މި އަހަރު ރޯދަ މަހުގެ ފުރަތަމަ ދުވަހަކީ މި މަހުގެ 23 ވާ ބުރާސްފަތި ދުވަސް ކަމުގައި އިސްލާމިކް މިނިސްޓްރީއިން ކަނޑައަޅައި އިއުލާންކޮށްފި އެވެ.
އެ މިނިސްޓްރީއިން މިރޭ ކުރި ޓުވީޓެއްގައި ބުނެފައިވަނީ މި ހިނގާ ހިޖުރީ ގޮތުން 1444 ވަނަ އަހަރުގެ ރޯދަ މަހުގެ ފުރަތަމަ ދުވަހަކީ މާޗު 23 ކަމަށެވެ.
މިގޮތަށް އެ މިނިސްޓްރީއިން ނިންމީ ރޯދަ މަހުގެ ހަނދު މިރޭ އިރުއޮއްސޭއިރު ރާއްޖޭގެ އެއްވެސް ސަރަހައްދަކަށް އަދި އިސްލާމީ އެއްވެސް ގައުމަކަށް ވެސް ފެނިފައިނުވާކަން އިތުބާރުހުރި ފަލަކީ ހިސާބުތަކުން ކަށަވަރުވާތީ އެވެ.
ބުރާސްފަތި ދުވަހު ރޯދަމަސް ފެށޭއިރު އެ ދުވަހު ސަރުކާރުގެ ހުރިހާ އޮފީހެއް ބަންދުވާނެ އެވެ. ރޯދަމަހު ސަރުކާރުގެ އޮފީސްތައް ހުޅުވާނީ ހެނދުނު 9:00 އިން މެންދުރު 1:00 އަށެވެ.
މީގެއިތުރުން، ރޯދަ މަހު ކެއިން ބުއިމުގެ ހިދުމަތްދޭ ތަންތަން ހުޅުވާފައި ބެހެއްޓޭނީ ހަވީރު 5:30 އިން ފެށިގެން ދަންވަރު 3:00 ޖަހަންދެން ކަމަށާއި ރޯދަ މަހަށްފަހު ޝައްވާލު މަހުގެ ފުރަތަމަ ހަފްތާގައި ކެފޭ ރެސްޓޯރެންޓް ފަދަ ތަންތަން ހުޅުވާފައި ބެހެއްޓޭނީ ފަތިހު 4:30 އިން ފެށިގެން ދަންވަރު 3:00 އަށް ކަމަށް އިކޮނޮމިކް މިނިސްޓްރީއިން ވަނީ ކަނޑައަޅާފަ އެވެ.
