ޖުމްހޫރީ ޕާޓީގެ ލީޑަރު ކަމަށް، މިދިޔަ 15 އަހަރު ވެސް އެ މަގާމުގައި ހުންނެވި، ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު ގާސިމް އިބްރާހީމް އަނެއްކާ ވެސް އިންތިހާބުވެއްޖެ އެވެ.
މިއަދު ކުރިއަށްދާ ކޮންގްރެސްގައި ވަނީ، ގާސިމް ފިޔަވައި އެހެން ބޭފުޅަކު އެ މަގާމަށް ކުރިމަތިލާފައި ނުވާތީ އިންތިހާބުވެއްޖެ ކަމަށް ނިންމައިފަ އެވެ. މަގާމަކަށް އެންމެ މީހަކު ކުރިމަތިލައިފި ނަމަ، އިންތިހާބަކާ ނުލައި މަގާމަށް ހޮވޭ ގޮތަށް އަސާސީ ގަވާއިދު ބޭއްވުމަށް ވެސް ކޮންގްރެސްގައި މިއަދު ނިންމި އެވެ.
ގާސިމްގެ އިތުރުން، އެންމެ މީހަކު ކުރިމަތިލައިގެން އޮޓެމެޓިކުން ޖޭޕީގެ އިސް މަގާމަށް އިންތިހާބުވި ބޭފުޅުންނަކީ ޒުވާނުންގެ ލީގުގެ ރައީސް ކަމަށް އަބްދުﷲ ޔާމީން، ޒުވާނުންގެ ލީގުގެ ނައިބު ރައީސް ކަމަށް ޝުއައިބު ޝިފާޒު ޝަރީފް އަދި އަންހެނުންގެ ލީގުގެ ސެކްރެޓަރީ ކަމަށް އައިޝަތު ޝޫޒާ އަހުމަދެވެ.
ޖޭޕީން މީގެ ކުރިން 2008 އަދި 2013 ގެ ރިޔާސީ އިންތިހާބުގައި ވެސް ވާދަކުރި އިރު، އެ ޕާޓީގެ ރިޔާސީ ކެންޑިޑޭޓަކީ ޕާޓީގެ ލީޑަރުގެ މަގާމުގައި ވެސް ހުންނެވީ ގާސިމެވެ. ކުރިން، 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. އަދި 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
ދެ އިންތިހާބުގައި ވެސް ދެ ވަަނަ ބުރަށް ދެވޭ ވަރަށް ގާސިމަށް ވޯޓު ނުލިބުނު ނަމަވެސް އެ ދެ ފަހަރު ވެސް އިންތިހާބު ކާމިޔާބުކުރީ ގާސިމްގެ ތާއީދު އޮތް ކެންޑިޑޭޓެވެ. ދެ ވަނަ ބުރުގައި ގާސިމް ތާއީދުކުރެއްވީ، ފުރަތަމަ ބުރުގައި ދެ ވަނައަށް އެންމެ ގިނަ ވޯޓު ލިބޭ ކެންޑިޑޭޓަށެވެ. ރައީސް މުހައްމަދު ނަޝީދާއި ރައީސް އަބްދުﷲ ޔާމީން ވެސް ސަރުކާރު އެކުލަވާލީ ޖޭޕީއަށް ހިއްސާއެއްދޭ ގޮތަށެވެ.
އެންމެ ފަހުން ބޭއްވި 2018 ވަނަ އަހަރު ރިޔާސީ އިންތިހާބު އޮތް އިރު، ގާސިމް ހިމެނޭހެން އޭރުގެ އިދިކޮޅު ހުރިހާ ލީޑަރުން ތިބީ ޖަލު ހުކުމެއްގައި ނުވަތަ ހުކުމެއް ނެތި ބަންދުގަ އެވެ. އެހެންވެ ގާސިމްގެ ޖޭޕީގެ އިތުރަށް އެމްއާރުއެމާއި އަދާލަތު ޕާޓީން ތާއީދުކުރީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށެވެ.
ރައީސް ސޯލިހު ބޭނުންފުޅުވަނީ ކުރިއަށް އޮތް ރިޔާސީ އިންތިހާބުގައި ވެސް މިހާރު ކޯލިޝަންގައި ހިމެނޭ ޕާޓީތަކާއެކު ކޯލިޝަން އުފައްދައިގެން ވާދަކުރުމަށެވެ. ޖޭޕީ އާއި އަދާލަތު ޕާޓީ އާއި އެމްއާރުއެމަށް ވެސް އެމަނިކުފާނު ދައުވަތު ފޮނުވި އިރު، މިހާތަނަށް ދައުވަތު ގަބޫލުކުރީ އަދާލަތުން އެކަންޏެވެ.
އިއްޔެ ފެށި ޖޭޕީގެ ކޮންގްރެސްގައި، ކުރިއަށް އޮތް ރިޔާސީ އިންތިހާބުގައި ޖޭޕީން ވާދަކުރަން ނިންމުމަށް އެ ޕާޓީގެ ކައުންސިލަށް ކޮންގްރެސް އިން ލަފާ ދިނުމަށް ގޮވާލާ ގަރާރެއްގެ ބަހުސެކެވެ. ޖޭޕީން ވާދަކުރަން އަދި ނުކުރަން ނިންމުމުގެ ބާރު ވެސް ދީފައި އޮންނަނީ ޕާޓީގެ ކައުންސިލަށެވެ.
