ފުވައްމުލަކު އެއާޕޯޓަށް ބާރުބޮޑުވެ, ފުލް ކެޕޭސިޓީގައި ފްލައިޓް ޖެއްސޭނެ ގޮތެއް ހޯދުމުގެ މަސައްކަތް ފަށައިފި އެވެ.
ފުވައްމުލައް ސިޓީގެ މޭޔަރު އިސްމާއިލް ރަފީގް 'އަދަދު'އަށް ވިދާޅުވީ, މޯލްޑިވިއަން ފްލައިޓުން ޖާގަ ހޯދުމަކީ ރައްޔިތުންނަށް ދިމާވާ ގޮންޖެހުމެއް ކަމަށެވެ.
ފުވައްމުލަކު އެއާޕޯޓުގައި ދުވާލަކަށް 3-4 ފްލައިޓް މިހާރު ވެސް ޖައްސަމުންދާއިރު, ފްލައިޓުން ޖާގަ ހޯދުމަކީ އުނދަގޫ ކަމެކެވެ. މޭޔަރު ވިދާޅުވި ގޮތުގައި ކުރިން ޖާގައިގެ ދަތިކަން ކުރިމަތިވަނީ, ޗުއްޓީ ދުވަސްތަކާ ދިމާކޮށެވެ. ނަމަވެސް މިހާރު ކޮންމެ އިރަކަށް ބެލިއަސް ފްލައިޓުން ޖާގަ ހޯދުން ފަސޭހަ ނޫން ކަމަށް އޭނާ ވިދާޅުވި އެވެ.
"އެނގޭ ތެލަށް އަންނަ ބަދަލާ އެކު އަގުތައް މައްޗަށް ދާކަން. އަޅުގަނޑުމެންނަށް ގަބޫލު ކުރެވޭ [ގޮތުގައި] ޑޮމެސްޓިކް ފްލައިޓުތަކުގައި އާންމު މީހަކަށް ދަތުރުކުރުމަށް ބުރައަކަށް ވާވަރަށް އަގު ބޮޑުވުމަކީ ވަރަށް ބޮޑު ކަންބޮޑުވުމެއް," ޖާގައިގެ ދަތިކަމާ އެކު ފްލައިޓު ޓިކެޓުގެ އަގު ބޮޑުވުމަކީ ވެސް ކަންބޮޑުވުމެއްކަން ފަހަގަކުރައްވަމުން މޭޔަރު ވިދާޅުވި އެވެ.
ފުވައްމުލައް އެއާޕޯޓުގައި މިހާރު އޮންނަނީ 1.2 ކިލޯމީޓަރުގެ ރަންވޭ އެކެވެ. ނަމަވެސް މިފަހުން ރާއްޖޭގެ އެއާލައިންތަކުން ގެނައި ފްލައިޓްތައް ޖައްސަން މަދުވެގެން 1.5 ކިލޯ މީޓަރުގެ ދިގު ރަންވޭއެއް ބޭނުންވެ އެވެ. އެހެންކަމުން ރާއްޖޭގައި އެންމެ ފުޅާ ދާއިރާއެއްގައި އޮަޕަރޭޓްކުރާ މޯލްޑިވިއަންއަށް ވެސް ފުލް ކެޕޭސިޓީގައި ފުވައްމުލަކުގައި ނުޖެއްސެ އެވެ.
ފުވައްމުލަކު އެއާޕޯޓުގެ ރަންވޭ ބޮޑުކުރަން ޖެހިފައި އޮތްއިރު, މިދިޔަ މާޗް މަހު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ފުވައްމުލަކަށް ކުރެއްވި ދަތުރުފުޅުގައި ވަނީ, އެއާޕޯޓު ބޮޑުކޮށްދެއްވާނެ ކަމަށް ވިދާޅުވެފަ އެވެ. އެކަމަށް ބޭނުންވާ ޓެކްނިކަލް ސާވޭ މިހާރު ވަނީ ކޮށް ނިންމާލާފަ އެވެ.
މޭޔަރު ވިދާޅުވީ, ސާވޭކޮށްފައިވީ ނަމަވެސް ރަންވޭ ބޮޑު ކުރަނީ ކޮން ގޮތަކަށްތޯ ނިމިފައި ނުވާ ކަމަށެވެ. އަދި މިހާރު ފުވައްމުކުގައި ޖައްސާ ޑެޝް މަރުކާގެ ބޯޓުތައް ފޭސް އައުޓްވުމުގެ ކުރިން ރަންވޭގެ މައްސަލައަށް ހައްލެއް ލިބިގެންދާނެ ކަމަށް އޭނާ ވިދާޅުވި އެވެ.
"ކައުންސިލުން ވެސް ވަރަށް ބޮޑު އިސްކަމެއްދޭ ކަމެއް މިއީ. މިހާރު އޮތީ 1.2 ކިލޯމީޓަރުގެ ރަންވޭއެއް. މަދުވެގެން 1.5 ކިލޯމީޓަރަށް އެކްސްޓެންޑްކޮށްގެން ފަހުގެ ބޯޓުތައް ޖެއްސޭނީ," މޭޔަރު ވިދާޅުވި އެވެ.
އޭނާ އިތުރަށް ވިދާޅުވީ ރަންވޭ ބޮޑު ނުކުރެވޭ ނަމަ ދަތުރުފަތުރު ކުރުމުގައި ރަށުގެ ރައްޔިތުންނާއި, ރަށަށް އަންނަ ފަތުުރުވެރިންނަށް އުނދަގޫތަކާ ކުރިމަތިލާން ޖެހޭނެ ކަމަށެވެ. އަދި މިހާރު ޝެޑިއުލް ފްލައިޓުތަކުން ޖާގަ ނުލިބުމުގެ ސަބަބުން އެ އުނދަގޫތައް މިހާރު ވެސް އަންނަމުންދާ ކަމަށް ވިދާޅުވި އެވެ.
