ރިޝްވަތު ހިފުމާއި މަނީ ލޯންޑަރިންގެ މައްސަލައެއްގައި ކުރީގެ ރައީސް އަބްދުﷲ ޔާމީން 3،413،230 ޑޮލަރު (53 މިލިއަން ރުފިޔާ) ދައްކަން ކުރި އަމުރު، އެމަނިކުފާނުގެ ފަރާތުން ހައި ކޯޓުގައި މިއަދު އިސްތިއުނާފުކޮށްފި އެވެ.
ހައި ކޯޓުގެ މީޑިއާ އޮފިޝަލް "އަދަދު" އަށް މިކަން ކަށަވަރުކޮށްދީފައިވާއިރު، ޔާމީނުގެ ވަކީލުންގެ ޓީމުން މި މައްސަލަ ހައި ކޯޓުގައި އިސްތިއުނާފުކޮށްފައިވަނީ އިއްޔެ އެވެ.
ޖޫރިމަނާގެ ފައިސާ ދެއްކުމަށް ކްރިމިނަލް ކޯޓުން އަމުރު ނެރުމާއެކުވެސް ޔާމީނުގެ ވަކީލުންގެ ޓީމުން ވަނީ އެ އަމުރާމެދު ކަންބޮޑުވުން ފާޅުކޮށްފަ އެވެ. އެގޮތުން ޔާމީނުގެ އިސް ވަކީލު ޑރ. މުހައްމަދު ޖަމީލު އަހުމަދު މި ނޫހާ ވާހަކަ ދައްކަވަމުން ވިދާޅުވީ އެއީ ސިޔާސީ ހުކުމެއް ކަމަށެެވެ.
"މިއީ ހަމަ ސަރުކާރުން، އިބްރާހިމް މުހައްމަދު ސޯލިހު ވިދާޅުވެގެން އެގޮތައް ކަންތައް ކުރައްވަން [ކުރި އަމުރެއް]،" ޖަމީލް ވިދާޅުވި އެވެ.
ވ. އާރަށް ކުއްޔަށް ދިން މައްސަލާގައި ދައުލަތުން، މަނީލޯންޑަރިން އާއި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން، ޔާމީންގެ ފަރާތުން އަނބުރާ ހޯދުމަށް އެދިފައިވަނީ ލޯންޑާކުރި ކަމަށް ތުހުމަތުކުރާ އެއް މިލިއަން ޑޮލަރާއި އެ ފައިސާ އިންވެސްޓްކޮށްގެން ޔާމީނަށް ލިބުނު ފައިދާ އެވެ.
އާރަށް ކުއްޔަށް ދިން މައްސަލައިގައި ރިޝްވަތު ހިފުމާއި މަނީލޯންޑަރިންގެ ކުށް ސާބިތުވެ ޔާމީންގެ މައްޗަށް ކުރީ 11 އަހަރުގެ ޖަލު ހުކުމެކެވެ. އެ ހުކުމް ޔާމީންގެ މައްޗަށް އިއްވީ މިދިޔަ ޑިސެމްބަރު 25، 2022 ގަ އެވެ. ނަަމަވެސް 53 މިލިއަން ހަ މަސް ތެރޭ ދެއްކުމަށް ކްރިމިނަލް ކޯޓުން އަމުރުކުރީ މިދިޔަ ފެބްރުއަރީ 26، ގަ އެވެ.
ޔާމީންގެ މައްޗަށް ކުރި 11 އަހަރުގެ ޖަލު ހުކުމް ފެބްރުއަރީ 21، ގައި ޔާމީނުގެ ވަކީލުން ވަނީ ހައި ކޯޓުގަައި އިސްތިއުނާފުކޮށްފަ އެވެ. ނަމަވެސް އެ އިސްތިއުނާފީ މައްސަލަ އިސްލާހު ކުރަން ހައި ކޯޓުން ވަނީ ޔާމީނުގެ ވަކީލުންގެ ޓީމަށް އަންގާފަ އެވެ.
އިދިކޮޅުގެ ރިޔާސީ ޓިކެޓު ޔާމީނަށް އަރުވާފައިވީ ނަމަވެސް ހުކުމުގެ ސަބަބުން މިވަގުތު ޔާމީނަށް މި އަހަރުގެ ރިޔާސީ އިންތިހާބުގައި ވާދައެއް ނުކުރެއްވޭނެ އެވެ. ސަބަބަކީ ރައީސުލްޖުމްހޫރިއްޔާގެ ޝަރުތުތަކުގެ ގޮތުގައި ގާނޫނީ އަސާސީގައި ބަޔާންކޮށްފައި އޮންނަ އެއް ޝަރުތަކީ، ޖިނާއީ ކުށެއް ކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވާން ޖެހުމެވެ.
