ކުރިއަށް އޮތް ރިޔާސީ އިންތިހާބުގައި އިދިކޮޅު ޕީޕީއެމް އާއެކު ކޯލިޝަން ހެދުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެމްޑީއޭގެ ރައީސް، މީދޫ ދާއިރާގެ މެންބަރު އަހުމަދު ސިޔާމްގެ އިތުރުން ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ދައުވަތު ދެއްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ދަރަނި ރީސްޓްރަކްޗާ ކުރުމަށް ގޮވާލައި ހުށަހަޅާފައިވާ ގަރާރަށް ވާހަކަ ދައްކަވަމުން ސަރުކާރަށް ވަރަށް ބޮޑަށް ފާޑުވިދާޅުވަމުން މަހިބަދޫ ދާއިރާގެ މެންބަރު އަހުމަދު ތޯރިގް ވިދާޅުވީ ރައީސް އިބްރާހިމް މުހައްމަދު ސޯލިހު ވެރިކަމުން ފައިބައިވަޑައިގަންނަވާއިރު ރާއްޖެ އޮންނާނީ ބަނގުރޫޓުވެފައި ކަމަށެވެ.
އެއާއެކު މިއަދު އެންމެ ދެރަވެ ހިތާމަ ކުރަނީ ނަޝީދުގެ "ފިކުރެއްގެ ދިރުން" ޓީމުންނާއި ޖޭޕީގެ ލީޑަރު ގާސިމް އިބްރާހިމް ވެސް މި ވެރިކަން ގެނައުމަށް މަސައްކަތް ކުރުމުން ކަމަށް އޭނާ ވިދާޅުވި އެވެ.
"[މާފަށް އެދެން ޖެހޭ]އިގްތިސޯދީ ކަންކަން މެނޭޖުކުރަން ނޭނގޭ ބޭފުޅަކު ދިވެހިރާއްޖޭގެ ރައީސުލްޖުމްހޫރިއްޔާ ކަމަށް ގެނެވުނީތީ،" ތޯރިގް ވިދާޅުވި އެވެ.
އޭރުގައި ކޮންމެ ސަބަބަކާ ހުރެ ނަމަވެސް، ރައީސް ސޯލިހު ވެރިކަމަށް ގެނައުމަށް މަސައްކަތް ކުރެއްވި ބޭފުޅުން ޕީޕީއެމްއާ ބައިވެރިވެ، "މިނޫންގޮތެއް" ހޯދުމަށް މަސައްކަތް ކުރުމަށް ވެސް އޭނާ އެދިވަޑައިގެންނެވި އެވެ.
އެ ލިސްޓުގެ އެންމެ ކުރީގައި ފާހަގަކުރެއްވީ އެމްޑީއޭގެ ރައީސް ސިޔާމެވެ. މީގެ ކުރިން ވެސް ޕީޕީއެމްއާއެކު ކޯލިޝަނެއްގެ ގޮތުގައި އޮތް އެ ޕާޓީގެ ރައީސް ސިޔާމް, ތޯރިގް ސިފަ ކުރެއްވީ ޕީޕީއެމްގެ ރިޔާސީ ކެންޑިޑޭޓު އަބްދުﷲ ޔާމީންގެ ވަރަށް އަރިސް ބޭފުޅެއްގެ ގޮތުގަ އެވެ.
ކޯލިޝަންގެ ދައުވަތު ޖޭޕީއަށް ދެއްވަމުން ތޯރިގް ވިދާޅުވީ މިހާތަނަށް މަޖިލިސް އިންތިހާބެއްގައި ޖޭޕީއާއެކު މަސައްކަތް ކުރި ހަމައެކަނި ޕާޓީ ކަމަށާއި "އެމްޑީޕީން ދިނީ ލަނޑު" ކަމަށެވެ.
ތޯރިގް ވިދާޅުވީ ގާސިމާއި ނަޝީދު އެކުގައި ރިޔާސީ އިންތިހާބަށް ނިކުންނަވައިފިނަމަ، ރައީސް ސޯލިހަށް ލިބޭނީ އިންތިހާބުން ތިން ވަނައަށް ކަމަށެވެ.
"މި ހަގީގަތް ރައީސް ސޯލިހަށް އެނގިލައްވާތީ ކުދިކުދި ޕާޓީ، އަދާލަތު ޕާޓީގެ ތާއީދު ހޯދޭތޯ ފަލި ޖަހަމުން އެ ދަނީ،" ތޯރިގް ވިދާޅުވި އެވެ.
