އޭޑީކޭގެ ދަށުން ހިންގާ ޝާފިޔާ އިންސްޓިޓިއުޓުން ފެށުމަށް ތައްޔާރުވެފައިވާ ނަރުހުން ތަމްރީނު ކުރުމުގެ ކޯހުން ދޭ ސްކޮލާޝިޕުގެ ތިން ފުރުސަތު ހެލްތު މިނިސްރީއަށް ދީފި އެވެ.
އޭޑީކޭ ހޮސްޕިޓަލުގައި ހުންނަ ޝާފިޔާ އިންސްޓިޓިއުޓުގައި މިއަދު ބޭއްވި ރަސްމިއްޔާތެއްގައި އެ ސްކޮލާޝިޕުތައް މިނިސްޓަރީއަށް އެރުވީ ޝާފިޔާ އިންސްޓިޓިއުޓުގެ ޑިރެކްޓަރު ޑރ. ޒިޔާން އެވެ. މިނިސްޓަރީގެ ފަރާތުން ހަވާލުވެލެއްވީ އެ މިނިސްޓަރީގެ ޕާމަނަންޓު ސެކެޓްރީ، އާއިޝަތު ސާމިޔާ އެވެ.
އެ ސްކޮލާޝިޕަކީ ސިއްހީ ދާއިރާއިން މީހުން ތަމްރީނު ކުރުމަށް އޭޑިކޭއިން ކުރަމުން އަންނަ މަސައްކަތުގެ ތެރެއިން ފެށުމަށް ހަމަޖެހިފައިވާ އެޑްވާންސްޑް ޑިޕްލޮމާ އިން ނާސިން ކޯހުގެ ތެރެއިން ދޭ ސްކޮލާޝިޕުތަކެކެވެ. އެ ކޯހުގައި ބައިވެރިވުމަށް އެދި ހުށަހަޅާ ފަރާތްތަކުގެ ތެރެއިން ޖުމުލަ އަށް ދަރިވަރަކަށް ސްކޮލާޝިޕުގެ ފުރުސަތު ލިބޭނެ އެވެ. އެއީ ޝާފިޔާ އިންސްޓިޓިއުޓުން ދޭ ފަސް ފުރުސަތާއި މިއަދު ހެލްތު މިނިސްޓަރީއަށް އެރުވި ތިން ފުރުސަތެވެ.
ކޯހުގައި ބައިވެރިވުމަށް ފުރަންޖެހޭ އެޕްލިކޭޝަން ފޯމު، އޭޑީކޭގެ ވެބްސައިޓުގައްޔާއި އެ ހޮސްޕިޓަލުގެ އެޑްމިން އޮފީހުން ލިބެން ހުންނާނެ އެވެ. ފޯމު ފުރަހަމަ ކުރުމަށްފަހު ހުށަހަޅަންޖެހޭ ލިޔުންތަކާ އެކު މެއިލް ކުރާނީ sih@adkhospital.com އަށެވެ.
ކޯހުގައި ބައިވެރިވުމުގެ ޝަރުތުތައް
- ޖީސީއީ އޯލެވެލްގެ ތިން މާއްދާއިން ދަށްވެގެން ސީ ފާސް ލިބިފައިވުމާ އެކު އޭލެވެލް ދެ މާއްދާއިން ފާސްވެފައިވުން
- ނުވަތަ މޯލްޑިވްސް ނާސިން ކައުންސިލުން ގަބޫލުކުރާ ލެވެލް ހަތަރެއްގެ ސަނަދެއް ހާސިލުކޮށްފައި ވުމާ އެކު ޖީސީއޯލެވެލްގެ އިނގިރޭސި މާއްދާއިން ދަށްވެގެން ސީ ފާހެއް ލިބިފައިވުން ނުވަތަ އެ ފެންވަރުގެ އެހެން ސެޓިފިކެޓެއް އިނގިރޭސި މާއްދާއިން ހޯދައިފައިވުން
މިމަހުގެ ނިޔަލަށް ބައިވެރިވުމަށް އެދި ހުށަހެޅުމުގެ ފުރުސަތު ހުޅުވާލައިފައިވާ އެ ކޯހުގައި ސްކޮލާޝިޕުގެދަށުން ކިޔެވުމުގެ ފުރުސަތު ލިބޭނީ ބައިވެރިވުމަށް އެދި ހުށަހަޅާ ފަރާތްތަކުގެ ތެރެއިން އެންމެ ފެންވަރު ރަނގަޅު ކުދިންނަށެވެ. ސްކޮލާޝިޕު ލިބޭ ދަރިވަރުންނަށް ކޯސް ފުރިހަމަ ކުރުމުން އޭޑީކޭއިން ވަޒީފާގެ ފުރުސަތު ކަށަވަރު ވާނެ އެވެ.
