ފާއިތުވީ އަހަރު ދުވަސް ތެރޭގައި އާސަންދައަށް ކުރި ހަރަދު ހަތަރު ގުނަ އިތުރުވެފައިވާތީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެކަމާ ސުވާލު އުފައްދަވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގެ ތެރެއިން ނަޝީދު ވިދާޅުވީ މިދިޔަ އަހަރުގެ ޖެނުއަރީ މަހުގެ ތެރޭގައި އާސަންދައަށް ހޭދަވެފައިވަނީ 67.9 މިލިއަން ރުފިޔާ ނަމަވެސް މި އަހަރުގެ އެ މުއްދަތުގައި އެ އަދަދު 283.4 މިލިއަން ރުފިޔާ ހަރަދުވެފައިވާ ކަން ތަފާސްހިސާބުތަކުން ދައްކާ ކަމަށެވެ.
"މިދިޔަ އަހަރުގެ ޖެނުއަރީ މަހާއި މި އަހަރުގެ ޖެނުއަރީ މަހާ އަޅާ ބަލާއިރު ހަތަރު ގުނައިން ބަލި މީހުން އިތުރުވެގެން ހިނގައްޖެ، ދެން އެއީ އެތެރޭގެ އިންތިހާބަކާ ގުޅިގެން އައި ބަދަލެއްތޯ ނުވަތަ ހަގީގަތުގައި ވެސް ބަލި މީހުން ގިނަ ވީތޯ،" ނަޝީދު ސުވާލު އުފެއްދެވި އެވެ.
ނަޝީދު އިތުރަށް ވިދާޅުވީ ފިނޭންސުން އެ މައުލޫމާތުތައް ހާމަކުރަމުންދާއިރު، މެންބަރުން އެކަމާ މެދު ވިސްނާ ސުވާލު ކުރާނެ ކަމަށް ދެކެވަޑައިގަންނަވާ ކަމަށެވެ.
އާސައިންދައިގެ ހަރަދު ބޮޑުވުމާއި އެމްޑީޕީގެ އެތެރޭގެ އިންތިހާބާ ގުޅުން އޮތް ކަމާމެދު އިންތިހާބުގައި ރައީސް އިބްރާހިމް މުހައްމަދު ސޯލިހާ ވާދަކުރައްވައި ނާކާމިޔާބުވެވަޑައިގެންނެވި ނަޝީދު ސުވާލު އުފައްދަވާފައިވާއިރު، އިންތިހާބުގެ ކެމްޕެއިނުގެ ތެރެއިން ސަރުކާރުގެ ވަސީލަތްތައް ނަހަމަ ބޭނުން ގޮތުގައި ކުރި ކަމަށް ވެސް ނަޝީދު މީގެ ކުރިން ތުހުމަތު ކުރައްވައިފައިވެ އެވެ.
