ޖުމްހޫރީ ޕާޓީގެ އަސާސީ ގަވާއިދަށް ބަދަލު ގެންނަނީ އެ ޕާޓީގެ ގުނަންތައް ބާރުވެރިކުރުމަށް ކަމަށް އެ ޕާޓީގެ ސެކްރެޓަރީ ޖެނެރަލް އަލީ އާރިފް ވިދާޅުވެއްޖެ އެވެ.
މި މަހުގެ 24 އިން 25 އަށް ބޭއްވުމަށް ހަމަޖެހިފައިވާ ޖުމްހޫރީ ޕާޓީގެ ހަތަރުވަނަ ގައުމީ ޖަލްސާއާ ބެހޭ މައުލޫމާތު ހިއްސާކުރައްވަމުން އަލީ އާރިފް ވިދާޅުވީ މިހާރު ކުރިއަށް ދަނީ ޖަލްސާއަށް ތައްޔާރުވުމުގެ އިދާރީ މަސައްކަތްތައް ކަމަށެވެ.
ޕާޓީގެ އަސާސީ ގަވާއިދަށް ބަދަލު ގެންނަނީ ޕާޓީން ތަޖުރިބާކޮށްފައިވާ ކަންތައްތަކުގެ އަލީގައި ކަމަށާއި އަސާސީ ގަވާއިދަށް ބަދަލުގެނައުމަށް މަސައްކަތްކޮށްފައިވަނީ ޕާޓީގެ އެންމެހައި ގުނަންތަކެއް ބާރުވެރިކުރުމަށް ކަމަށް އަލީ އާރިފް ވިދާޅުވި އެވެެެ.
ޖުމްހޫރީ ޕާޓީގެ ވިސްނުމަކީ ރިޔާސީ އިންތިހާބުގައި ކެންޑިޑޭޓަކު ނެރުން ކަމަށް މީގެ ކުރިން ވެސް އެ ޕާޓީގެ އިސް ބޭފުޅުން ގެންދެވީ ވިދާޅުވަމުންނެވެ. އެ ކަމާ މެދު ގޮތެއް ނިންމުން އޮންނާނީ ޕާޓީގެ ކޮންގްރެސް އިންނެވެ.
ރިޔާސީ އިންތިހާބުގައި ވާދަކުރުމަށް ކައުންސިލްގެ ނިންމުމެއް އޮތް އިރު، އެއާ މެދު ކޮންގްރެސްއިން އަދި ގޮތެއް ނިންމަން ޖެހެ އެވެ. އެ ނިންމުން އަދި ބަދަލުނުވާނެ ކަމަށް ދަންނަވަން ދަތި ކަމަށް ވެސް ޖުމްހޫރީ ޕާޓީގެ ލީޑަރު ގާސިމް އިބްރާހީމް ކުރިން ވިދާޅުވެފައިވެ އެވެ.
2018 ވަނަ އަހަރު ރިޔާސީ އިންތިހާބު އޮތް އިރު، ގާސިމް ހިމެނޭހެން އޭރުގެ އިދިކޮޅު ހުރިހާ ލީޑަރުން ތިބީ ޖަލު ހުކުމެއްގައި ނުވަތަ ހުކުމެއް ނެތި ބަންދުގަ އެވެ. އެހެންވެ ގާސިމްގެ ޖޭޕީގެ އިތުރަށް އެމްއާރުއެމާއި އަދާލަތު ޕާޓީން ތާއީދުކުރީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށެވެ.
ރައީސް ސޯލިހު ބޭނުންފުޅުވަނީ ކުރިއަށް އޮތް ރިޔާސީ އިންތިހާބުގައި ވެސް މިހާރު ކޯލިޝަންގައި ހިމެނޭ ޕާޓީތަކާއެކު ކޯލިޝަން އުފައްދައިގެން ވާދަކުރުމަށެވެ. ނަމަވެސް، ޖޭޕީގެ އިތުރުން އަދާލަތު ޕާޓީއާއި އެމްއާރުއެމުން ވެސް އެކަމުގައި އަދި ވަކި ގޮތެއް ނުނިންމަ އެވެ.
ޖޭޕީން މީގެ ކުރިން 2008 އަދި 2013 ގެ ރިޔާސީ އިންތިހާބުގައި ވެސް ވާދަކުރި އެވެ. އެ ދެ އަހަރު ވެސް އެ ޕާޓީގެ ޓިކެޓުގައި ވާދަކުރެއްވީ ގާސިމެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
ނަމަވެސް، އެ ދެ ފަހަރު ވެސް އިންތިހާބު ކާމިޔާބުކޮށްފައިވަނީ ގާސިމްގެ ތާއީދު އޮތް ކެންޑިޑޭޓެވެ. ދެވަނަ ބުރުގައި ގާސިމް ތާއީދުކުރެއްވީ، ފުރަތަމަ ބުރުގައި ދެވަނައަށް އެންމެ ގިނަ ވޯޓު ލިބޭ ކެންޑިޑޭޓެވެ. ރައީސް މުހައްމަދު ނަޝީދާއި، ރައީސް އަބްދުﷲ ޔާމީން ވެސް ސަރުކާރު އެކުލަވާލީ ޖޭޕީއަށް ހިއްސާއެއްދޭ ގޮތަށެވެ.
