ރ. އަދި ބ. އަތޮޅުގެ މީހުން ދިރިއުޅޭ 26 ރަށެއްގައި ސޯލާ ޕީވީ ހައިބްރިޑް ސިސްޓަމްތަކެއް ގާއިމު ކުރުމަށް 'ސައިނޮސް - ޔިންގްލީ ކޮންސޯޓިއަމް' ކުންފުންޏާ އެކު އެއްބަސްވުމުގައި ސަރުކާރުން ސޮއިކޮށްފި އެވެ.
މިއަދު ސޮއިކުރި އެއްބަސްވުމުގެ ދަށުން ރ. އަދި ބ. އަތޮޅުގެ މީހުން ދިރިއުޅޭ 26 ރަށުގައި 6.35 މެގަވޮޓުގެ ސޯލާ ޕީވީ އާއި 7.66 މެގަވޮޓު އަވާގެ ބެޓްރި އެނާޖީ ސްޓޯރޭޖު ސިސްޓަމް އަދި އެނާޖީ މެނޭޖްމަންޓް ސިސްޓަމް ގާއިމު ކުރާނެ އެވެ. މި ސިސްޓަމްތަކުގެ ސަބަބުން އަހަރަކު 2.9 މިލިއަން ލީޓަރުގެ ޑީސަލް ސަލާމަތް ކުރެވޭނެ ކަމަށް އެންވަޔަރަމަންޓް މިނިސްޓްރީން ލަފާކުރެ އެވެ.
އެ މިނިސްޓްރީން އަންދާޒާ ކޮށްފައިވާ ގޮތުގައި، އަހަރަކު 47 މިލިއަން ރުފިޔާ ސަލާމަތް ކުރުމާ އެކު، ޖައްވަށް ބޭރުކުރާ ވިހަ ގޭހުގެ ތެރެއިން 7900 ޓަމުގެ ކާބަންޑައި އޮކްސައިޑް އިކްއިވެލަންޓް މަދުކުރެވޭނެ އެވެ.
ސޯލާ ޕީވީ ހައިބްރިޑް ސިސްޓަމް ގާއިމުކުރާ ރަށްތައް:
ރ. އަލިފުށި
ރ. ވާދޫ
ރ. ރަސްގެތީމު
ރ. އަނގޮޅެތީމު
ރ. މާކުރަތު
ރ. ރަސްމާދޫ
ރ. އިންނަމާދޫ
ރ. މަޑުއްވަރީ
ރ. އިނގުރައިދޫ
ރ. ފައިނު
ރ. މީދޫ
ރ. ކިނޮޅަސް
ރ. ހުޅުދުއްފާރު
ބ. ކުޑަރިކިލު
ބ. ކަމަދޫ
ބ. ކެންދޫ
ބ. ކިހާދޫ
ބ. ދޮންފަނު
ބ. ދަރަވަންދޫ
ބ. މާޅޮސް
ބ. އޭދަފުށި
ބ. ތުޅާދޫ
ބ. ހިތާދޫ
ބ. ފުޅަދޫ
ބ. ފެހެންދޫ
ބ. ގޮއިދޫ (އެނާޖީ މެނޭޖްމަންޓް ސިސްޓަމެއް)
މި މަޝްރޫއު ހަވާލުކޮށްފައި ވަނީ، 12 މަސް ދުވަހުގެ ތެރޭގައި ނިންމާގޮތަށް 18.24 މިލިއަން ޑޮލަރަށެވެ. މި މަޝްރޫއަކީ ޔޫރަޕިއަން އިންވެސްޓްމަންޓް ބޭންކުގެ އެހީގައި ކުރިއަށްގެންދިއުމަށް ރާވާފައިވާ މަޝްރޫއުތަކުގެ ތެރޭގައި ހިމެނޭ މަޝްރޫއެކެވެ.
މި މަޝްރޫއަކީ ބޭރުން އެތެރެކުރާ ތެލަށް ބަރޯސާވާ މިންވަރު ކުޑަކުރުމަށާއި، ހަކަތައިގެ ޔަގީންކަން އިތުރުކުރުމަށް ރާއްޖެއިން ލިބެންހުރި އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން ކަރަންޓު އުފެއްދުން އިތުރު ކުރުމަށް އަދި "ނެޓް-ޒީރޯ 2030" ލަނޑުދަނޑި ހާސިލުކުރުމަށް ކުރާ މަސައްކަތުގެ ތެރެއިން ކުރިއަށްގެންދާ މަޝްރޫކެވެ.
އެ މަސައްކަތުގެ ދަށުން މުޅި ރާއްޖޭގައި ވަނީ 54 މެގަވޮޓުގެ ސޯލާ ޕީވީ ސިސްޓަމްތައް ގާއިމުކޮށްފަ އެވެ.
