ރައްޔިތުންގެ މަޖިލީހުގެ މިއަދުގެ ޖަލްސާގައި ބަހުސް ކުރާނެ މެންބަރަކު ނެތިގެން ޖަލްސާ ކުރުކޮށްލައިފި އެވެ.
މަޖިލީހުގެ މިއަދުގެ ޖަލްސާގައި އެޖެންޑާކޮށްފައި އޮތީ މިނިސްޓަރާ ސުވާލުކުރުމުގެ އިތުރުން ބާރަށު ދާއިރާގެ މެންބަރު އަހުމަދު އަބްދުﷲ ހުށަހަޅުއްވާފައިވާ މަސައްކަތުގެ މާހައުލުގެ ސަލާމަރާއި ސިއްހީ ރައްކާތެރިކަމުގެ ބިލުގެ އިބްތިދާއީ ބަހުސް ފެށުމެވެ.
ހެނދުނުގެ ދަންފަޅި މެދުކަނޑާލިއިރު، އެ ބިލަށް ބަހުސް ކޮށްފައިވަނީ ޖުމްލަ ފަސް މެންބަރުންނެވެ.
ބިލަށް ބަހުސް ކުރެއްވި މެންބަރުން؛
- ކާށިދޫ ދާއިރާގެ މެންބަރު އަބްދުﷲ ޖާބިރު
- މާފަންނު މެދު ދާއިރާގެ މެމްބަރު އިބްރާހީމް ރަޝީދު (ބޮންޑޭ)
- ކެންދޫ ދާއިރާގެ މެންބަރު އަލީ ހުސައިން
- ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް
- ހިތަދޫ އުތުރު ދާއިރާގެ މެންބަރު މުހައްމަދު އަސްލަމް
ސަޔަށް ފަހު، 10:30ގައި އަލުން ޖަލްސާ ފައްޓައިގެން އެ ބަހުސް ފެށިއިރު، ބަހުސަށް އެދިފައިވަނީ މެމްބަރު އިބްރާހީމް ރަޝީދު ދެ ވަނަ ފުރުސަތަކަށެވެ. އިތުރު މެންބަރަކު އެދިފައި ނުވެ އެވެ.
އެ ބިލަށް ބަހުސް ކުރާނެ މެންބަރެއް ނެތުމުން އެޖެންޑާގައި ދެން އޮތް ނަފްސާނީ ސިއްހަތާ ގުޅޭ ވަށާ ޖެހޭ ސިޔާސަތެއް ގާއިމް ކުރުމަށް ހުށަހަޅާފައިވާ ގަރާރަށް ބަހުސް ހުޅުވާލި ނަމަވެސް އެއްވެސް މެންބަރަކު ބަހުސް ކުރުމަށް އެދިފައިނުވާތީ، ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވަނީ ޖަލްސާ ނިންމާލައިފަ އެވެ.
މަޖިލީހުގެ ޖަލްސާތަކުގެ ހާޒިރީ ދަށް މައްސަލަތަކަކީ އާންމު މައްސަލައަކަށްވާއިރު، މިއަދުގެ ޖަލްސާ ފެށިއިރު ޖަލްސާއަށް ހާޒިރުވެތިއްބެވީ އެންމެ 33 މެންބަރުންނެވެ. އެއީ މަޖިލީހުގެ މެންބަރުންގެ 37 ޕަސެންޓެވެ.
ތަޅުމުގެ މަސައްކަތްތައް މިއަދަށް ނިންމާލި ނަމަވެސް، ބައެއް ކޮމިޓީތައް މެންދުރު ފަހު ކުރިއަށް ދާނެ އެވެ.