މިއީ ރާއްޖޭގައި ސިއްހީ ހިދުމަތްދޭ ހޮސްޕިޓަލަކުން މިފަދަ ކޯހެއް ހިންގާ ފުރަތަމަ ފަހަރެވެ. އެ ކޯހުގެ ފުރަތަމަ އިންޓޭކަށް 15 ކުދިންނާއި 20 ކުދިންނާ ދެމެދުގެ އަދަދަކަށް ކުދިން ނަގާނެ އެވެ.
ތިން އަހަރު ދުވަހުގެ މުއްދަތަކަށް ކުރިއަށް ގެންދާ އެ ކޯހުގެ އަގަކީ 96،500ރ. (ނުވަދިހަ ހަހާސް ފައްސަތޭކަ ރުފިޔާ) އެވެ. އެއީ މަހެއްގެ މައްޗަށް 2680ރ. (ދެހާސް ހަސަތޭކަ އަށްޑިހަ ރުފިޔާ) އެވެ. ފަސޭހައިން ފައިސާ ދެއްކޭނެ އިންތިޒާމެއް ހަމަޖެއްސުމަށްޓަކައި އޭޑީކޭއިން ވަނީ މަހުން މަހަށް ބަހާލައިގެން ވެސް ފައިސާ ދެއްކޭނެ އިންތިޒާމު ހަމަޖައްސައިފަ އެވެ.
އޭޑީކޭގައި ގާއިމުކޮށްފައިވާ ޝާފިޔާ އިންސްޓިޓިއުޓުގައި ދަރިވަރުންނަށް ކިޔަވައިދިނުމަށް އެންމެ ފަހުގެ ޒަމާނީ ވަސީލަތްތައް ހުރެ އެވެ. އެތަނުގައި ތިން ކިލާހާއި ދެ ހޯލުގެ އިތުރުން ސްކިލް ލެބަކާއި ސިމިއުލޭޝަން ލެބެއް ހުރެ އެވެ. އޭގެއިތުރުން އެތަނުގައި ސިއްހީ އެކި ކަންކަމާ ގުޅޭ ފޮތްތައް ހުންނަ ޑިޖިޓަލް ކުތުބުޚާނާއެއް ވެސް ހުރެ އެވެ.
އޭޑީކޭއިން ބުނީ ނަރުހުން ތަމްރީނު ކުރުމުގެ ކޯހެއް ޝާފިޔާ އިންސްޓިޓިއުޓުން ކުރިއަށް ގެންދިއުމަށް ނިންމީ އެ ދާއިރާއަށް ޝައުގުވެރިވާ ދިވެހިންނަށް އެ ފުރުސަތު ފަހި ކޮށްދިނުމުގެ މަގުސަދުގައި ކަމަށެވެ.
އަދި މި ކޯހުގެ ސަބަބުން ނާސިންގެ ދާއިރާގައި ދިވެހި ނަރުހުންގެ ނިސްބަތް އިތުރުވެގެންދާނެ ކަމަށް ގަބޫލުކުރާ ކަމަށް އެ ހޮސްޕިޓަލުން ބުނެ އެވެ.
ޝާފިޔާ އިންސްޓިޓިއުޓުން މިހާރުވެސް އިމާޖެންސީ މެޑިކަލް ޓެކްނީޝަނުން ތަމްރީނު ކުރުމުގެ ކޯހަކާއި ފަސްޓު އެއިޑު އަދި އެޑްވާންސް ލައިފް ސަޕޯޓު ފަދަ ޕްރޮފެޝަނަލް ޑިވެލޮޕްމަންޓު ޕުރޮގުރާމުތައް ހިންގަމުންދެ އެވެ.
