ރައްޔިތުންގެ މަޖިލިސް މި އަހަރަށް ހުޅުވުމަށް ބާއްވާ ފުރަތަމަ ޖަލްސާގައި ރައީސް އިބްރާހިމް މުހައްމަދު ސޯލިހު ރިޔާސީ ބަޔާން އިއްވަވަން ހުރަސް އެޅުއްވުމުން ނައިފަރު ދާއިރާގެ މެންބަރު އަހުމަދު ޝިޔާމްގެ ނަން އިއްވަވައި މަޖިލީހުން ބޭރުކޮށްފި އެވެ.
މިއަދުގެ ޖަލްސާ ފަށައި، ރައީސް ސޯލިހު ރިޔާސީ ބަޔާން އިއްވެވުމަށް ޕޯޑިއަމް ކައިރިއަށް ވަޑައިގެންނެވުމާ އެކު ޝިޔާމް ވަނީ ރިޔާސަތު ކުރިމައްޗަށް ހުއްޓި އަޑުގަދަ ކުރައްވާފަ އެވެ. އަދި، ރައީސް ސޯލިހުގެ އިސްތިއުފާއަށް ވެސް ގޮވާލެއްވި އެވެ.
އެއާއެކު މާވަށު ދާއިރާގެ މެންބަރު މުހައްމަދު ސައީދާއި މަހިބަދޫ ދާއިރާގެ މެންބަރު ތޯރިގް އިބްރާހިމް އާއި ފެލިދޫ ދާއިރާގެ މެންބަރު ފަޒުލް ވެސް ޝިޔާމާ ގުޅިވަޑައިގެން ރިޔާސީ ބަޔާން އިއްވެވުމަށް ހުރަސް އެޅި އެވެ.
ތަކުރާރުކޮށް އެ މެމްބަރުންނަށް ނަސޭހަތް ދެއްވުމަށް ފަހު ރައީސް ނަޝީދު ވަނީ އެ މެމްބަރުންގެ ނަންތައް އިއްވައި ތަޅުމުން ނެރުމަށް އަންގަވާފަ އެވެ. އެކަމަކު އެ މެމްބަރުން ތަޅުމުން ނުކުތުމަށް ވަނީ ދެކޮޅު ހަދާފަ އެވެ.
ރައީސް ސޯލިހު މަޖިލީހަށް ވަދެވަޑައިގެންނެވިއިރު އެ އިދާރާގެ ގޭޓު ކައިރީގައި ވެސް އިދިކޮޅު މެމްބަރުން ވަނީ އިހުތިޖާޖުކޮށްފަ އެވެ. އިދިކޮޅު މެމްބަރުން ތިއްބެވީ ރައީސް ސޯލިހުގެ އިސްތިއުފާއަށް ގޮވާލާ ބެނާއެއް ހިފައިގެންނެވެ.
މަޖިލީހުގެ ޖަލްސާ މެދުކަނޑާލަން ނިންމާލާފައިވަނީ އެކަމާމެދު ރައީސް ސޯލިހާއި ނަޝީދު މަޝްވަރާ ކުރެއްވުމަށްފަހުގަ އެވެ. މެދުކަނޑާލިނަމަވެސް އަލުން ފަށާނެ ގަޑިއެއް މަޖިލީހުގެ ރައީސް ހާމަ ނުކުރައްވަ އެވެ.
