ފްރާންސްގެ މާސޭއާއި ސިންގަޕޫރާ ދެމެދު އަޅާ ސަބްމެރިން ކޭބަލް ރާއްޖެއާ ގުޅާލާ ބޭނުންކުރުމުގެ ފުރުސަތު އަންނަ ސެޕްޓްމްބަރު މަހުގެ ކުރިން ލިބިގެންދާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މި އަހަރުގެ ރިޔާސީ ބަޔާން އިއްވަމުން ރައީސް ވިދާޅުވީ ދުނިޔެ ބަދަލުވަމުން އަންނަ ކަމަށާއި އެ ބަދަލާ އެކު އިންޓަނެޓު ބޭނުންކޮށްގެން ހިންގުމުގެ ދާއިރާއަށް އަންނަ އަވަސް ކަމަކީ މުސްތަގުބަލަށް މުހިންމު ބަދަލެއް ކަމަށެވެ.
އެގޮތުން ރާއްޖޭގެ އިންޓަނެޓްގެ އަގަށް ގެނެވުނު ބަދަލާއި އޭގެ ސްޕީޑަށް އަދިވެސް އިތުރު ތަރައްގީ އައުން މުހިންމު ކަން ފާހަގަކުރައްވާ ރައީސް ވިދާޅުވީ ސަރުކާރު ޝާމިލްވާ އައު ސަބްމެރިން ކޭބަލުން އެކަން ހާސިލުކުރުމަށް ފަސޭހަވެގެންދާނެ ކަމަށެވެ.
"ފްރާންސްގެ މާސޭއިން ސިންގަޕޫރަށް އަޅާ ސަބްމެރިން ކޭބަލް ކުރިއަށް އޮތް ފަސް މަސްތެރޭ ރާއްޖެއަށް އެއްގަން ކުރެވި، ސެޕްޓެންބަރު މަހުގެ ނިޔަލަށް މި ސަބްމެރިން ކޭބަލްގެ ބޭނުންކުރުމުގެ ފުރުސަތު ލިބޭނެ," ގައުމާ މުހާތަބުކުރައްވާ ރައީސް ވިދާޅުވި އެވެ.
މިއީ އިންޓަނެޓުގެ ސްޕީޑާއި އަގަށް އިންގިލާބީ ކުރިއެރުމެއް ލިބިގެންދާނެ މަޝްރޫއެއް ކަމަށްވެސް ރައީސް ވެސް ވިދާޅުވި އެވެ.
ހުޅަނގު ޔޫރަޕާއި މެދުއިރުމަތި އަދި އޭޝިއާގެ ގައުމުތައް ގުޅުވާލާ މި ސަބްމެރިން ކޭބަލްގެ މަސައްތަކަތް ފެށީ މިދިޔަ އަހަރުގެ ފެބްރުއަރީ މަހުގެ ތެރޭގަ އެވެ. 19،200 ކިލޯމީޓަރުގެ މި ކޭބަލް ގުޅާލާ ގައުމުތަކުގެ ތެރޭގައި ރާއްޖޭގެ އިތުރުން ހިމެނެނީ މެލޭޝިއާ، ބަންގްލަދޭޝް، ސްރީ ލަންކާ، އިންޑިއާ، ޕާކިސްތާނު، ސައުދީ އަރަބިއާ އަދި މިސްރެވެ.
ސަރުކާރުގެ ވައުދާ އެއްގޮތަށް 27، މެއި 2021 ގައި ސަރުކާރުން ވަނީ ނެޓު އަގުހެޔޮށް، އައު އަގުތައް އިއުލާނުކޮށްފަ އެވެ. އެ ދުވަހު އިންޓަނެޓަކީ އަސާސީ ހިދުމަތެއްކަން ފާހަގަކުރައްވައި ޓެކްނޮލޮޖީ މިނިސްޓަރު އައިމިނަތު ޝައުނާ ވިދާޅުވީ އެކަކު އަނެކަކާ ދުރުގައި ތިބެންޖެހިފައިވާ މިފަދަ ދުވަސްވަރެއްގައި އިންޓަނެޓުގެ ބޭނުތެރިކަން އިހުނަށް ވުރެ އެތައް ގުނައެއް ބޮޑުވާނެ ކަމަށެވެ.
އަތްފޯރާ އަގެއްގައި އަދި އެކަށީގެންވާ ފެންވަރެއްގައި އިންޓަނެޓް ހިދުމަތް ރައްޔިތުންނަށް ޖުލައި މަހުން ފެށިގެން ލިބޭނެ ކަަމަށް ވިދާޅުވި އެވެ.
