕޮއިންޓް، "ކޯކްސް" ރާޅުގަނޑުގައި ކުރިއަށްދާ މޯލްޑިވްސް ޕްރޯ މި ފަހަރުގެ މުބާރާތުގެ، ރައިސިން ސީރީސްގެ ކުއާޓާ ފައިނަލުން ރާއްޖޭގެ ހަތަރު އެތުލީޓުން ދަތުރު ކޮށްފައިވެ އެވެ.
އެ ހަތަރު އެތުލީޓުންނަކީ، ރާއްޖޭގެ އެންމެ ކާމިޔާބު ބޮޑީބީޑަރު، އަލީ ހުޝްރުވާން (ކުޑަ އައްޔަ) އާއި މިދިޔަ އަހަރުގެ ގައުމީ ބަނޑުފިލާ ޗެލެންޖުގެ މެންސް އޯޕަންސް ޗެމްޕިއަން، އަޝްރަފް ހަސަން އަދި، މިދިޔަ އަހަރުގެ ބޮޑީބޯޑިން ލީގުގެ ޗެމްޕިއަން، އާމިން އުމަރު މޫސާ އަދި، ހުނަރުވެރި ބޮޑީބޯޑަރު، ނޫހު މުހައްމަދު ދުނައިމް އިރުޝާދް އެވެ.
ނޫހު ކުއާޓާ އިން ފުރުަސަތު ހޯދީ ތިން ވަނަ ބުރުގެ ހީޓް އެކެއްގައި ބްރަޗްމީ ތާރިކް ބަލިކޮށްގެންނެވެ. ނޫހަށް 13.50 ޕޮއިންޓް ލިބުުނުއިރު، ތާރިކަށް ހޯދުނީ 6.75 ޕޮއިންޓެވެ. ކުޑަ އައްޔަ އަށް ތިން ވަނަ ބުރުގެ ހީޓު ދޭއްގައި ވާދަކޮށް، 13.50 ޕޮއިންޓް ލިބުނުއިރު، އޭނާއާ ވާދަކުރި ދާވޫދު ފަޒީހަށް ހަމަކުރެވުނީ 11.90 ޕޮއިންޓެވެ. އަޝްރަފް ކުއާޓާ އިން ފުރުސަތު ހޯދީ ރާއްޖޭގެ ތަޖުރިބާކާރު ބޮޑީބޯޑަރު، އަލީ ޖާވިދު (ޖާއްޓެ) ބަލިކޮށްފަ އެވެ. އަޝްރަފަށް 14.00 ޕޮއިންޓް ލިބުނުއިރު، ޖާއްޓެ ވަނީ 11.25 ޕޮއިންޓް ހޯދައިފަ އެވެ. އަދި، އާމިން ވަނީ ހީޓު ހަތެއްގައި، އިޔަން އަހުމަދުގެ މައްޗަށް ކުރިހޯދައިފަ އެވެ. އެ ގޮތުން، އާމިން އަށް 16.50 ޕޮއިންޓް ލިބުނުއިރު، އިޔަން ވަނީ 12.70 ޕޮއިންޓް ހޯދައިފަ އެވެ.
ކުއާޓާ ފައިނަލުގެ ހީޓުތައް މިއަދު ކުރިއަށްދާއިރު، ހީޓު އެކެއްގައި ކުޑަ އައްޔަ ވާދަކުރާނީ ނޫހުއާ އެވެ. ހީޓު ތިނެއްގައި އަޝްރަފް ވާދަކުރަނީ ކެނަރީ އައިލެންޑްގެ އާރްމީޑޭ ސޮލިވެރެސްއާ އެވެ. އަދި، ހީޓު ހަތަރެއްގައި އާމިން ނުކުންނާނީ ފްރާންސްގެ ހޫގޯ ނައުޑޭއާ ދެކޮޅަށެވެ.
