ޖުމްހޫރީ ޕާޓީގެ ލީޑަރުގެ މަގާމަށް ކުރިމަތިލެއްވި ހަމައެކަނި ބޭފުޅަކީ ގާސިމް އިބްރާހިމް ކަމުގައި ވީނަމަވެސް، އެ މަގާމަށް އެ މަނިކުފާނު އިންތިހާބު ވާނީ ޕާޓީގެ އަސާސީ ގަވާއިދަށް ހުށަހަޅައިފައިވާ އިސްލާހުތައް ފާސްވުމުން ކަމަށް އެ ޕާޓީގެ ސެކެޓްރީ ޖެނެރަލް، އަލީ އާރިފް ވިދާޅުވެއްޖެ އެވެ.
ވޯޓަކައި ނުލައި ޖޭޕީގެ ލީޑަރުކަމަށް ގާސިމް އިންތިހާބުވި ކަމަށް ބައެއް މީޑިއާތަކުން ރިޕޯޓުކޮށްފައި ވީނަމަވެސް އެއީ މުޅިން ރަނގަޅު ވާހަކައެއް ނޫން ކަމަށް އާރިފް ވިދާޅުވި އެވެ.
"ރަނގަޅު، އިލްކެޝަންސްގެ ގާނޫނުގައި އޮންނަނީ އެ މަގާމަކަށް އިންތިހާބު ކުރަންޖެހޭ އަދަދަށް މީހުން ކުރިމަތިލައިފި ނަމަ [ވޯޓަކައި ނުލައި] އިންތިހާބުވާނެ ކަމަށް، އެހެންނަމަވެސް އަޅުގަނޑުމެންގެ ޕާޓީގެ އަސާސީ ގަވާއިދަށް ގެންނަން ހުށަހަޅާފައި ހުރި އިސްލާހުތައް ފާސްވުމުން އެ މަނިކުފާނު އިންތިހާބުވެލައްވާނީ،" އޭނާ ވިދާޅުވި އެވެ.
ޖުމްހޫރީ ޕާޓީގެ ގައުމީ ކޮންގުރެސް ބޭއްވުމަށް ހަމަޖެހިފައި ވަނީ މި ހަފުތާ ބަންދުގަ އެވެ. އެ ކޮންގުރެސްގައި ޕާޓީގެ އަސާސީ ގަވާއިދު އިސްލާހު ކުރުމުގެ މަސައްކަތާއި ޕާޓީގެ އެކި ގުނަންތަކަށާއި މަގާމުތަކަށް މީހުން އިންތިހާބު ކުރުން އޮންނާނެ އެވެ.
އެ ކޮންގުރެސްގައި އެ ޕާޓީން ރިޔާސީ އިންތިހާބަށް ވާދަކުރުމާ މެދުވެސް ގޮތެއް ނިންމާނެ އެވެ. ރިޔާސީ އިންތިހާބަށް ޖުމްހޫރީ ޕާޓީން ވަކި ގޮތެއް ނިންމާފައި އަދި ނުވި ނަމަވެސް މިހާރު ސަރުކާރު ހިންގާ ކޯލިޝަން އެގޮތުގައި ދެމެހެއްޓުމަށް ބޭނުންފުޅުވާކަމަށް ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފަ އެވެ.
ޖުމްހޫރީ ޕާޓީގެ މަގާމުތަކަށް ކުރިމަތިލުމުގެ ސުންގަޑި އިއްޔެ ހަވީރު 4:00 އަށް ހަމަވިއިރު، ޕާޓީގެ ލީޑަރުގެ މަގާމަށް ގާސިމްގެ އިތުރުން އެހެން ބޭފުޅަކު ކުރިމަތިލައްވައިފައެއް ނުވެ އެވެ.
މިއީ އެމަނިކުފާނު އެމަގާމަށް ކުރިމަތިލެއްވި ހަތަރުވަނަ ފަހަރެވެ. މީގެ ކުރިން ތިން ދައުރުގައި ވެސް ޕާޓީގެ ލީޑަރުގެ މަގާމުގައި ހުންނެވީ ގާސިމް އިބްރާހިމް އެވެ.
އިލެކްޝަންސްގެ ދަފުތަރުގައި ވާގޮތުން ޖުމްހޫރީ ޕާޓީއަކީ ރާއްޖޭގެ ތިންވަނައަށް އެންމެ މެންބަރުން ގިނަ ޕާޓީ އެވެ. މިދިޔަ އަހަރުގެ ޑިސެންބަރުގެ ނިޔަލަށް އެ ޕާޓީގެ ދަފުތަރުގައި 17913 (ސަތާރަހާސް ނުވަސަތޭކަ ތޭރަ) މެންބަރުން ތިއްބެވެ.
ގާސިމް އިބްރާހިމް ވަނީ މީގެ ކުރިން 2008 ވަނަ އަހަރާއި 2013 ވަނަ އަހަރުގެ ރިޔާސީ އިންތިހާބުގައި ވެސް ވާދަ ކުރައްވައިފަ އެވެ. ރާއްޖޭގެ ބޮޑެތި ސިޔާސީ ޕާޓީތަކުންވެސް ތިބީ ޖުމްހޫރީ ޕާޓީން ރިޔާސީ އިންތިހާބާ މެދު ނިންމާ ގޮތެއްގެ އިންތިޒާރުގަ އެވެ.
