މި އަހަރު އޮންނަ ރިޔާސީ އިންތިހާބުގައި ޖުމުހޫރީ ޕާޓީގެ ޓިކެޓާ ގުޅޭ ގިނަ އިސްލާހުތަކާއެކު އެ ޕާޓީގެ ކޮންގްރެސް މި މަހު 24 ގައި ބޭއްވުމަށް ހަމަޖެހިއްޖެ އެވެ.
މިއަދު ބޭއްވި ޖޭޕީގެ ކައުންސިލް ބައްދަލުވުމުގައި ނިންމި ކަންކަމާ ގުޅިގެން އެ ޕާޓީގެ އިސް ތަރުޖަމާނު އަލީ ސޯލިހު "އަދަދު" އަށް ވިދާޅުވީ މިއަދުގެ ޖަލްސާގައި އެ ޕާޓީގެ އަސާސީ ގަވާއިދަށް ހުށަހެޅުނު އިސްލާހުތަކަށް ގޮތް ނިންމާނީ މި މަހު ބާއްވާ ކޮންގްރެސްގައި ކަމަށެވެ.
"އެންމެ ބޮޑު އިސްލާހެއްގެ ގޮތުގައި (ހިމެނެނީ) ޕާޓީގެ ލީޑަރުގެ ބަދަލުގައި ދެން އެންމެ އިސްކޮށް ހުންނާނީ ރައީސް ކަމަށް ކަނޑައަޅާ އިސްލާހެއް އެބައޮތް," އޭނާ ވިދާޅުވި އެވެ.
މީގެ އިތުރުންވެސް ޕާޓީގެ ރިޔާސީ ޓިކެޓާއި ރިޔާސީ ޕްރައިމަރީއަކާ ގުޅޭ އިސްލާހުތަކެއް ހުށަހެޅުނު ކަމުގެ އިޝާރާތެއް އޭނާ ވަނީ ދެއްވައިފަ އެވެ.
މިހާރު ޖޭޕީގެ އަސާސީ ގަވާއިދުގައި އޮންނަ ގޮތުން އެ ޕާޓީގެ ރިޔާސީ ޓިކެޓު ދޭ ފަރާތެއް ކަނޑައަޅާނީ ޕްރައިމަރީއަކާ ނުލާ އެ ޕާޓީގެ ކައުންސިލުންނެވެ.
"ރިޔާސީ އިންތިހާބާ ބެހޭ ގޮތް ނިންމުން އޮތީ ގައުމީ ޖަލްސާގައި"
އަލީ ސޯލިހު އިތުރަށް ވިދާޅުވީ 24 ވަނަ ދުވަހު ބާއްވާ ކޮންގްރެސްގައި 700 އެއްހާ އާންމު މެންބަރުން ބައިވެރިވާނެ ކަމަށް ބެލެވޭ ކަމަށެވެ. އަދި ޕާޓީގެ ކުރިމަގާމެދު ގޮތް ނިންމާނީ އެ ކޮންގްރެސްގެ ބައިވެރިން ކަމަށެވެ.
ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހީމް ވެސް މީގެ ކުރިން ވިދާޅުވެފައިވަނީ ސިޔާސީ ޕާޓީއެއް އުފައްދަނީ ވެރިކަމަށް އައުމަށް ނުވަތަ ވެރިކަމުގައި ހިއްސާއެއް އޮތުމަށް މަސައްކަތް ކުރުމަށެވެ.
2018 ވަނަ އަހަރުގެ ރިޔާސީ އިންތިހާބާ ކުރިމަތިވި އިރު އެ ޕާޓީގެ ލީޑަރު ޖަލު ބަންދުގައި ހުރުމާއެކު ޖޭޕީއިން ރިޔާސީ އިންތިހާބަށް ނުކުތީ އެމްޑީޕީއާއެކު ހެދި ކޯލިޝަނުގަ އެވެ.
މި އަހަރުގެ ރިޔާސީ އިންތިހާބަށްވެސް އެމްޑީޕީއިން ކޯލިޝަން ހަދަން ބޭނުންވާ ކަމަށް އެ ޕާޓީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހު ވިދާޅުވެފައިވީ ނަމަވެސް ޖުމްހޫރީ ޕާޓީއިން ވެރިކަން ކުރާ ކޯލިޝަނާއެކު ކުރިއަށް ދިއުމަށް އަދި ގޮތެއް ނިންމާފައެއް ނުވެ އެވެ. އެ ނިންމުންވެސް ނިންމާނީ 24 ވަނަ ދުވަހުގެ ކޮންގްރެސްގަ އެވެ.
ޖޭޕީން މީގެ ކުރިން 2008 އަދި 2013 ގެ ރިޔާސީ އިންތިހާބުގައި ވެސް ވާދަކުރި އެވެ. އެ ދެ އަހަރު ވެސް އެ ޕާޓީގެ ޓިކެޓުގައި ވާދަކުރެއްވީ ގާސިމެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
