ރިޔާސީ އިންތިހާބާ ގުޅޭ މަޝްވަރާތައް ފަށައިގެން ކުރިއަށް ދާއިރު، ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ސްޕެޝަލް އެންވޯއީއަކަށް ރައްޔިތުންގެ މަޖިލީހުގެ ކުރީގެ މެމްބަރު އިލްހާމް އަހުމަދު މިއަދު އައްޔަންކޮށްފި އެވެ.
އެ ނިންމުން ނިންމީ މިއަދު މެންދުރު ފަހު ބޭއްވި ޖޭޕީގެ ކައުންސިލު ބައްދަލުވުމުގަ އެވެ. އެންވޯއީގެ މަގާމަށް އިލްހާމް ހަމަޖެއްސުމާ އެކު، ކުރިން އޭނާ ހުންނެވި ގާސިމްގެ އެޑްވައިޒަރުގެ މަގާމުން ވަނީ އިސްތިއުފާ ދެއްވައިފަ އެވެ.
އިންތިހާބަށް ވަމުންދާ ތައްޔާރީތަކުގެ ތެރެއިން ޖޭޕީން ކުރަމުންދާ މަޝްވަރާތަކުގައި އިލްހާމް ގެންދަވަނީ އިސް ދައުރެއް އަދާކުރައްވަމުންނެވެ. އެގޮތުން، ދެ ފެކްޝަނަކަށް ބެހިފައި އޮތް އެމްޑީޕީގެ "ފިކުރެއްގެ ދިރުން" ފެކްޝަން ލީޑު ކުރައްވާ އެ ޕާޓީގެ ރައީސް މުހައްމަދު ނަޝީދުއާ ވެސް އޭނާ ބައްދަލުކުރައްވައި މަޝްވަރާ ކުރެއްވި އެވެ.
އިލްހާމްއަކީ ރައްޔިތުންގެ މަޖިލީހުގައި ދެ ދައުރުގައި މެމްބަރުކަން ކުރެއްވި، އަދި ޑީއާރުޕީ، ޕީޕީއެމް، ޖޭޕީގެ ނައިބު ލީޑަރުކަން ވެސް ކުރެއްވި ބޭފުޅެކެވެ. އޭގެ އިތުރުން އެފްއޭއެމްގެ ރައީސްކަން ވެސް ކުރައްވާފައިވެ އެވެ.
މަޖިލިސް 18 ގައި އޭނާ ދަނގެތީ ދާއިރާގެ ގޮނޑި ވެސް ފުރުއްވި އެވެ. ރައީސް ޔާމީންގެ ވެރިކަމާ ދެކޮޅަށް ޕީޕީއެމްގެ ތެރެއިން ތެދުވި 12 މެމްބަރުންގެ ތެރޭގައި އިލްހާމް ހިމެނެ އެވެ. ޕީޕީއެމްގެ މެމްބަރެއްގެ ގޮތުގައި ހުންނަވައި އޭރުގެ މަޖިލިސް ރައީސް މަގާމުން ވަކިކުރުމަށް ހުށަހެޅި ގަރާރުގައި ކުރި ސޮއި އަނބުރާ ނުނެގުމުން އޭނާ އެ ޕާޓީން ވަކިކުރި އެވެ.
އަދި، އެކަމާ ގުޅިގެން އޭނާގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަން (އީސީ) އިން ނިންމި އެވެ. އެއީ ޕާޓީން ވަކިވެއްޖެނަމަ ނުވަތަ ފްލޯ ކްރޮސް ކޮށްފިނަމަ ގޮނޑި ގެއްލޭނެ ކަމަށް ސުޕްރީމް ކޯޓުން ހުކުމް ކުރުމުންނވެ.
ނަމަވެސް، އޭރު އިލްހާމް ވިދާޅުވީ އޭނާ ޕީޕީއެމުން ވަކިވާން ހުށަހެޅީ އެ ހުކުމް ކުރުމުގެ ކުރިން ކަމަށެވެ. އަދި، އެ މައްސަލާގައި 2018 ގައި އިލްހާމްގެ ގޮނޑި ނުގެއްލޭ ކަމަށް ސުޕްރީމް ކޯޓުން ހުކުމްކުރި އެވެ.
މި އަހަރުގެ ރިޔާސީ އިންތިހާބު ސެޕްޓެމްބަރު 9 ގައި ބާއްވާއިރު އެހެން ޕާޓީތަކާއެކު ކޯލިޝަން ހެދުމުގެ މަސައްކަތް ރައީސް އިބްރާހިމް މުހައްމަދު ސޯލިހު ކުރައްވަމުން ގެންދަވާއިރު، އެ މަނިކުފާނުގެ ސަރުކާރުގެ ބައިވެރިއެއްގެ ގޮތުގައި ޖޭޕީ އޮވެ، އިންތިހާބުގައި އެ ޕާޓީ ވަކިން ވާދަކުރަން ނިންމުމަށް ފަހު އެހެން ޕާޓީތަކާއެކު ކޯލިޝަން ހެދުމުގެ މަސައްކަތް ވެސް ގެންދަނީ ކުރަމުންނެވެ.
