ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީން ވަކިން ވާދަކުރުމަށް ނުވަތަ އެ ޕާޓީ އިސްވެ އޮވެ އުފައްދާ ކޯލިޝަނެއް ވާދަކުރުމަށް ލަފާދޭން ގަރާރެއް ކޮންގްރެސްއަށް ހުށަހަޅައިފި އެވެ.
ޖުމްހޫރީ ޕާޓީގެ ގައުމީ ކޮންގްރެސް ބޭއްވުމަށް ހަމަޖެހިފައި ވަނީ މި ހަފުތާ ބަންދުގަ އެވެ. އެ ކޮންގްރެސްގައި ޕާޓީގެ އަސާސީ ގަވާއިދު އިސްލާހު ކުރުމުގެ މަސައްކަތާއި ޕާޓީގެ އެކި ގުނަންތަކަށާއި މަގާމުތަކަށް މީހުން އިންތިހާބު ކުރުން އޮންނާނެ އެވެ.
މާދަމާ ފަށާ ކޮންގްރެސްއާ ގުޅޭ ގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ލީޑަރުގެ އެޑްވައިޒަރު އިލްހާމް އަހުމަދު ވިދާޅުވީ ރައްޔިތުންގެ މަޖިލިހުގެ ތިނަދޫ ދެކުނު ދާއިރާގެ ކުރީގެ މެމްބަރު އަބްދުﷲ އަހުމަދު (އަބުޅޯ) ހުށަހަޅާފައިވާ އެ ގަރާރާމެދު މަޝްވަރާކޮށް ކޮންގްރެސްގައި ގޮތެއް ނިންމާނެ ކަމަށެވެ.
ގާސިމް ޗެއާާކުރައްވާ މި ގަރާރުގެ ބަހުސާ މެދު ގޮތެއް ނިންމުން ތާވަލް ކޮށްފައިވަނީ ހޮނިހިރު ދުވަހުގެ މެންދުރު ފަހަށެވެ.
މިކަމާ ގުޅިގެން "އަދަދު"އިން އިލްހާމް އާ ސުވާލު ކުރުމުން ވިދާޅުވީ މި ގަރާރަކީ ހަމައެކަނި ކައުންސިލަށް ދޭ ލަފައެއް ކަމަށެވެ. އަދި ގޮތް ނިންމާނީ ޕާޓީގެ ކައުންސިލުން ކަމަށް ވިދާޅުވި އެވެ.
"ކޮންގްރެސްގައި މި ނިންމާނީ ރިކޮމެންޑޭޝަނެއްގެ ގޮތުގައި މި ކަން ޕާޓީގެ ކައުންސިލަށް ހުށަހަޅަން ނުވަތަ ނާޅަން، ގޮތް ނިންމުން އޮންނާނީ ކައުންސިލުން އޭގެ ފަހުގައި،" އިލްހާމް ވިދާޅުވި އެވެ.
މި ގަރާރު ކޮންގްރެސް އިން ފާސްކުރި ނަމަވެސް, އެއަށް އަމަލު ކުރުން ކައުންސިލުން ފާސްނުކުރާހާ ހިނދަކު ޕާޓީގެ މައްޗަށް ގަރާރު ލާޒިމެއް ނުވާނެ އެވެ.
ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް، ރައީސް އިބްރާހިމް މުހައްމަދު ސޯލިހާ އެކު ކޯލިޝަން ހެދުމުގެ އުއްމީދު ބޮޑު ކަމަށް ރައީސް ސޯލިހުގެ ފަޅިން ވަނީ ބުނެފަ އެވެ.
އަދި އެކަމުގެ މަޝްވަރާއަށް ރައީސް ސޯލިހުގެ ވަފްދެއް ވަނީ ގާސިމާ މި ހަފްތާގެ ތެރޭގައި ބައްދަލުކުރައްވައިފަ އެވެ.
ނަމަވެސް ކޯލިޝަން ހެދުމާ މެދު މިހާތަނަށް ޕާޓީއިން އެއްވެސް ގޮތެއް ނިންމާފައިނުވެ އެވެ. އެ ނިންމުން ނިންމާނީ ކޮންގްރެސްއަށް ފަހު ޕާޓީގެ ކައުންސިލުން ކަމަށް ބެލެވެ އެވެ.
ގާސިމް އިބްރާހިމް ވަނީ މީގެ ކުރިން 2008 ވަނަ އަހަރާއި 2013 ވަނަ އަހަރުގެ ރިޔާސީ އިންތިހާބުގައި ވާދަ ކުރައްވައިފަ އެވެ. ރާއްޖޭގެ ބޮޑެތި ސިޔާސީ ޕާޓީތަކުން ވެސް ތިބީ ޖުމްހޫރީ ޕާޓީން ރިޔާސީ އިންތިހާބާ މެދު ނިންމާ ގޮތެއްގެ އިންތިޒާރުގަ އެވެ.
އިލެކްޝަންސްގެ ދަފުތަރުގައިވާ ގޮތުން ޖުމްހޫރީ ޕާޓީއަކީ ރާއްޖޭގެ ތިންވަނައަށް އެންމެ މެންބަރުން ގިނަ ޕާޓީ އެވެ. މިދިޔަ އަހަރުގެ ޑިސެންބަރުގެ ނިޔަލަށް އެ ޕާޓީގެ ދަފުތަރުގައި 17913 (ސަތާރަހާސް ނުވަސަތޭކަ ތޭރަ) މެންބަރުން ތިއްބެވެ.
