މީހުން ދިރިއުޅޭ ރަށްރަށުގައި ގެސްޓުހައުސް ހުޅުވައި ހިންގުމުގެ ހުއްދަ ލިބޭ ގޮތް ހެދީ ކުރީގެ ރައީސް މުހައްމަދު ނަޝީދުގެ ވެރިކަމުގެ ކުރިން އޭރު އޮތް ރައްޔިތުންގެ މަޖިލީހުގެ ތެރެއިން ކަމަށް، ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީގެ ކެމްޕޭނުގައި ނަޝީދުއާ ދެކޮޅަށް ނިކުންނަވާ ހުންނެވި ރައީސް ސޯލިހު މިހެން ވިދާޅުވެފައިވަނީ ޕްރައިމަރީ ކެމްޕޭނުގެ ތެރެއިން މިއަދު ކ. ގުރައިދޫއަށް ވަޑައިގެން އެ ރަށުގެ އެމްޑީޕީ މެންބަރުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
"ރަށްރަށުގައި ގެސްޓްހައުސް ހެދޭ ގޮތަށް އެ ބަދަލު ގެނައީ ކޮންއިރަކު، ކޮންބައެއްތޯ، މިއީވެސް ވިސްނަން ޖެހޭ ކަމެއް" ރައީސް ވިދާޅުވި އެވެ.
އެމްޑީޕީގެ ކުރީގެ ވެރިކަމުގައި ލޯކަލް ޓުއަރިޒަމް ކުރިއަރުވާ ރަށްތަކުގައި ގެސްޓްހައުސްތައް އެޅޭނެ ގޮތް ހެދޭނެ ގޮތް ހެދުމަށް މަސައްކަތްތަކެއް ކުރެވިފައިވާ ކަމަށް ރައީސް އިތުރަށް ވިދާޅުވި އެވެ.
އެހެން ނަމަވެސް، ރައީސް މައުމޫނުގެ ސަރުކާރުން ރަށްތަކުގައި ގެސްޓުހައުސް އަޅަން ހުއްދަ ނުދޭ ގޮތަށް ނިންމާފާ އޮތް ނިންމުން ބަދަލުކުރީ ނަޝީދުގެ ސަރުކާރު އައުމުގެ ކުރިން އޭރުގެ ރައްޔިތުން މަޖިލީހުގެ ތެރެއިން ކަމަށް އެމަނިކުފާނު ވިދާޅުވި އެވެ.
"ސަރުކާރަށް ލާޒިމުކުރާ ގަރާރު މަޖިލީހުން ފާސްކުރީ 2008 ވަނަ އަހަރުގެ ކުރީ ކޮޅު"
އޭރު މަޖިލީހުގައި ތިއްބެވި އަދި މިހާރު ރައީސް ސޯލިހުގެ އަރިހުގައި ތިއްބެވި ބޭފުޅުން ކަމަށްވާ ރީކޯ މޫސާ މަނިކު، މިނިސްޓަރު އަބްދުﷲ ޝާހިދު، މިނިސްޓަރު މާރިޔާ ދީދީ އަދި މިިނިސްޓަރު އަހުމަދު މަހުލޫފު އަށް އިޝާރާތް ކުރައްވާ ވިދާޅުވީ އޭރު އެބޭފުޅުންނާ އެކު އެމަނިކުފާނަށް އެ ގަރާރު ފާސްކުރުމަށް މަޖިލީހުގައި އޭރު ކުރެވުނު ބަހުސްތަކާއި މަސައްކަތްތައް ވަރަށް ރަނގަޅަށް އިނގިލައްވާ ކަމަށެވެ. ރައީސް ވިދާޅުވީ ރައްޔިތުންނަށް ހަގީގަތް އިނގެން ޖެހޭ ކަމަށެވެ.
ރައީސް މިހެން ވިދާޅުވި ނަމަވެސް، ރާއްޖޭގެ މީހުން ދިރިއުޅޭ ރައްތަކުގައި ގެސްޓްހައުސް އެޅުމަށް ހުއްދަ ލިބޭ ގޮތަށް ޓޫރިސްޓް ގެސްޓްހައުސް ހިންގުމާބެހޭ ގަވާއިދު މަޖިލީހުން ފާސްކޮށް ތަސްދީގުކޮށްފައިވަނީ 2009 ވަނަ އަހަރު ނަޝީދުގެ ވެރިކަމުގަ އެވެ.
އަދި ރާއްޖޭގެ ރަށެއްގައި ފުރަތަމަ ގެސްޓްހައުސް އެއް ހުޅުވިގެންދިޔައީވެސް ނަޝީދުގެ ވެރިކަމުގަ އެވެ. މީގެ ކުރިން އެމްޑީޕީ އަދި ފަތުރުވެރިކަމުގެ ދާއިރާގެ އިސްވެރިންވެސް ވަނީ ރާއްޖެއަށް ލޯކަލް ޓުއަރިޒަމް ތައާރަފުކުރި ލީޑަރަކީ އެމްޑީޕީގެ ފުރަތަމަ ވެރިކަމުގެ ރައީސް ނަޝީދު ކަމުގައި ބުނެފަ އެވެ.
