ޗައިނާގެ ހަންގްޒޫގައި މި އަހަރު ބާއްވާ އޭޝިއަން ގޭމްސް ޕްރޮމޯޓް ކުރުމުގެ ގޮތުން ބާއްވާ "ފަން ރަން"، މާދަމާ ހުޅުމާލޭ ސިންތެޓިކް ޓްރެކުގައި ބާއްވާ ގޮތަށް ރާވައިފި އެވެ.
މޯލްޑިވްސް އޮލިމްޕިކް ކޮމިޓީ (އެމްއޯސީ) އާއި އޮލިމްޕިކް ކައުންސިލް އޮފް އޭޝިއާ (އޯސީއޭ) އަދި ހަންގްޒޫ ގޭމްސް އޮގަނައިޒިން ކޮމިޓީ ގުޅިގެން ބާއްވާ މި "ފަން ރަން"ގައި ގައުމީ ކުޅިވަރު އެސޯސިއޭޝަންތަކުންނާއި ސްކޫލް ކުދިންނާއި ލޯކަލް ޗައިނީސް ކުންފުނިތަކުގެ އިތުރުން އާންމުންގެ އެކި ފަރާތްތައް ހިމެނޭ ގޮތަށް 700 އެއް ހާ މީހުން ބައިވެރިވާނެ އެވެ.
މި "ފަން ރަން" އާ ބެހޭގޮތުން މައުލޫމާތު ދިނުމަށް އިއްޔެ ހެންވޭރު ބޯޅަގޭގައި ބޭއްވި ނޫސްވެރިންގެ ބައްދަލުވުމުގައި މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރު (ޗަމްޕީ) އާއި ސެކްރެޓަރީ ޖެނެރަލް ތަމޫހު އަހުމަދު ސައީދު (ތަމޫ)، އޮލިމްޕިކް ކައުންސިލް އޮފް އޭޝިއާ (އޯސީއޭ)ގެ ޑިރެކްޓާ އޮފް މީޑިއާ އެންޑް ބްރޯޑްކާސްޓް ޑިޕާޓްމަންޓް، ޖިއާން ޒޯގެ އިތުރުން ހަންގްޒޫ ގޭމްސްގެ ޑިރެކްޓާ އޮފް ކޯ ހޯސްޓް ސިޓީ ޑިޕާޓްމަންޓް، ސޮންގް ޖިއަންބޯ ވަނީ ބައިވެރިވެވަޑައިގެންފަ އެވެ.
އޮލިމްޕިކް ކައުންސިލް އޮފް އޭޝިއާ (އޯސީއޭ)ގެ ޑިރެކްޓާ އޮފް މީޑިއާ އެންޑް ބްރޯޑްކާސްޓް ޑިޕާޓްމަންޓް، ޖިއާން ޒޯ، ނޫސްވެރިންގެ ބައްދަލުވުމުގެ ތެރެއިން ވާހަކަ ދައްކަނީ.--- ފޮޓޯ: މުހައްމަދު ޝާބިން/ އަދަދު
މީގެ ކުރިން ވެސް ރާއްޖޭގައި އޭޝިއަން ގޭމްސް ޕްރޮމޯޓް ކުރަން ބޭއްވި "ފަން ރަން" މި ފަހަރު ރާވާފައި މި ވަނީ ހޮނިހިރު ދުވަހު ހެނދުނު ހުޅުމާލޭ ސިންތެޓިކް ޓްރެކުން ފަށައިގެން ވަކި ރޫޓަކުން ދުވެފައި، ތިން ކިލޯމީޓަރު ހަމަވާ ގޮތަށް، ސިންތެޓިކް ޓްރެކުން ނިންމާ ގޮތަށެވެ.
އޯސީއޭގެ ފަރާތުން ނޫސްވެރިންގެ ބައްދަލުވުމުގައި ވާހަކަ ދެއްކެވި، ޖިއާން ޒޯ ވިދާޅުވީ "ފަން ރަން" އަކީ ގޭމްސް ޕްރޮމޯޓް ކުރުމަށް ހާއްސަ އަހައްމިއްޔަތު ކަމެއް ދީގެން ކުރެވޭ ކަމެއް ކަމަށާއި ގައުމުތަކުން މި ހަރަކާތައް ލިބޭ ތަރުހީބު ވެސް ފުރިހަމަ ކަމަށެވެ.
އުންމީދަކީ ކުރިން ފަަހަރެކޭ އެއްގޮތަށް މި އަހަރު ވެސް ރާއްޖޭގައި ފުރިހަމަ ކަމާ އެކު މި އިވެންޓް ކުރިއަށްގެންދެވުން ކަމަށް ޒޯ ވިދާޅުވި އެވެ.
މިދިޔަ އަހަރުގެ ސެޕްޓެމްބަރު މަހު ހަންގްޒޫގައި ބާއްވަން އޮތް ގޭމްސް މި އަހަރަށް ފަސްކުރަން ޖެހުނީ ޗައިނާގައި ކޮވިޑް-19ގެ ހާލަތު އޮތްގޮތުންނެވެ. އެކަމަކު، މިހާރު، ޗައިނާ ކޮވިޑް-19ގެ ހާލަތުން އަރައިގަނެފައިވާއިރު، ހަންގްޒޯގައި ސެޕްޓެމްބަރު 23 އިން އޮކްޓޫބަރު 8 އަށް ބާއްވާ މި ފަހަރުގެ ގޭމްސް އަށް ވަރަށް ފުރިހަމަ އަށް ތައްޔާރުވަމުން އަންނަ ކަމަށް ހަންގްޒޯ ގޭމްސްގެ ޑިރެކްޓާ އޮފް ކޯ ހޯސްޓް ސިޓީ ޑިޕާޓްމަންޓް، ސޮންގް ވަނީ ވިދާޅުވެފަ އެވެ.
މި އަހަރުގެ ގޭމްސް ޕްރޮމޯޓް ކުރަން އެކި ގައުމުތަކުގައި "ފަން ރަން" ބޭއްވޭއިރު، އޭގެ ތެެެރެއިން ހިނގާ ހަރަކާތްތަކުގެ ސަބަބުން ގޭމްސް އިތުރަށް ފުރިހަމަ ކަމާ އެކު ކުރިއަށްގެންދަން ހިތްވަރު ލިބޭ ކަމަށް ސޮންގް ވަނީ ވިދާޅުވެފަ އެވެ.
މޯލްޑިވްސް އޮލިމްޕިކް ކޮމިޓީން މައުލޫމާތު ދޭ ގޮތުގައި މި ފަހަރުގެ އޭޝިއަން ގޭމްސްގައި ރާއްޖޭން ތަފާތު 11 ކުޅިވަރަކުން 200 އަށް ވުރެ ގިނަ އެތުލީޓުން ވާދަކުރާނެ ކަމަށް ބެލެވޭ ކަމަށެވެ.
