ސަރުކާރު ހިންގާ އެމްޑީޕީ އާއި އިދިކޮޅު އެންމެ ބޮޑު ޕާޓީ ޕީޕީއެމްގެ ސިޔާސަތުތައް ދާދި އެއްގޮތް ކަމަށްް އެމްޑީޕީގެ ރައީސް އަދި އެޕާޓީގެ ރިޔާސީ އިންތިހާބުގެ ޕްރައިމަރީގައި ވާދަކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނަޝީދު ވިދާޅުވީ، އެމްޑީޕީ އާއި ޕީޕީއެމްގެ މެނިފެސްޓޯ ކިޔާލުމުން ފެންނަނީ ދެ ޕާޓީއިން ގެންގުޅޭ ސިޔާސަތުތަކުގައި މާބޮޑު ތަފާތެއް ނެތް ކަމަށެވެ. ނަމަވެސް ދެ ޕާޓީން ގައުމިއްޔަތާމެދު ވިސްނާ ގޮތް ތަފާތު ކަމަށް ވެސް ނަޝީދު ވިދާޅުވި އެވެ.
"އެމްޑީޕީއަކީ ސެންޓަރރައިޓް ޕާޓީއެއް ގޮތުގަ އަބަދުވެސް ފާހަގަވާ ޕާޓީއެއް، މާކެޓް އޮރިއެންޓެޑް ޕާޓީއެއް. އަޅުގަނޑު ޕީޕީއެމްގެ މެނިފެސްޓޯ ކިޔައިފިއްޔާ އަޅުގަނޑަކަށް ހިއެއް ނުވޭ އައިޑިއޮލޮޖިކަލް ބޮޑު ތަފާތެއް ވާހެނެއް،" ނަޝީދު ވިދާޅުވި އެވެ.
އޭގެ އިތުރުން ނަޝީދު ވިދާޅުވީ، އެމްޑީޕީ އާއި ޕީޕީއެމްއާ މާބޮޑު ތަފާތުތަކެއް ނެތް ނަމަވެސް ސަރުކާރުގެ އިއްތިހާދުގައި ހިމެނޭ އެހެން ޕާޓީތަކާއި އެމްޑީޕީއާ ވަރަށް ބޮޑު ފަރަގެއް އެބަ އޮތް ކަމަށެވެ.
މީގެ ކުރިން ރައީސް އަބްދުﷲ ޔާމީނަށް ފާޑުވިދާޅުވެ ވާހަކަ ދެއްކެވި ނަމަވެސް މި ސަރުކާރުން ވެރިކަމަށް އައުމަށް ބޭނުންކުރާ އެންމެ ބޮޑު ބާރުކަމުގައިވާ އިއްތިހާދަށްވުރެ ޔާމީން އަދި ޕީޕީއެމް ވެސް ރަނގަޅު ކަމަށް ނަޝީދު އަންނަނީ ވިދާޅުވަމުންނެވެ. އަދި ރައީސް ޔާމީނަކީ މިހާރު ހުންނެވި ރައީސް އިބްރާހިމް މުހައްމަދު ސޯލިހަށްވުރެ މާ ގާބިލް ބޭފުޅެއް ކަމަށް ވެސް ނަޝީދު ވިދާޅުވެފައިވެ އެވެ.
ޖެނުއަރީ 28، ގައި ބާއްވާ އެމްޑީޕީ ޕްރައިމަރީގައި ނަޝީދާއެކު ވާދަކުރައްވާނީ މިހާރު ވެރިކަމުގައި ހުންނެވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ. ރައީސް ސޯލިހް ގެންދަވަނީ ކޯލިޝަނަކާ ނުލާ އެކަނި ވެރިކަމަށް އައުމަކީ މީގެ ކުރިން ވެސް ކުރެވިފައި ނުވާ ކަމެއް ކަމަށް ބުނެ އެމަނިކުފާނު ނިކުންނަވާނީ ކޯލިޝަނާއި އެކު ކަަމަށް ތަކުރާރުކޮށް އިއުލާނު ކުރައްވަމުންނެވެ.
