އަންނަ ހަފުތާގެ ބުރާސްފަތި ދުވަހު ފެށޭ މި އަހަރުގެ ރޯދަމަހަށް ހާއްސަކޮށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ފިޔާ، އަލުވި އަދި ބިހުގެ އަގު ހެޔޮކޮށްފި އެވެ.
އެ ކުންފުނިން މިއަދު ރޯދައަށް ހާއްސަ އަގުތައް ހިއްސާކޮށްފައިވާއިރު މިހާރު ދެން އަލުވި ކިލޯއެއް ލިބޭނީ 11ރ. އަށެވެ. އަލުވި ބަސްދާއެއް ލިބޭ އަގު ވަނީ 240ރ. ކުޑަކޮށްފަ އެވެ. މިދިޔަ އަހަރު ރޯދަ މަހު އަލުވި ބަސްތާއެއްގެ އަގު އުޅުނީ 300ރ. އަށެވެ.
ފިޔާ ކިލޯއެއްގެ އަގު 9ރ. ހުރި އިރު، ދެން ފިޔާ ބަސްތާއެއް ލިބޭނީ 160ރ. އަށެވެ. މިދިޔަ އަހަރު ރޯދައަށް ފިޔާ ބަސްތާއެއްވެސް ލިބުނީ 300ރ. އަށެވެ.
އެސްޓީއޯއިން މިއަދު ހިއްސާކުރި އަގުތަކަށް ބަލާއިރު ރޯދަމަހަށް ބިހެއް ލިބޭނީ 1.75ރ. އަށެވެ. ބިސް ކޭހެއްގެ އަގު ވަނީ މިދިޔަ އަހަރު ހުރި 300ރ. ގެ ބަދަލުގައި 280ރ. އަށް ވެއްޓިފަ އެވެ.
މި މަހު ފުރަތަމަ ދުވަހު އެސްޓީއޯއިން ބުނީ ރޯދަމަހު ހުސްވުމެއްނެތި މި ތިން ބާވަތް އެ ކުންފުނީގެ ފިހާރަތަކުން ލިބޭނެ ކަމަށެވެ. އެގޮތުން ރޯދައަށް ހާއްސަކޮށް ހަ ޝިޕްމަންޓެއް ގެނައުމަށް އެ ކުންފުނިން އޮތީ ނިންމައިފަ އެވެ.
އެސްޓީއޯއިން އިތުރަށް ބުނީ އަތޮޅުތެރޭގެ 11 ސަރަހަދެއްގައި ގާއިމްކޮށްފައިވާ އެސްޓީއޯގެ 11 ފިހާރައަކަށް ފިޔާ ބިސް އަދި އަލުވި ފޮނުވާނެ ކަަމަށެވެ. އަދި، އެ ތަކެތި ސަރަހައްދީ އެހެން ރަށްރަށަށް ފޯރުކޮށްދިނުމުގައި އެސްޓީއޯއިން އެހީތެރިވާނެ ކަމަށް ވެސް އެ ކުންފުނިން ބުނެ އެވެެ.
