ސިޔާސީ ޕާޓީތަކަށް ވަންނަ ފޯމު ހުށަހެޅުން އޮންލައިން ޕޯޓަލްއެއް މެދުވެރިކޮށް ކުރެވޭނެ ގޮތް ހަމަޖައްސައި ކަރުދާސް ފޯމުތައް ރައްކާކުރުމުގެ ޒިންމާ ޕާޓީތަކަށް މަތިކޮށްފި އެވެ.
ސިޔާސީ ޕާޓީތަކުގެ ގަވާއިދަށް އަލަށް ގެނެވުނު އިސްލާހުގައި ބުނެފައިވަނީ ދެން ސިޔާސީ ޕާޓީތަކަށް ވަންނަ ފޯމު އެކަމަށް ހާއްސަ "ސިމެދަ" ޕޯޓަލް މެދުވެރިކޮށް ހުށަހެޅޭނެ ކަމަށެވެ. އަދި އެ ޕޯޓަލް މެދުވެރިކޮށް ހުށަނޭޅޭ ހާލަތެއްގައި ކުރިއެކޭ އެއްގޮތައް އިލެކްޝަންސް ކޮމިޝަން (އީސީ)އަށް ފޯމު ހުށަހެޅޭނެ ކަމަށްވެސް އެ އިސްލާހުގައި ބުނެފައިވެ އެވެ.
މީގެއިތުރުން މިހާރު އީސީ އިން ރައްކާކުރާ ކަރުދާސް ފޯމުތައް ރައްކާކުރުމުގެ ޒިންމާ ދެން ނަގަންޖެހޭނީ ސިޔާސީ ޕާޓީތަކުން ކަމަށާއި، ފޯމެއް ހުށަހަޅާ ތާރީހުން ފެށިގެން 10 އަހަރު ވަންދެން އެ ފޯމު ރައްކާކުރަން ވާނެ ކަމަށްވެސް މިއަދު ގެޒެޓު ކުރި އިސްލާހުގައި ބުނެފައިވެ އެވެ.
އޮންލައިންކޮށް ފޯމު ހުށަހެޅޭ ގޮތަށް ބަަދަލު ކުރި ނަމަވެސް އީސީއިން ކަނޑައާޅާފައިވާ ހުރިހާ މައުލޫމާތެއް ފޯމުގައި ހުންނަންވާނެ ކަމަށާއި ވަކިން ހާއްސަކޮށް އިނގިލީގެ ނިޝާން އީސީއިން ގަބޫލުކުރެވޭ ފެންވަރަކަށް ފެންނަން ހުންނަންވާނެ ކަމަށްވެސް އިސްލާހުގައި ފާހަގަކޮށްފައިވެ އެވެ.
މިކަމާ ގުޅިގެން "އަދަދު" އަށް މައުލޫމާތު ދެއްވަމުން އީސީގެ ނައިބު ރައީސް އިސްމާއިލް ހަބީބް ވިދާޅުވީ، އޮންލައިން ޕޯޓަލްއެއް މެދުވެރިކޮށް ފޯމު ހުށަހަޅާގޮތަށް ބަދަލު ގެނައި ނަމަވެސް، ޕާޓީތަކުން ފޯމު ފުރުމުގައި ކުރަންޖެހޭ މަސައްކަތަށާއި ހުށަހަޅަންޖެހޭ މައުލޫމާތަށް ބަދަލެއް ނާންނާނެ ކަމަށެވެ.
ފޯމުތައް ރައްކާކުރުން ސިޔާސީ ޕާޓީތަކަށް ހަވާލުކުރުމާ ބެހޭގޮތުން ހަބީބު ވިދާޅުވީ އޭގެ އެންމެ ބޮޑު އެއް ސަބަބަކީ ޖާގައިގެ ދަތިކަން ކަމަށެވެ.
"ޖާގައިގެ ދަތިކަން އެބަހުރި ކޮމިޝަނުގައި (ފޯމުތައް ރައްކާކުރުމަށް)، ގިނަ ރޫމްތައް ފުރިފަ ހުރީ ސިޔާސީ ޕާޓީތަކުގެ ފޯމުތަކުން،" ހަބީބު ވިދާޅުވި އެވެ.
