އިދިކޮޅު ޕީޕީއެމް/ޕީއެންސީން ކުރިއަށްގެންދާ މުޒާހަރާތަކުގެ ތެރެއިން، ހިޔާލުފާޅުކުރުމުގެ ހައްގުގެ އަދަބުތަކާ ހިލާފު ބައެއް ކަންކަން ފާހަގަ ކުރެވޭ ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން މިއަދު ބުނެފި އެވެ.
އެޗްއާރުސީއެމުން ނެރުނު ނޫސް ބަޔާނެއްގައި ބުނެފައި ވަނީ މާލެ އާއި އަތޮޅުތެރޭގައި ޕީޕީއެމުން ކުރިއަށް ގެންގޮސްފައިވާ 49 ހަރަކާތެއް އެ ކޮމިޝަނުން މޮނިޓާކޮށްފައިވާނެ ކަމަށެވެ. އެ ހަރަކާތްތަކުގައި އެ ކޮމިޝަނަށް ފާހަގަ ކުރެވުނު މައްސަލަތަކާއި ކޮމިޝަނަށް ހުށަހެޅިފައިވާ މައްސަލަތައް ބަލަމުން އަންނަ ކަމަށް ބުނެފައިވެ އެވެ.
މަގުމަތީގެ އަދަބުތަކާ ހިލާފުވެ އާންމުންނަށް އުނދަގޫވާ ގޮތަށް ޓްރެފިކް ބްލޮކް ކުރުމާއި ބޭއަދަބީ ބަސްތަކާއި ޝިއާރުތައް ބޭނުން ކުރުމާއި ދިވެހި ފުލުހުންގެ ހިދުމަތުގެ މަސައްކަތަށް ހުރަސް އެޅޭ ފަދަ އަމަލުތަކާއި 18 އަހަރު ނުފުރޭ ކުޑަކުދިން ބޭނުން ކުރުން ފަދަ މައްސަލަތައް އެޗްއާރުސީއެމަށް ވަނީ ފާހަގަކޮށްފަ އެވެ.
އޭގެ އިތުރުން، އާންމު ރައްޔިތުންގެ ފަރާތުން މުޒާހަރާގެ ބައިވެރިންގެ ގަޔަށް ފެން ޖެހުމާއި ސައިކަލު ފަދަ އެއްގަމު އުޅަނދު ފަހަރު ދުއްވާފައި ގޮސް މުޒާހަރާގެ ބައިވެރިންގެ ތެރެއަށް ވަންނަން އުޅުން ފަދަ ކަންކަން ވެސް ފާހަގަ ވެފައިވާ ކަމަށް އެޗްއާރުސީއެމުން ބުންޏެވެ.
ބައެއް ހާލަތްތަކުގައި މުޒާހަރާ ރޫޅާލުމުގައި ފުލުހުން ބާރު ބޭނުން ކުރާ ކަމާއި ބައެއް ހާލަތްތަކުގައި މުޒާހަރާ ރޫޅާލުމުގެ ކުރިން އިންޒާރު ދީފައި ނުވާ ކަމަށާއި އިންޒާރު ދިނުމަކާ ނުލައި ޕެޕާސްޕްރޭ ޖަހާފައިވާ ކަން ވެސް އެޗްއާރުސީއެމަށް ފާހަގަކޮށްފައިވެ އެވެ.
ގާނޫނު އަސާސީން އެއްވެ އުޅުމުގެ މިނިވަންކަމުގެ ހައްގު ދީފައިވާއިރު ހައްގުގެ ބޭނުން ކުރުމުގައި އެއް ބަޔަކު އަނެއް ބަޔެއްގެ ހައްގުތަކަށް އަރައިނުގަނެ ހައްގުތަކަށް އިހުތިރާމު ކުރުމަށް އެޗްއާރުސީއެމުން އިލްތިމާސްކުރެ އެވެ.
މުޒާހަރާ ކަވަރު ކުރުމުގައި ހަރަކާތްތެރިވާ ނޫސްވެރިން ވެސް ނޫސްވެރިކަމުގެ އާންމު އަހުލާގީ މިންގަނޑު ހިފެހެއްޓުމަށާއި އެ ސަރަހައްދު މޮނިޓާކުރާ ފުލުހުން ވެސް މުޒާހަރާ ރޫޅާލުމުގައި ގާނޫނާއި ގަވާއިދާ އެއް ގޮތަށް އަމަލު ކުރުމަށް ވެސް އެ ކޮމިޝަނުން ނެރުނު ބަޔާނުގައި އިލްތިމާސްކޮށްފައިވެ އެވެ.
ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން 11 އަހަރުގެ މުއްދަތަކަށް ޖަލަށް ލުމަށް ކްރިމިނަލް ކޯޓުން ވަނީ މިދިޔަ ޑިސެމްބަރު 25، ވަނަ ދުވަހު ހުކުމްކޮށްފަ އެވެ. އެއީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރުގެ ރިޝްވަތު ނަންގަވައި އެ ފައިސާ ލޯންޑަކުރެއްވި ކަމަށް ސާބިތުވާ ކަމަށް ކްރިމިނަލް ކޯޓުން ކަނޑައެޅުމަށް ފަހުގަ އެވެ. އެ ހުކުމް ހައި ކޯޓުގައި އިސްތިއުނާފް ކުރުމަށް ދަނީ މަސައްކަތް ކުރަމުންނެވެ.
އެ ހުކުމަށް ފަހު، އެމަނިކުފާނު އަދި ޕީޕީއެމްގެ ސަޕޯޓަރުން ގެންދަނީ ސިލްސިލާކޮށް ކޮންމެ ރެއަކު މާލޭގައި މުޒާހަރާ ކުރަމުންނެވެ. ކޮންމެ ރެއަކު ވެސް ފުލުހުންގެ އަމުރަށް ކިޔަމަންނުވި ކަމަށް ބުނެ މުޒާހަރާ ރޫޅާލައި، ބައެއް ބައިވެރިން ފުލުހުންގެ ބެލުމުގެ ދަށަށް ގެންދެ އެވެ. އަދި ފުލުހުންގެ ބެލުމުގެ ދަށަށް ގެންދެވޭ މީހުން އިރުކޮޅެއް ނުވެ ފަހުން ދޫކޮށްލަ އެވެ.
