ޖުމްހޫރީ ޕާޓީން ކުރިއަށް އޮތް ރިޔާސީ އިންތިހާބަށް ނުކުންނަން އެ ޕާޓީގެ ކޮންގްރެސް އިން ލަފާ ދީފި އެވެ.
ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީން ވަކިން ވާދަކުރުމަށް ނުވަތަ އެ ޕާޓީ އިސްވެ އޮވެ އުފައްދާ ކޯލިޝަނެއް ވާދަކުރުމަށް ލަފާދޭން ގަރާރެއް ކޮންގްރެސްއަށް ހުށަހެޅުއްވީ ރައްޔިތުންގެ މަޖިލިހުގެ ތިނަދޫ ދެކުނު ދާއިރާގެ ކުރީގެ މެމްބަރު އަބްދުﷲ އަހުމަދު (އަބުޅޯ) އެވެ.
އެ ގަރާރަށް ބަހުސް ކުރުމަށްފަހު ކޮންގްރެސްގެ އިއްތިފާގުން މިރޭ ވަނީ ގަރާރު ފާސްކޮށްފަ އެވެ.
އެހެން ނަމަވެސް, މިއީ ޖޭޕީގެ ކައުންސިލަށް, އެ ޕާޓީގެ ކޮންގްރެސް އިން ދޭ ލަފަ އެކެވެ. ގަރާރު ކޮންގްރެސް އިން ފާސްކުރި ނަމަވެސް, އެއަށް އަމަލު ކުރުން ކައުންސިލުން ފާސްނުކުރާހާ ހިނދަކު ޕާޓީގެ މައްޗަށް ގަރާރު ލާޒިމެއް ނުވާނެ ކަމަށް އެ ޕާޓީން ވަނީ މީގެ ކުރިން ބުނެފަ އެވެ.
ޖޭޕީން ރިޔާސީ އިންތިހާބަށް ކުރިމަތިލުމަށް ކޮންގްރެސްއިން ލަފާ ދީފައިވާއިރު, ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް، ރައީސް އިބްރާހިމް މުހައްމަދު ސޯލިހާ އެކު ކޯލިޝަން ހެދުމުގެ އުއްމީދު ބޮޑު ކަމަށް ރައީސް ސޯލިހުގެ ފަޅިން ވަނީ ބުނެފަ އެވެ.
އަދި އެކަމުގެ މަޝްވަރާއަށް ރައީސް ސޯލިހުގެ ވަފްދެއް ވަނީ ގާސިމާ މި ހަފްތާގެ ތެރޭގައި ބައްދަލުކުރައްވައިފަ އެވެ. ނަމަވެސް ކޯލިޝަން ހެދުމާ މެދު މިހާތަނަށް ޕާޓީއިން އެއްވެސް ގޮތެއް ނިންމާފައިނުވެ އެވެ. އެ ނިންމުން ނިންމާނީ ކޮންގްރެސްއަށް ފަހު ޕާޓީގެ ކައުންސިލުން ކަމަށް ބެލެވެ އެވެ.
ރިޔާސީ އިންތިހާބަށް ނުކުތުމާމެދު ޖުމްހޫރީ ޕާޓީގެ ކޮންގްރެސްގައި ބަހުސް ކޮށްފައިވާއިރު, ބަހުސް ކުރެއްވި ގިނަ މެންބަރުން ތާއިދު ކުރެއްވީ ގާސިމް އިންތިހާބަށް ކުރިމަތިލުމަށެވެ. ނަމަވެސް ގަރާރު ޗެއާ ކުރެއްވި ޖޭޕީގެ ލީޑަރު ގާސިމް, އެކަމާ ބެހޭގޮތުން ދެކެވަޑައިގަންންވާ ގޮތެއް ހާމައެއް ނުކުރައްވަ އެވެ.
ގާސިމް އިބްރާހިމް ވަނީ މީގެ ކުރިން 2008 ވަނަ އަހަރާއި 2013 ވަނަ އަހަރުގެ ރިޔާސީ އިންތިހާބުގައި ވާދަ ކުރައްވައިފަ އެވެ. ރާއްޖޭގެ ބޮޑެތި ސިޔާސީ ޕާޓީތަކުން ވެސް ތިބީ ޖުމްހޫރީ ޕާޓީން ރިޔާސީ އިންތިހާބާ މެދު ނިންމާ ގޮތެއްގެ އިންތިޒާރުގަ އެވެ.
އިލެކްޝަންސްގެ ދަފުތަރުގައިވާ ގޮތުން ޖުމްހޫރީ ޕާޓީއަކީ ރާއްޖޭގެ ތިންވަނައަށް އެންމެ މެންބަރުން ގިނަ ޕާޓީ އެވެ. މިދިޔަ އަހަރުގެ ޑިސެންބަރުގެ ނިޔަލަށް އެ ޕާޓީގެ ދަފުތަރުގައި 17,913 މެންބަރުން ތިއްބެވެ.
