އަންނަ ސެޕްޓެމްބަރު މަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީ ކޯލިޝަނުން އެއްވެސް ޕާޓީއެއްގެ ފަހަތަށް ނާރާނެ ކަމުގެ ޔަގީންކަން ޕީއެންސީގެ ރައީސް އަބްދުއްރަހީމް އަބްދުﷲ ދެއްވައިފި އެވެ.
ޕީޕީއެމްގެ އޮފީހުގައި ރޭ ބޭއްވި ޖަލްސާއެއްގައި ވާހަކަދައްކަވަމުން އިދިކޮޅު ކޯލިޝަން ލީޑުކުރައްވަމުން ގެންދަވާ އަބްދުއްރަހީމް ވިދާޅުވީ، މި ދެތިން ދުވަހު ޕީޕީއެމްއާ ބެހޭގޮތުން އެކި ނޫސްތަކުން ފަލަ ސުރުހީތަކުގައި އެކި ވާހަކަދައްކަމުން ގެންދާ ކަމަށާއި އެއާ ގުޅިގެން ރަށްރަށުގައި ތިބި އަދި މާލޭގައި ތިބި އިދިކޮޅު ސަޕޯޓަރުންގެ ހިތްތަކުގައި އެކި ސުވާލުތައް އުފެދެމުންދާކަން އެނގިވަޑައިގަންނަވާ ކަމަށެވެ.
އަދި، މި ދަނޑިވަޅުގައި އިދިކޮޅުގެ ހުރިހާ ސަޕޯޓަރުންވެސް، ޕީޕީއެމް އިން ދެން ވެރިކަމަށް އަންނާނީ ކުރީގެ ރައީސް އަބްދުﷲ ޔާމީނާ އެކީގައި ކަމަށް ހިތްތަކުގައި ކަށަވަރުކަން ބޭއްވުމަށް އަބްދުއްރަހީމް އިލްތިމާސްކުރެއްވި އެވެ.
"ޕީޕީއެމް ރިޔާސީ އިންތިހާބުގާ ވާދަނުކުރާނެއޭ ވިދާޅުވާ ބޭފުޅުންނަށް އަޅުގަނޑު ދަންނަވާލާނީ ތި ހުވަފެން ދުށުން ހުއްޓަވާލައްވާށޭ.. ޕީޕީއެމް އަކީ ރާއްޖޭގައި އޮތް އެންމެ ބޮޑު ޕާޓީ، ޕީޕީއެމް ނާރާނެ އެހެން އެއްވެސް ޕާޓީއެއްގެ ފަހަތަކަށް، ޕީޕީއެމް ނާރާނެ އެހެން އެއްވެސް ޕާޓީއެއްގެ ފަހަތަކަށް."
އަބްދުއްރަހީމް އިތުރަށް ވިދާޅުވީ ޕީޕީއެމް އެނބުރި އަންނާނީ، ރިޝްވަތާއި މަނީލޯންޑަރިންގެ ކުށް ސާބިތުވެ މިހާރު 11 އަހަރުގެ ޖަލު ހުކުމެއް ތަންފީޒުކުރަމުން ގެންދަވާ، އެ ޕާޓީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީނާ އެކީގައި ކަމަށެވެ.
އަބްދުއްރަހީމްގެ މި ރައްދުތައް އަމާޒުކުރައްވާފައި މިވަނީ އަންގާރަ ދުވަހުގެ ރޭ ޖުމްހުރީ ޕާޓީއިން އަންނަ ރިޔާސީ އިންތިހާބުގައި މިހާރުގެ ސަރުކާރާ ވަކިން، އެ ޕާޓީން އިސްވެ ހަދާ ކޯލިޝަނަކާއެކު ވާދަކުރުމަށް ނިންމުމާއެކު ފެތުރިފައިވާ އެކި އަޑުތަކަށެވެ. ޔާމީން މިނިވަން ނުވެ، ރިޔާސީ އިންތިހާބުގައި ވާދަނުކުރެވޭ ހާލަތެއްގައި އިދިކޮޅުން ޖޭޕީއާއެކު ގުޅުމުގެ ފުރުސަތު ބޮޑުކަމަށް ދަނީ ބުނަމުންނެވެ.
އެގޮތުން އިދިކޮޅަށް ފުރަތަމަ ބުރު ގެއްލިއްޖެ ހާލަތެއްގައި ޖޭޕީއަކީ 'ޗޮއިސް' އެއް ކަމަށް އަބްދުއްރަހީމް ލީޑުކުރައްވާ ޕީއެންސީގެ ނައިބު ރައީސް އާދަމް ޝަރީފް ވެސް ވަނީ އެއްބަސްވެފަ އެވެ.
"ރައީސް ޔާމީން ތަކުރާރުކޮށް ވިދާޅުވި ވާހަކައެއް އޮންނާނެ، ޕީޕީއެމްގެ ރިޔާސީ ކެންޑިޑޭޓަކު ހުންނާނޭ، އެއީ ރައީސް އަބްދުﷲ ޔާމީން އަބްދުލްގައްޔޫމް،" އަބްދުއްރަހީމް ވިދާޅުވި އެވެ.
އަދި، ރާއްޖޭގެ ސިޔާސީ މަޝްރަހު މިހާރު ބަދަލުވަމުން މިދާ ގޮތުން ޔާމީން މިނިވަން ވުމުގެ މަގު ފަހިވަމުންދާ ކަމަށް އަބްދުއްރަހީމް ވިދާޅުވި އެވެ.
މިދިޔަ ޑިސެމްބަރު 25 ގައި ކްރިމިނަލް ކޯޓުން ޔާމީންގެ މައްޗަށް އިއްވި 11 އަހަރުގެ ޖަލު ހުކުމް މިހާރު އެމަނިކުފާނުގެ މިދިޔަ މަހު ވަކީލުން ހައި ކޯޓުގައި އިސްތިއުނާފުކުރި ނަމަވެސް އެ އިސްތިއުނާފު އިސްލާހުކުރުމަށް ހައި ކޯޓުން ވަނީ އެދިފަ އެވެ. މިހާތަނަށް އިސްލާހުކޮށްފައިވާ އިސްތިއުނާފީ މައްސަލަ ޔާމީނުގެ ވަކީލުން ހައި ކޯޓަށް ހުށަހަޅާފައި ނުވާއިރު މީގެ ކުރިން ޔާމީންގެ ވަކީލުން ބުނަމުން ދިޔައީ މި ހިނގާ މާޗު މަހުގެ ތެރޭގައި ޔާމީން މިނިވަން ވާނެ ކަމުގެ ޔަގީންކަން އޮތްކަމަށެވެ.
