ކ. ގުރައިދޫ ދާއިރާގެ ބައި-އިލެކްޝަނުގައި އެމްޑީޕީގެ ޓިކެޓުގައި ވާދަކުރާ ކެނޑިޑޭޓަކު ހޮވުމަށް ބާއްވާ ޕްރައިމަރީއަށް ހަތަރު މީހަކު ކުރިމަތިލައިފި އެވެ.
މިދިޔަ މަހުގެ 27 ވަނަ ދުވަހު ހުޅުވާލި ފުރުސަތުގައި ކުރިމަތިލާފައިވާ މީހުންގެ ނަންތައް އެމްޑީޕީން މިއަދު ވަނީ އާންމުކޮށްފަަ އެވެ. އެއީ:
- މުހައްމަދު މުސްތަފާ – ވިވިޑް / ކ. މާފުށި
- ސަލްމާން ރަޝީދު – މާފަރިވާގެ / ކ. މާފުށި
- އިބްރާހިމް ޝާޒް – ހ. ތާޅަފިލިގެ / މާލެ
- އަބްދުﷲ ސައީދު – ވެލި / ކ. ގުރައިދޫ
އެމްޑީޕީގެ މީގެ ކުރިން ބުނީ ކެންޑިޑޭޑަކު ހޮވުމަށް ބާއްވާ ޕްރައިމަރީ އޮންނާނީ މި މަހުގެ 11 ވަނަ ދުވަހު އެވެ.
މި ދާއިރާގެ ގޮނޑިއަށް އެމްޑީޕީއިން ވާދަކުރުމަށް ނިންމާ ޕްްރައިމަރީ އިއުލާނުކޮށްފައިވާއިރު، މިދިޔަ ތިން ދައުރުގައި ވެސް އެ ގޮނޑި އެމްޑީޕީއަށް ކާމިޔާބުކުރެވިފައެއް ނުވެ އެވެ.
ގުރައިދޫ ދާއިރާގެ ރައްޔިތުންގެ މަޖިލީހުގެ ގޮނޑި ހުސްވީ އެ ދާއިރާގެ މެންބަރު ކަމުގައި ހުންނެވި އިބްރާހިމް ރިޒާ, 55, މި މަހުގެ 23 ގައި އަވަހާރަވުމާ ގުޅިގެންނެވެ. ރިޒާ އަވަހާރަވީ ކެންސަރުގެ އާލާސްކަންފުޅުގައި މެލޭޝިއާގައި ފަރުވާ ހޯއްދަވަމުން ގެންދަވަނިކޮށެވެ.
ޕީޕީއެމްއަށް ނިސްބަތްވާ ރިޒާ އަކީ 18 ވަނަ ރައްޔިތުންގެ މަޖިލީހުގެ މެމްބަރެއްގެ ހައިސިއްޔަތުން ޖުޑީޝަލް ސާވިސް ކޮމިޝަންގެ މެމްބަރުކަން އަދާކުރެއްވި މެންބަރެވެ. އަދި އޭރު އެ ކޮމިޝަންގެ ނައިބު ރައީސްކަން ވެސް އޭނާ ކުރެއްވި އެވެ.
ގާނޫނުއަސާސީގެ 78 މާއްދާގައި ބުނެފައިވާ ގޮތުން މެންބަރެއްގެ ގޮނޑި ހުސްްވާ ތާރީހުން ފެށިގެން ދެ މަސް ދުވަހުގެ ތެރޭގައި އެ ދާއިރާއެއްގެ ބައި އިލެކްޝަން ބާއްވަންޖެހެ އެވެ. ގުރައިދޫ ދާއިރާގައި ހިމެނޭ ރަށްތަކަކީ، ގުރައިދޫގެ އިތުރުން މާފުއްޓާއި ގުޅި އެވެ.
