މިއަހަރު ބާއްވާ ރިޔާސީ އިންތިހާބަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ނިކުންނަވާއިރު އެމަނިކުފާނުގެ ފަހަތްޕުޅުގައި ހުރުމަށް އެދި މިހާރު ވެސް ވެރިކަން ކުރާ ކޯލިޝަނުގެ ޕާޓީތަކަށް ފޮނުއްވި ސިޓީއާ ގުޅިގެން އަދާލަތު ޕާޓީން މިރޭ މަޝްވަރާ ކުރުމަށް ނިންމައިފި އެވެ.
އަދާލަތު ޕާޓީގެ ތަރުޖަމާނު، އަލީ ނަޒީރު ވިދާޅުވީ ރައީސް މުހިންމު ކަމަކަށް އެދިވަޑައިގަތުމުން އެކަމަށް ޕާޓީގެ ވިސްނުން ހުރި ގޮތް ބެލުން އަވަސްކުރަންޖެހޭ ކަމަށާއިި ކުއްލި ބައްދަލުވުމެއް ބާއްވަނީ އެހެންވެ ކަމަށެވެ.
"އެހެންވެ، މި ޕާޓީގެ މަޝްވަރާ މަޖިލީހުގެ ކުއްލި ބައްދަލުވުމެއް މިރޭ މި ބާއްވަނީ. ރައީސްގެ ސިޓީފުޅާމެދު ޕާޓީން ގޮތެއް ނިންމާނީ މަޝްވަރާ ކުރެއްވުމަށްފަހު،" އޭނާ ވިދާޅުވި އެވެ.
ބައްދަލުވުން ބާއްވަން ހަމަޖެހިފައި ވަނީ މިރޭ 9:00 ގައި އަދާލަތު ޕާޓީގެ އޮފީހުގަ އެވެ.
ކޯލިޝަނާއެކު ރިޔާސީ އިންތިހާބަށް ނިކުތުމަށް އެދި ރައީސް ސޯލިހު ސޮއި ކުރައްވައި ސިޓީފުޅު ފޮނުއްވީ ޖުމްހޫރީ ޕާޓީ އާއި އަދާލަތު ޕާޓީ އަދި މޯލްޑިވްސް ރިފޯމް މޫވްމަންޓަށެވެ.
ސިޓީފުޅުގައި ރައީސް ސޯލިހު ވިދާޅުވެފައި ވަނީ ކޯލިޝަންގައި ހިމެނޭ ޕާޓީތަކުގެ ފަރާތުން ވޭތުވެދިޔަ ހަތަރު އަހަރު ތެރޭގައި ވަރަށް ފުރިހަމަ އެއްބާރުލުމެއް ލިބިފައިވާ ކަމަށާއި ކުރިއަށް އޮތް ރިޔާސީ އިންތިހާބުގައި ވެސް އެ ޕާޓީތަކާއެކު އިންތިހާބަށް ނިކުންނަވަން އެމަނިކުފާނު ބޭނުންފުޅުވާ ކަމަށެވެ.
އެކަމުގައި ޕާޓީތަކާއެކު މަޝްވަރާ ކުރައްވަން ރައީސް ސޯލިހު އެ ސިޓީފުޅުގައި އެދިވަޑައިގެންފައިވެ އެވެ.
ސިޓީފުޅާ ގުޅިގެން އަދާލަތު ޕާޓީން މިރޭ މަޝްވަރާ ކުރައްވާއިރު، ޖުމްހޫރީ ޕާޓީން ރިޔާސީ އިންތިހާބާ މެދު ގޮތެއް ނިންމާނީ މި ހަފުތާ ބަންދުގައި އޮންނަ އެ ޕާޓީގެ ގައުމީ ކޮންގުރެސްގަ އެވެ. އެމްއާރުއެމްއިން އަދި ރިޔާސީ އިންތިހާބާ މެދު ވަކި ގޮތެއް ނިންމާފައެއް ނުވެ އެވެ.
