ރައްޔިތުންގެ މަޖިލީހުގެ މިއަހަރުގެ ފުރަތަމަ ޖަލްސާގައި ނަން އިއްވި މެންބަރުން ބޭރުކުރުމުގައި ހަރަކާތްތެރިވި އަންހެން ސެކިއުރިޓީ އޮފިސަރުންނަށް ފުރައްސާރަކުރަމުންދާތީ މީދޫ ދާއިރާގެ މެންބަރު ރޮޒައިނާ އާދަމް ކަންބޮޑުވުން ފާޅުކުރައްވައިފި އެވެ.
މަޖިލީހުގެ އިއްޔެގެ ޖަލްސާގައި އިދިކޮޅުގެ ފަސް މެންބަރުންގެ ނަން އިއްވައިފައިވެ އެވެ. އެ މެންބަރުން ތަޅުން ދޫކޮށް ނުކުންނަށް ދެކޮޅު ހެދުމުން، މެންބަރުން ނެރުމުގައި ހަރަކާތްތެރިވެފައިވަނީ އަންހެން ސެކިއުރިޓީ އޮފިސަރުންނެވެ.
މިކަމާ ހިތްހަމަނުޖެހުން ފާޅުކޮށް ގިނަ ބަޔަކު އަންނަނީ ސޯޝަލް މީޑިއާގައި ވެސް އެ ވާހަކަ ދައްކަމުންނެވެ.
މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ރޮޒައިނާ ވިދާޅުވީ އޮފިސަރުން އެކަން ކުރީ "ފިރިހެން މެންބަރުން ގައިގައި އަތްލާ ހިތުން" ނޫން ކަމަށެވެ.
"މިތާ ހިނގި ކަންތައްތަކަކީ މިތަނުގެ ވެރިން އެ ބޭފުޅުންނަށް އިންސްޓްރަކްޝަންސް ދެއްވި ގޮތަށް އެ ބޭފުޅުން އަމަލު ކުރައްވާފައިވަނީ، އެހެންވީމާ މިކަހަލަ ހާލަތްތަކުގައި އާންމު ރައްޔިތުން ވެސް ކޮންމެވެސް ވަރަކަށް ވިސްނަން އެބަ ޖެހޭ،" ރޮޒައިނާ ވިދާޅުވި އެވެ.
ސެކިއުރިޓީ އޮފިސަރުން ފަދަ މަގާމުތަކުގައި މަސައްކަތް ކުރާ އަންހެނުންގެ އަދަދު ނިސްބަތުން މަދުއިރު، އެ މީހުންގެ އަގު ވެއްޓޭ ފަދަ ވާހަކަތައް ދެއްކުމަކީ ދެރަ ކަމެއްގެ ގޮތުގައި އޭނާ ފާހަގަކުރެއްވި އެވެ.
ފުލުހުންނާއި ކަސްޓަމްސް ފަދަ ތަންތަނުގައި ވެސް އަމަލު ކުރާ އުސޫލަކީ އަންހެނުން އަންހެނުން ފާސްކުރުން ކަން ފާހަގަކުރައްވައި ރޮޒައިނާ އިތުރަށް ވިދާޅުވީ މަޖިލީހުގައި އިއްޔެ ހިނގި ކަންކަމަކީ އާންމު އުސޫލުގެ ބޭރުން ހިނގި ކަމެއް ކަމަށެވެ.
"އަދި ކުރިއަށް އޮތް ތަނުގައި މަޖިލީހުގެ ގަވައިދުން މިގޮތަށް މިކަން ނުވާނެ ގޮތަކަށް އަޅުގަނޑު ހުށަހަޅާނަން،" ނިންމާލަމުން ވެސް ރޮޒައިނާ ވިދާޅުވި އެވެ.
