ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގައި ހުށަހަޅަން ނިންމާފައިވާ ބިލުގެ ލިސްޓު އެޓާނީ ޖެނެރަލްގެ އޮފީހުން މަޖިލީހަށް ފޮނުވައިފި އެވެ.
މަޖިލީހުގެ ގަވައިދުގެ 82 ވަނަ މާއްދާގެ (ރ) ގައިވާ ގޮތުން ކޮންމެ ދައުރެއް ފެށުމުގެ ކުރިން އެ ދައުރެއްގައި ހުށަހަޅަން ގަސްދު ކުރާ ބިލުތަކުގެ ލިސްޓު މަޖިލީހުގެ ރައީސަށް ފޮނުވަން ޖެހެ އެވެ.
މަޖިލީހުގެ މި އަހަރުގެ ޖަލްސާތައް މާދަމާ ފެށޭއިރު، ފުރަތަމަ ދައުރުގައި 23 ބިލެއް ހުށަހަޅަން ގަސްދު ކުރާ ކަމަށް އެޓާނީ ޖެނެރަލްގެ އޮފީހުން ބުނެ އެވެ. ލިސްޓުގައި ހިމެނޭ ބައެއް ބިލުތަކަކީ މިދިޔަ ދައުރުތަކުގައި ވެސް ހުށަހަޅާނެ ކަމަށް އާންމު ކުރި ބިލުތަކެވެ.
މުހިންމު ބައެއް ބިލުތައް:
- ޖޭއެސްސީ އިސްލާހު ކުރުމުގެ ބިލު
- ރިޔާސީ އިންތިހާބާ ގުޅޭ ގާނޫނަށް އިސްލާހު ގެނައުމުގެ ބިލު
- ހައްޖާއި އުމްރާގެ ބިލު
- އިސްރަށްވެހިންގެ ބިލު
- އިންޑަސްޓްރިއަލް ރިލޭޝަންސް ބިލް
- އަބުރާ ބެހުމުގެ ސަބަބުން ލިބޭ ގެއްލުން ނަގައިދިނުގެ ބިލު
- ފޮރިން އިންވެސްޓްމެންޓް ބިލު
މި ދައުރަށް ހުށަހަޅަން ގަސްދު ކުރާ ބިލުތަކުގެ ލިސްޓުގައި އަބުރާ ބެހެމުގެ ސަބަބުން ލިބޭ ގެއްލުމަށް ބަދަލު ނަގައިދިނުމުގެ ބިލެއް ހިމަނާފައިވާއިރު، އަބުރު ރައްކާތެރިކުރުމާއި ހިޔާލުފާޅުކުރުމުގެ މިނިވަންކަމުގެ ގާނޫނުގެ ނަމުގައި އޮތް ގާނޫނު އުވާލާފައިވަނީ މި ސަރުކާރުންނެވެ.
މީގެ ދެ އަހަރު ކުރިން ހުށަހަޅަން މަސައްކަތް ފެށި، އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލުގައި މައިގަނޑު ގޮތެއްގައި އެކުލެވޭނީ، އަބުރާ ބެހުމަކީ ކޮބައިކަމާއި، އަބުރާ ބެހުނުކަމަށް ނުބެލެވޭނެ ހާލަތްތަކެއް ކަމަށް އޭޖީން ބުނެފައިވެ އެވެ.
އަދި މީހެއްގެ އަބުރާ ބެހިއްޖެނަމަ އެކަމުގެ ސަބަބުން އަބުރާ ބެހެވޭ މީހާއަށް ލިބޭ ގެއްލުމަށް މަދަނީ ބަދަލު ނަގައި ދިނުމުގެ އުސޫލުތައް ވެސް މި ބިލުގައި ހިމެނެ އެވެ.
