ލައިސަންސް ކާޑު ޑިޖިޓަލްކޮށް، ލައިސަންސަށް އެދުމާ ގުޅޭ ހުރިހާ ކަމެއް އޮންލައިންކޮށް ދޭން ޓްްރާންސްޕޯޓް މިނިސްޓްރީން ފަށައިފި އެވެ.
މި ހިދުމަތް ފެށުމާއި ގުޅޭގޮތުން ޓްރާންސްޕޯޓްް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އައިޝަތު ނަހުލާ ވިދާޅުވީ، އިއްޔެ އިން ފެށިގެން މި ހިދުމަތް ފެށުމާއި، އެކު ލައިސަންސް ކާޑު ޕްރިންޓުކުރުން ހުއްޓާލާފައިވާ ކަމަށެވެ.
"އަޅުގަނޑު ދަންނަވަން އޮތީ މިއަދަށް ފަހު އަޅުގަނޑުމެން މި ޕްރިންޓުކުރާ ކުރުން ހުއްޓާލާފައި ވާކަމަށް. ދެން އެމަސައްކަތެއް ނުކުރާނެ. މިހާރު ފޯނުންް ލައިސަންސްކާޑު ދައްކާލެވޭ ގޮތަށް އިންނާނީ. އެހެން ނަމަވެސް އަމިއްލައަަށް ލައިސަންސް ޕްރިންޓުކޮށްގެން ބޭނުންކުރަން ބޭނުންްވާ ފަރާތްތަކަށް އެ ފުރުސަތު އޮންނާނެ" މިނިސްޓަރު ނަހުލާ ވިދާޅުވި އެވެ.
މި ބައްދަލުވުމުގައި ވާހަކަ ދައްކަވަމުން ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަލީ ސޯލިހް ވިދާޅުވީ، މި ހިދުމަތް ފެށުމާ އެކު ވަރަށް ގިނަ ފަސޭހަތަކެއް ލިބިގެން ދާނެ ކަމަށެވެ.
"އެއްވެސް ބޭފުޅަކު ދެން މިނިސްޓްރީއަށް ނުވަތަ މިނިސްޓްރީގެ ކައުންޓަރަށް ވަޑައިގެން މި ހިދުމަތް ހޯދާކަށް ނުޖެހޭނެ. މަގުމަތިން މަޑުކޮށްލާފަ ފުލުހަކު ސުވާލުކޮށްފި ނަމަވެސް ތިބޭފުޅުންނަށް ފޯނުން މުއްދަތު ހަމަނުވާަ ލައިސަންސް ކާޑު ފޯނުން ދައްކާލެވޭނެ" އަލީ ސޯލިހް ވިދާޅުވި އެވެ.
މި ހިދުމަތް ފެށުމާ އެކު ލައިސަންސަށް އެދުން ކުރިއަށް ގެންދާނީ އީފާސްގެ މެދުވެރިކޮށް ޓްރާންސްޕޯޓް މިނިސްޓްރީގެ ޕޯޓަލުގެ ތެރެއިންނެވެ.
މި ލައިސަންސް ކާޑު އެތެރޭގެ އުދުހުމުގައި ވެސް ބޭނުންކުރެވޭނެ ކަމަށް އަލީ ސޯލިހް ވިދާޅުވި އެވެ. އަލީ ސޯލިހް ވިދާޅުވީ، އައިޑީކާޑު ނުވަތަ ޕާސްޕޯޓު ހަނދާން ނެތިގެން ނުގެންދެވިގެންް ވަރަށް ގިނަަ ފަހަރު ދަތުރު ނުކުރެވުނު ނަމަަވެސް އަަތުގައި ފޯނު އޮންނަ ހާލަތެއްގައި ލައިސަންސް ކާޑު އެތެރޭގެ އުދުހުންތަކުގައި ބޭނުންކުރެވުމަކީ ލިބޭނެ ވަރަށް ބޮޑު ލުޔެއް ކަމަށެވެ.
ޑިޖިޓަލް ލައިސަންސް ބޭނުންކުރަން ފެށުމާ އެކު އަލަށް ލައިސަންސް ދޫކުރާއިރު އޮންނާނީ ޑިޖިޓަލްް ލައިސަންސެކެވެ. ލައިސަންސް ކާޑު ބޭނުންވާ ފަރާތްތަކަށް އެ ކާޑު ދޭނެ ކަމަށް ޓްރާންސްޕޯޓް މިނިސްޓްރީން މީގެކުރިން ވަނީ ބުނެފަ އެވެ.
ލައިސަންސް ދޫކުރުމުގެ ހިދުމަތް މެދުކަނޑާލުމާ އެކު މި ދުވަސްވަރަށް މުއްދަތު ހަމަވާ ކާޑުތައް މި މަހުގެ 14 ވަނަ ދުވަހާ ހަމައަށް ބޭނުންކުރެވޭނެ އެވެ. ޓްރެފިކް ބަލަހައްޓާ ފުލުހުންގެ އެޕްލިކޭޝަނުން ވެސް މި ލައިސަންސްތައް ފެންނާނެ ކަމަށް ޓްރާންސްޕޯޓް މިނިސްޓްރީންް ވަނީ ބުނެފަ އެވެ.
މި ހިދުމަތް ފެށުމާ އެކު ލައިސަންސަށް އެދުމުގެ ހުރިހާ ކަމެއް ވެސް ކުރާނީ ޑިޖިޓަލްކޮށް ކަމަށް އެ މިނިސްޓްރީން ވަނީ ބުނެފަ އެވެ.
