އެމެރިކާއިން ވައްޓާލި ޗައިނާގެ "ޖާސޫސީ" ބެލޫނަކީ ހަމައެކަނި އެ ގައުމަށް އަމާޒުކޮށް އުދުއްސި އުޅަނދެއް ނޫން ކަމަށާއި ދުނިޔޭގެ އެތައް ގައުމެއްގެ މަތިން އެފަދަ އުޅަނދު ދަތުރުކޮށްފައިވާ ކަމަށް އެމެރިކާއިން ބުނެފި އެވެ.
އެމެރިކާގެ ސެކްރެޓަރީ އޮފް ސްޓޭޓް އެންޓޯނީ ބްލިންކެން ވިދާޅުވީ ވައްޓާލި ބެލޫނުން ގިނަ މައުލޫމާތުތަކެއް އެއްކުރެވުނު ކަމަށާއި އެ މައުލޫމާތު އެހެން ބައެއް ގައުމުތަކާ ހިއްސާކޮށްފައިވާ ކަމަށެވެ. ނަމަވެސް އެ މައުލޫމާތުގެ ތަފްސީލެއް ހާމައެއް ނުކުރެ އެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި އެމެރިކާގެ ޑިފެންސް ޑިޕާޓްމަންޓުގެ ތަރުޖަމާނު ބްރިގޭޑިއާ ޖެނެރަލް ޕެޓް ރައިޑާ ވިދާޅުވީ މިފަދަ ޖާސޫސީ ބެލޫންތައް އެމެރިކާ، އޭޝިއާ އަދި ޔޫރަޕްގެ ގައުމުތަކުގެ މަތިން ދުއްވާފައިވާ ކަމަށް ގަބޫލުކުރާ ކަމަށެވެ.
ދުއިސްތަ ފޫޓު ހުންނަ ޗައިނާގެ ބެލޫނަކީ ޖާސޫސު ކުރަން ބޭނުން ކުރި އުޅަނދެއް ކަމަށް އެމެރިކާއިން ތުހުމަތު ކުރި ނަމަވެސް، ޗައިނާއިން އެކަން ދޮގުކުރެ އެވެ. ޗައިނާއިން ބުނެފައިވަނީ އެއީ މޫސުން ދިރާސާކުރަން އުދުއްސާލި ބެލޫނެއް ކަމަށެވެ.
އެމެރިކާ މަތިން، 60،000 ފޫޓު އުހުން ދަތުރުކުރަމުން ދަނިކޮށް ހޮނިހިރު ދުވަހު ބަޑިޖަހައި ބެލޫން ވައްޓާލީ ދެކުނު ކެރޮލައިނާގެ އައްސޭރި ފަށަށެވެ.
