ރައްޔިތުންގެ މަޖިލީހުގެ ޖަލްސާތަކުގައި ފިރިހެން މެންބަރުންގެ ނަން އިއްވުމުން، މެންބަރުން ނެރުމަށް އަންހެން އޮފިސަރުން ހަރަކާތްތެރިވާން ނުޖެހޭ ގޮތް ހަދަން މަޖިލިސް ގަވައިދަށް އިސްލާހު ހުށަހަޅައިފި އެވެ.
ރައްޔިތުންގެ މަޖިލީހުގެ މިއަހަރުގެ ފުރަތަމަ ޖަލްސާގައި އިދިކޮޅުގެ ފަސް މެންބަރުންގެ ނަން އިއްވައިފައިވެ އެވެ. އެ މެންބަރުން ތަޅުން ދޫކޮށް ނުކުންނަށް ދެކޮޅު ހެދުމުން، މެންބަރުން ނެރުމުގައި ހަރަކާތްތެރިވެފައިވަނީ އަންހެން ސެކިއުރިޓީ އޮފިސަރުންނެވެ. މިކަމާ ހިތްހަމަނުޖެހުން ފާޅުކޮށް ގިނަ ބަޔަކު އަންނަނީ ސޯޝަލް މީޑިއާގައި ވެސް އެ ވާހަކަ ދައްކަމުންނެވެ.
އެކަން ބަދަލު ކުރުމަށް އިސްލާހު ހުށަހަޅައިފައިވަނީ މީދޫ ދާއިރާގެ މެންބަރު ރޮޒައިނާ އާދަމް އެވެ. ގަވައިދަށް ރޮޒައިނާ ހުށަހެޅުއްވީ އަންހެން މެންބަރުން ނެރުމަށް އަންހެނުން، އަދި ފިރިހެން މެންބަރުން ނެރެން ފިރިހެން ހަރަކާތްތެރިވާން ޖެހޭ ގޮތަށެވެ.
އިސްލާހު ހުށަހެޅި ސަބަބުގެ ގޮތުގައި ވަނީ ފިރިހެނުން ބަލައި ފާސްކުރުން ފަދަ ކަން ކަމަކީ އާންމު އުސޫލުން ފިރިހެނުން ކުރާ ކަންކަމަށްވާއިރު، މަޖިލީހުގައި ވެސް ކުރިން އަމަލު ކުރަނީ އެގޮތަށް ކަން ފާހަގަކޮށްފަ އެވެ.
"މި މަންޒަރުތަކަކީ މުޖުތަމައުން ބަލައިގަންނަން އާންމު މިންގަނޑުތަކާ ހިލާފު އަމަލެއްގެ ގޮތުގައި ސިފަ ކުރެވި، މަޖިލީހުގެ އަންހެން ސެކިއުރިޓީ އޮފިސަރުންގެ އިއްޒަތާ ކަރާމާތަށް ގެއްލުންވާ ގޮތަށް އާންމު ރައްޔިތުން ތަފާތު ކޮމެންޓުތައް މީސް މީޑިއާގައި ކޮށްފައިވޭ،" ރޮޒައިނާ ވިދާޅުވި އެވެ.
